ନୂଆଦିଲ୍ଲୀ:ଟିଏମସି ସାଂସଦ ମହୁଆ ମୋଇତ୍ରାଙ୍କ ବିରୋଧରେ ଆସିଥିବା କ୍ୟାସ ଫର କ୍ବାରୀ (ସସଂଦରେ ପ୍ରଶ୍ନ ପାଇଁ ଟଙ୍କା ) ଅଭିଯୋଗରେ ଆଜି ସଂସଦ ସଦାଚାର କମିଟି ନିଜ କାର୍ଯ୍ୟାନୁଷ୍ଠାନ ପ୍ରକ୍ରିୟା ଆରମ୍ଭ କରିଛି । ଏହି ସଙ୍ଗୀନ ଅଭିଯୋଗକୁ ପ୍ରଥମେ ଉଠାଇଥିବା ବିଜେପି ସାଂସଦ ନିଶିକାନ୍ତ ଦୁବେ ଓ ସର୍ବୋଚ୍ଚ କୋର୍ଟର ଆଇନଜୀବୀ ଜୟ ଅନନ୍ତ ଦେହାଦ୍ରାଇଙ୍କ ପକ୍ଷ ଶୁଣିଛନ୍ତି । ଉଭୟଙ୍କୁ ହାଜର ହେବା ପାଇଁ କମିଟି ନୋଟିସ ଜାରି କରିଥିଲା । ଆଜି ଉଭୟ କମିଟି ସମ୍ମୁଖରେ ହାଜର ହୋଇ ନିଜ ପକ୍ଷ ରଖିଛନ୍ତି । ତେବେ ଏହି ମାମଲାକୁ ଅତି ଗମ୍ଭୀର ମାମଲା ଭାବେ ବିବେଚନା କରି ପ୍ୟାନେଲ ମୋଇତ୍ରାଙ୍କୁ ମଧ୍ୟ 31 ତାରିଖରେ ହାଜର ହେବା ପାଇଁ ସମନ ଜାରି କରିଛି ।
ଆଜି ଉଭୟ ଅଭିଯୋଗକାରୀଙ୍କ ବୟାନ ରେକର୍ଡ କରାଯିବା ପରେ ପ୍ୟାନେଲ ଅଧ୍ୟକ୍ଷ ବିନୋଦ ସୋନକାର ଗଣମାଧ୍ୟମରେ ପ୍ରତିକ୍ରିୟା ରଖି କହିଛନ୍ତି,‘‘ଆଜି ଉଭୟଙ୍କ ପକ୍ଷ ଶୁଣାଯିବା ପରେ ମୋଇତ୍ରାଙ୍କୁ ମଧ୍ୟ ହାଜର ହେବା ପାଇଁ କମିଟି ସମନ ଜାରି କରିଛି । ମୋଇତ୍ରା ଚଳିତ 31 ତାରିଖରେ ନିଜ ବିରୋଧରେ ଆସିଥିବା ଅଭିଯୋଗ ସମ୍ପର୍କରେ ନିଜ ପକ୍ଷ ରଖିବେ । ଏହା ସହ ଏହି ଅଭିଯୋଗକୁ ଏକ ଗମ୍ଭୀର ପ୍ରସଙ୍ଗ ଭାବେ ଦର୍ଶାଇ ପ୍ୟାନେଲ ମୁଖ୍ୟ କହିଛନ୍ତି, କେନ୍ଦ୍ର ଆଇଟି ଓ ଗୃହ ମନ୍ତ୍ରଣାଳୟକୁ ମଧ୍ୟ ପ୍ୟାନେଲ ଏହି ଅଭିଯୋଗ ସମ୍ପର୍କରେ ତଥ୍ୟ ମାଗିଛି । ତଥାକଥିତ ଅଭିଯୋଗ ଅନୁସାରେ, ମୋଇତ୍ରା ଓ ବ୍ୟବସାୟୀ ଦର୍ଶନ ହିରାନନ୍ଦାନୀଙ୍କ ମଧ୍ୟରେ ହୋଇଥିବା ବାର୍ତ୍ତାଳାପ ସମ୍ପର୍କରେ ସୂଚନା ଓ ପ୍ରଯୁକ୍ତିବିଦ୍ୟା ମନ୍ତ୍ରାଣାଳୟ ଦେବ । ଏହା ପରେ ସେହି ଆଧାରରେ ପରବର୍ତ୍ତୀ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ।
ଏଠାରେ ଉଲ୍ଲେଖଯୋଗ୍ୟ ଯେ, ସର୍ବୋଚ୍ଚ କୋର୍ଟର ଆଇନଜୀବୀ ଜୟ ଅନନ୍ତଙ୍କ ଚିଠି ଆଧାରରେ ବିଜେପି ସାଂସଦ ନିଶିକାନ୍ତ ଦୁବେ ଟିଏମସିର ଏହି ଫାଏରବ୍ରାଣ୍ଡ ସାଂସଦଙ୍କ ଉପରେ ଗମ୍ଭୀର ଅଭିଯୋଗ କରିଛନ୍ତି । ମହୁଆ ଶିଳ୍ପପତି ଦର୍ଶନ ହୀରାନନ୍ଦାନୀଙ୍କଠୁ ଅର୍ଥ ନେଇ ସଂସଦରେ ଆଦାନୀ ସମୂହ ବିରୋଧରେ ପ୍ରଶ୍ନ ଉଠାଇଥିବା ଅଭିଯୋଗ କରିଥିଲେ ଦୁବେ । ତେବେ ଏହି ମାମଲାରେ ଜୟ ଅନନ୍ତ ମଧ୍ୟ ସିବିଆଇକୁ 14 ତାରିଖରେ ଚିଠି ଲେଖି ମହୁଆ ମୋଇତ୍ରାଙ୍କ ବିରୋଧରେ କାର୍ଯ୍ୟାନୁଷ୍ଠାନ ପାଇଁ ଦାବି କରିଥିଲେ ।