ନୂଆଦିଲ୍ଲୀ:ଆକ୍ସନ ମୁଡରେ ଏନଆଇଏ । ଉତ୍ତର ଭାରତୀୟ ରାଜ୍ୟର ବିଭିନ୍ନ ସ୍ଥାନରେ ଜାତୀୟ ଅନୁସନ୍ଧାନକାରୀ ଏଜେନ୍ସି ଛାପା ମାରିଛି । 8 ରାଜ୍ୟର ପ୍ରାୟ 70ଟି ସ୍ଥାନରେ ଏନଆଇଏ ରେଡ କରିଛି । ଗ୍ୟାଙ୍ଗଷ୍ଚାର ଆତଙ୍କବାଦୀ ମାମଲା ଓ ଆତଙ୍କୀବାଦକୁ ପାଣ୍ଠି ଯୋଗାଣ ମାମଲାକୁ ନେଇ ଏହି ଚଢାଉ ହୋଇଥିବା ଅନୁମାନ କରାଯାଉଛି ।
ପଞ୍ଜାବ, ହରିୟାଣା, ରାଜସ୍ଥାନ, ଉତ୍ତରପ୍ରଦେଶ, ଦିଲ୍ଲୀ, ଚଣ୍ଡିଗଡ, ଗୁଜୁରାଟ ଓ ମଧ୍ୟପ୍ରଦେଶ ଆଦି 8 ରାଜ୍ୟରେ ଆତଙ୍କବାଦୀଙ୍କ ସହ ଲିଙ୍କ ଥିବା ବିଭିନ୍ନ ଗ୍ୟାଙ୍ଗଷ୍ଟାରଙ୍କ ଠିକଣାରେ ଏନଆଇଏ ଛାପା ମାରିଛି । ପଞ୍ଜାବର 30 ସ୍ଥାନରେ ସର୍ଚ୍ଚ ଅପରେସନ ଜାରି ରଖିଛି ଏନଆଇଏ । ଗ୍ୟାଙ୍ଗଷ୍ଚାର ଆତଙ୍କବାଦୀ ମାମଲା ଓ ଅପରାଧିକ କାର୍ଯ୍ୟକଳାପ ନେଇ ଏନଆଇଏର ଏହା ଚତୁର୍ଥ ରେଡ୍ । ଲରେନ୍ସ ବିଷ୍ନୋଇ ଗ୍ୟାଙ୍ଗର ଲିଙ୍କ ଥିବା ସନ୍ଦେହରେ ଏହି ଚଢାଉ କରାଯାଉଛି । ଏହି ଗ୍ୟାଙ୍ଗର 4 ଜଣ ସଦସ୍ୟ ଗତବର୍ଷ ନଭେମ୍ବରର ପଞ୍ଜାବର ରୁପାନଗରରେ ଚଢାଉ ସମୟରେ ଧରା ପଡିଥିଲେ ।
ହତ୍ୟା ଓ ବେଆଇନ ଅସ୍ତ୍ରଶସ୍ତ୍ର କାରବାର ନେଇ ଏମାନଙ୍କ ବିରୋଧରେ ମାମଲା ରୁଜୁ ହୋଇଛି । ଗତବର୍ଷ ନଭେମ୍ବରରେ ପଞ୍ଜାବର ତାରା ତରନ, ଫାଜିତା, ଲୁଧିଆନା, ମୋହାଲି ଜିଲ୍ଲାରେ ଏନଆଇଏ ଛାପା ମାରିଥିଲା । ସେହି ସମୟରେ ରାଜସ୍ଥାନ ଓ ଦିଲ୍ଲୀର କିଛି ସ୍ଥାନରେ ମଧ୍ୟ ରେଡ କରିଥିଲା । ଆତଙ୍କବାଦୀ ଗ୍ୟାଙ୍ଗର ପର୍ଦ୍ଦାଫାଶ କରିବାକୁ ଜାତୀୟ ଅନୁସନ୍ଧାନକାରୀ ଏଜେନ୍ସିଂ ବିଭିନ୍ନ ସମୟରେ ନିରନ୍ତର ରେଡ ଜାରି ରଖିଛି ।