ନୂଆଦିଲ୍ଲୀ: ଧାନ କିଣାରେ 2020-21ରେ ଓଡିଶାକୁ ମିଳିଛି 5700.56 କୋଟି ଟଙ୍କା । ରାଜ୍ୟସରକାର କରିଥିବା ଦାବି ଅନୁସାରେ ଏହି ରାଶି 2020 ମସିହାରେ ଦିଆଯାଇଛି । ତେବେ 2021 ମସିହା ଜାନୁଆରୀରେ ନଭେମ୍ବର, ଡିସେମ୍ବର ଓ ଜାନୁଆରୀ ପାଇଁ ସରକାର କରିଥିବା ଦାବି ଏପର୍ଯ୍ୟନ୍ତ ଦିଆଯାଇନାହିଁ । ସେହିପରି ଆଗାମୀ କ୍ବାର୍ଟର ପାଇଁ ମଧ୍ୟ ରାଜ୍ୟସରକାର କରିଥିବା ଦାବି ଉପରେ ଅର୍ଥ ଦିଆଯାଇନାହିଁ ବୋଲି କେନ୍ଦ୍ର ସରକାରଙ୍କ ପକ୍ଷରୁ କୁହାଯାଇଛି ।
ରାଜ୍ୟସଭାରେ ସାଂସଦ ଅମର ପଟ୍ଟନାୟକଙ୍କ ଏକ ଲିଖିତ ପ୍ରଶ୍ନର ଉତ୍ତରରେ କେନ୍ଦ୍ର ଖାଦ୍ୟ ଓ ଯୋଗାଣ ଏବଂ ସାଧାରଣ ବଣ୍ଟନ ବିଭାଗ ପକ୍ଷରୁ ଏପରି କୁହାଯାଇଛି । ବିକେନ୍ଦ୍ରୀକରଣ କ୍ରୟ (ଡିସିପି) ଯୋଜନା ଅଧୀନରେ ଓଡିଶାକୁ ମିଳୁଥିବା ସବସିଡି ପରିମାଣ ଏବଂ କେବେ ରାଜ୍ୟ ଏହି ସବସିଡି ପାଇବ ବୋଲି ପ୍ରଶ୍ନର ଏପରି ଲିଖିତ ଉତ୍ତର ମନ୍ତ୍ରଣାଳୟ ପକ୍ଷରୁ ଦିଆଯାଇଛି ।
ସେହିପରି 2020-21ରେ ତୃତୀୟ କ୍ବାର୍ଟର ପାଇଁ ସରକାର 3250.85 କୋଟି ଦାବି କରିଥିବାବେଳେ ଚତୁର୍ଥ କ୍ବାର୍ଟର ପାଇଁ ଅଗ୍ରୀମ 1553.41 କୋଟି ଦାବି କରିଛନ୍ତି ରାଜ୍ୟ ସରକାର । ଏହା ଏବେ ଯାଞ୍ଚ କରାଯାଉଛି ବୋଲି ମନ୍ତ୍ରଣାଳୟ ପକ୍ଷରୁ କୁହାଯାଇଛି ।