ପାଟନା: ବିଧାନସଭା ମନ୍ତବ୍ୟ ରଖିବା ବେଳେ ଆପତ୍ତିଜନକ ଶବ୍ଦ ବ୍ୟବହାର ପାଇଁ ବିବାଦରେ ବିହାର ମୁଖ୍ୟମନ୍ତ୍ରୀ ନୀତିଶ କୁମାର । ଜନସଂଖ୍ୟା ନିୟନ୍ତ୍ରଣ ପ୍ରସଙ୍ଗରେ ସଦନରେ କହୁ କହୁ ସଞ୍ଜମତା ଭୁଲିଗଲେ ନୀତିଶ । ଅତି ବେପରୁଆର ଢଙ୍ଗରେ ମହିଳାଙ୍କ ପ୍ରତି ଆପତ୍ତିଜନକ ଶବ୍ଦ ବ୍ୟବହାର କଲେ । ଯାହା ମହିଳାଙ୍କ ଗରିମାକୁ କ୍ଷୂର୍ଣ୍ଣ କଲା ପରି । ଅନ୍ୟ ସଦସ୍ୟମାନେ ମଧ୍ୟ ନୀତିଶଙ୍କ ଏହି ମନ୍ତବ୍ୟରେ ଗୃହରେ ଲଜ୍ଜା ଅନୁଭବ କରିଥିଲେ । ନୀତିଶଙ୍କ ଏପରି କିଛି ମନ୍ତବ୍ୟ ଆଜି ବିହାର ବିଧାନସଭାରେ ଦେଖିବାକୁ ମିଳିଛି ।
ବିବାହ ପରେ ଜନସଂଖ୍ୟା ନିୟନ୍ତ୍ରଣ ଉପରେ ନୀତିଶ ଏହି ମନ୍ତବ୍ୟ ଦେଇଛନ୍ତି । ଅତି ବେପରୁଆ ତଥା ଅଶାଳୀନ ଭାବେ ନୀତିଶ ଏହି ମନ୍ତବ୍ୟ ଦେଇଥିଲେ । ଯାହାକୁ ନେଇ ବିବାଦ ସୃଷ୍ଟି ହୋଇଛି । ଏହାକୁ ନେଇ ବିରୋଧୀ ବିଜେପି ସମେତ ଅନ୍ୟମାନେ ମଧ୍ୟ ନିନ୍ଦା କରିଛନ୍ତି । ମୁଖ୍ୟମନ୍ତ୍ରୀ ନୀତିଶଙ୍କ ବିରୋଧରେ ଜାତୀୟ ମହିଳା କମିଶନ ମଧ୍ୟ ଉଦବେଗ ପ୍ରକାଶ କରିଛି । ଜାତୀୟ ମହିଳା ଆୟୋଗ (ଏନସିଡବ୍ଲୁ)ର ଅଧ୍ୟକ୍ଷା କହିଛନ୍ତି, ‘‘ଦେଶର ପ୍ରତ୍ୟେକ ମହିଳାଙ୍କ ତରଫରୁ ଆୟୋଗ ମୁଖ୍ୟମନ୍ତ୍ରୀ ନୀତୀଶ କୁମାରଙ୍କ ତରଫରୁ ତୁରନ୍ତ କ୍ଷମା ମାଗିବାକୁ ଦାବି କରୁଛି । ବିଧାନସଭାରେ ତାଙ୍କର ଏହି ମନ୍ତବ୍ୟ ଅତି ଲଜ୍ଜାଜନକ । ଏହା ପ୍ରତ୍ୟେକ ମହିଳାଙ୍କର ସମ୍ମାନକୁ ହାନୀ କରିବା ପରି । ତାଙ୍କ ଭାଷଣ ସମୟରେ ବ୍ୟବହାର କରାଯାଇଥିବା ଏପରି ଅପମାନଜନକ ଏବଂ ଶସ୍ତା ଭାଷା ଆମ ସମାଜ ପାଇଁ ଏକ କଳା ଦାଗ ।"