ମୁମ୍ବାଇ: ୨୦୨୪ ନିର୍ବାଚନ ପାଖେଇ ଆସୁଥିବାରୁ ଦେଶରେ ରାଜନୈତିକ ଉଷ୍ମତା ବଢିବାରେ ଲାଗିଛି । ବିଜେପି ସରକାରକୁ କେନ୍ଦ୍ରରୁ ହଟାଇବା ପାଇଁ ବଳ କଷୁଛନ୍ତି ବିରୋଧୀ । ଏହି ପରିପ୍ରେକ୍ଷୀରେ ଆଜି(ଗୁରୁବାର) ମୁମ୍ବାଇରେ ବିରୋଧୀ ମେଣ୍ଟ ଇଣ୍ଡିଆର ତୃତୀୟ ବୈଠକ ଅନୁଷ୍ଠିତ ହେବାକୁ ଯାଉଛି । ଆଜିଠୁ ଦୁଇ ଦିନ ଧରି ବୈଠକ ବସିବ । ଏଥିରେ ୨୮ଟି ରାଜନୈତିକ ଦଳର ୬୩ ଜଣ ପ୍ରତିନିଧି ଯୋଗ ଦେବା ନେଇ ସୂଚନା ରହିଛି । ଏହି ବୈଠକରେ ମେଣ୍ଟର ସାମିଲ ଥିବା ଦଳ ଗୁଡିକ ମଧ୍ୟରେ ଆସନ ବୁଝାମଣା ସଂକ୍ରାନ୍ତରେ ଆଲୋଚନା ହୋଇପାରେ । ଏଥିସହ ଇଣ୍ଡିଆ ମେଣ୍ଟର ଲୋଗୋ ଉନ୍ମୋଚନ ହେବ ବୋଲି ଜଣାପଡିଛି ।
ସୂଚନା ଅନୁଯାୟୀ, ମୁମ୍ବାଇର ହୋଟେଲ ଗ୍ରାଣ୍ଡ ହାୟାତରେ ବୈଠକ ବସିବ । ଶିବସେନା(UBT) ମୁଖ୍ୟ ଉଦ୍ଧବ ଠାକରେଙ୍କ ଦ୍ବାରା ଆୟୋଜିତ ରାତ୍ରିଭୋଜନ ପରେ ବୈଠକ ଆରମ୍ଭ ହେବ । ତେବେ ସେପ୍ଟେମ୍ବର ୧ରେ(ଆସନ୍ତାକାଲ) ଔପଚାରିକ ଭାବେ ବୈଠକ ବସିବ । ମୁଖ୍ୟମନ୍ତ୍ରୀ ତଥା ଜେଡିୟୁ ସୁପ୍ରିମୋ ନୀତିଶ କୁମାରଙ୍କ ନେତୃତ୍ବରେ ବିରୋଧୀ ମହାମେଣ୍ଟର ପ୍ରଥମ ବୈଠକ ବିହାରର ପାଟନାରେ ବସିଥିଲା । ଦ୍ବିତୀୟଟି ବେଙ୍ଗାଲୁରୁରେ ଅନୁଷ୍ଠିତ ହୋଇଥିଲା, ଏଥିରେ ମେଣ୍ଟର ନାମ INDIA ରଖାଯାଇଥିଲା । ବେଙ୍ଗାଲୁର ବୈଠକରେ ୨୬ ଦଳ ଯୋଗ ଦେଇଥିବା ବେଳେ ମୁମ୍ବାଇ ବୈଠକରେ ୨୮ଟି ବିରୋଧୀ ଦଳ ସାମିଲ ହେବା ନେଇ ଦିନକ ପୂର୍ବରୁ ଏନସିପି ନେତା ଶରଦ ପାୱାର ଘୋଷଣା କରିଛନ୍ତି ।