ନୂଆଦିଲ୍ଲୀ: ପୂର୍ବ ନିର୍ଦ୍ଧାରିତ ପ୍ରୋଟୋକଲ ଅନୁସାରେ ସଫଳତାର ସହ ମାଟିରେ ମିଶିଲା ବହୁଚର୍ଚ୍ଚିତ ଟ୍ବିନ ଟାଓ୍ବାର(Twin Towers )। ବିସ୍ପୋରଣରେ ମାତ୍ର କିଛି ସେକେଣ୍ଡରେ ଏହି ଦୁଇ ସୁଉଚ୍ଚ ଅଟ୍ଟାଳିକା ସମ୍ପୂର୍ଣ୍ଣ ଧ୍ବଂସସ୍ତୂପରେ ପରିଣତ ହୋଇଛି । ନିକଟରେ ଥିବା ବିଲ୍ଡିଂଗୁଡିକରେ କୌଣସି କ୍ଷୟକ୍ଷତି ହୋଇନାହିଁ । କିଛି ଆବର୍ଜନା ଓ ଭଗ୍ନାବଶେଷ ରାସ୍ତା ଉପରକୁ ଛଟିକି ପଡିଛି । କିଛି ସମୟ ମଧ୍ୟରେ ଏହାର ରିଷ୍ଟୋରରେସନ କାର୍ଯ୍ୟ ଶେଷ ହେବ ବୋଲି ନୋଏଡା ସିଇଓ ରିତୁ ମହାଶ୍ବେରୀ (Noida CEO Ritu Maheshwari) ସୂଚନା ଦେଇଛନ୍ତି ।
ଆହୁରି ମଧ୍ୟ ସେ ସୂଚନା ଦେଇ କହିଛନ୍ତି, "ଘଟଣାସ୍ଥଳ ଓ ଆଖପାଖ ଅଞ୍ଚଳରେ ସଫେଇ କାର୍ଯ୍ୟ ଜାରି ରହିଛି । ଆସନ୍ତା କିଛି ଘଣ୍ଚା ମଧ୍ୟରେ ଜୀବନଯାତ୍ରା ସମ୍ପୂର୍ଣ୍ଣ ସ୍ବାଭାବିକ ହେବ । ବିସ୍ଫୋରଣ ପ୍ରୋଟକଲ ଅନୁସାରେ ଆଖପାଖ ଅଞ୍ଚଳର ବିଲ୍ଡିଂଗୁଡିକୁ ଖାଲି କରାଯିବା ସହ ଲୋକଙ୍କୁ ସୁରକ୍ଷିତ ସ୍ଥାନକୁ ସ୍ଥାନାନ୍ତରିତ କରାଯାଇଥିଲା । ସେମାନଙ୍କୁ ସଂଧ୍ୟା 6.30 ରେ ଘରକୁ ଫେରିବାକୁ ଅନୁମତି ମିଳିବ ।" ପରେ ଗ୍ୟାସ ଓ ବିଜୁଳି ସରବରାହ ମଧ୍ୟ ସ୍ବାଭାବିକ କରାଯିବା ନେଇ ମଧ୍ୟ ସେ ସୂଚନା ଦେଇଛନ୍ତି । ବିସ୍ଫୋରଣକୁ ଦୃଷ୍ଟିରେ ରଖି ଆଖପାଖ ଅଞ୍ଚଳରେ ଥିବା ବିଲ୍ଡିଂରୁ ଲୋକଙ୍କୁ ସ୍ଥାନାନ୍ତରିତ କରାଯିବା ସହ ସମଗ୍ର ଅଞ୍ଚଳରେ ଗ୍ୟାସ ଓ ବିଜୁଳି ସେବା ମଧ୍ୟ ବନ୍ଦ ରଖାଯାଇଥିଲା ।