ଶ୍ରୀନଗର: ଶତ୍ରୁ ପକ୍ଷଙ୍କ ଗୁଳିରେ ଆହତ ଭାରତୀୟ ସେନାର ଜଣେ ଯବାନ ଶହୀଦ ହୋଇଛନ୍ତି । ଗତ ସପ୍ତାହରେ ପାକିସ୍ତାନର ଅସ୍ତ୍ରବିରତି ଉଲ୍ଲଂଘନ ଯୋଗୁଁ ଗୁରୁତର ଆହତ ହୋଇଥିଲେ ସେନାର ଏହି ଜବାନ ।
ଜାନୁଆରୀ 18ରେ ଜମ୍ମୁ କାଶ୍ମୀର ରଜୌରୀ ଜିଲ୍ଲାର ସୁନ୍ଦରବନୀ ସେକ୍ଟରରେ ପାକିସ୍ତାନ ପକ୍ଷରୁ ଅସ୍ତ୍ରବିରତି ଉଲ୍ଲଂଘନ ହୋଇଥିଲା । ତେବେ ଭାରତୀୟ ସେନା ଏହି ଅସ୍ତ୍ରବିରତି ଉଲ୍ଲଂଘନର କଡା ଜବାବ ଦେଇଛି ।
ଘଟଣାରେ 10 ଜମ୍ମୁକାଶ୍ମୀର ରାଇଫଲର ଯବାନ ଏନକେ ନିଶାନ୍ତ ଶର୍ମା ଆହତ ହୋଇ କମାଣ୍ଡ ହସ୍ପିଟାଲରେ ଚିକିତ୍ସିତ ହେଉଥିଲେ । ଏନକେ ଶର୍ମା ଜଣ କର୍ତ୍ତବ୍ୟପରାୟଣ ସୈନିକ ଥିଲେ । ତେବେ ତାଙ୍କ ସର୍ବୋଚ୍ଚ ବଳିଦାନ ସର୍ବଦା ସ୍ମରଣୀୟ ହୋଇ ରହିବ ବୋଲି ସେନା ପକ୍ଷରୁ ବୟାନ ଦିଆଯାଇଛି ।
ଏହା ପୂର୍ବରୁ ଜାନୁଆରୀ 21ରେ ଜମ୍ମୁ କାଶ୍ମୀର ପୁଞ୍ଛ ଜିଲ୍ଲା କ୍ରିଷ୍ଣା ଘାଟିରେ ହୋଇଥିବା ଅସ୍ତ୍ରବିରତି ଉଲ୍ଲଂଘନ ଯୋଗୁଁ 10 ଜମ୍ମୁକାଶ୍ମୀର ରାଇଫଲର ହାବିଲଦାର ନିର୍ମଳ ସିଂହ ଶହୀଦ ହୋଇଯାଇଥିଲେ ।