ନୂଆଦିଲ୍ଲୀ:ବଢୁଥିବା ତୈଳଦର ନେଇ ସାରା ଦେଶରେ ଅସନ୍ତୋଷ ସାମ୍ନାକୁ ଆସୁଥିବାବେଳେ ଆଜି ହାଇଡ୍ରୋଜେନ କାରରେ ସଂସଦ ପହଞ୍ଚିଛନ୍ତି କେନ୍ଦ୍ର ପରିବହନ ଓ ରାଜମାର୍ଗ ମନ୍ତ୍ରୀ ନୀତିନ ଗଡକରୀ । ଗଡକରୀ ଆଜି ଆଣିଥିବା ଗ୍ରୀନ ହାଇଡ୍ରୋଜେନ ପାଓ୍ବର କାର ଭାରତରେ ପ୍ରଥମ ବୋଲି ମଧ୍ୟ କୁହଯାଉଛି । ସର୍ବଦା ନବୀକରଣ ଯୋଗ୍ୟ ଓ ସବୁଜ ଶକ୍ତିର ବ୍ୟବହାର ନେଇ ଏକାଧିକ ଯୋଜନା ପାଇଁ ଚର୍ଚ୍ଚାରେ ଥିବା ଗଡକରୀ ଆଜି ଏହି କାରରେ ଜରିଆରେ ନିଜ ସରକାରୀ ବାସଭବନରୁ ସଂସଦ ଅଭିମୁଖେ ଆସିଥିଲେ ।
ତେବେ ଏହି କାରକୁ ନେଇ ଚର୍ଚ୍ଚା ଲାଗି ରହିଥିବାବେଳେ ଏହାର ବୈଷୟିକ ଫିଚର ଜାଣିବା ପାଇଁ ମଧ୍ୟ ବେସ ଉତ୍ସୁକତା ସୃଷ୍ଟି ହେବାରେ ଲାଗିଛି । ମିଳିଥିବା ସୂଚନା ଅନୁସାରେ, ସବୁଜ ଇନ୍ଧନରେ ଚାଲୁଥିବା ଏହି କାର ବେଶ୍ ପରିବେଶ ଅନୁକୂଳ ସହ କମ ଖର୍ଚ୍ଚ ସାପେକ୍ଷ ମଧ୍ୟ । ଏହା ପୂର୍ଣ୍ଣ କ୍ଷମତାରେ ଇନ୍ଧନ ଭରିବା ପରେ ଏକକାଳୀନ 6ଶହ କି.ମି ପର୍ଯ୍ୟନ୍ତ ଯାତ୍ରା କରିପାରିବ ।
ତେବେ ଅଙ୍ଗାରକାମ୍ଳ ନର୍ଗତ ନହେବା କାରଣରୁ ଏହା କେବଳ ପରିବେଶ ଅନୁକୂଳ ତାହା ନୁହେଁ ବରଂ ଏହା ସାଧାରଣ କାର ପରିବର୍ତ୍ତେ ବେଶ୍ କମ ଖର୍ଚ୍ଚ ସାପେକ୍ଷ ମଧ୍ୟ । ଏଥିରେ ଏକ କି.ମି ଯାତ୍ରା ପାଇଁ ମାତ୍ର ପାଖାପାଖି 2ଟଙ୍କା ଖର୍ଚ୍ଚ ଲାଗିଥାଏ ବୋଲି ଆନୁପାତିକ ସର୍ବେକ୍ଷଣରୁ ଜଣାପଡିଛି । ଏହାର ଅନ୍ୟ ଏକ ଅତ୍ୟାଧୁନିକ ବୈଶିଷ୍ଟ ହେଉଛି ଏହା ମାତ୍ର 5 ମିନିଟରେ ନିଜର ପୂର୍ଣ୍ଣ କ୍ଷମତାର ଇନ୍ଧନ ମଧ୍ୟ ଭରିପାରେ ।