ଲକ୍ଷ୍ନୌ:ନବଜାତ ପାଇଁ ଦେବଦୂତ ସାଜିଲେ ଡାକ୍ତରାଣୀ । ନିଜ ମୁହଁ ଦ୍ବାରା ଶିଶୁର ପାଟିରେ ଶ୍ବାସ ଭରି ବଞ୍ଚାଇଲେ କୋମଳମତି ଶିଶୁର ଜୀବନ । ଦୁନିଆକୁ ଦେଖିବା ପୂର୍ବରୁ କ୍ଷଣିକ ମଧ୍ୟରେ ଦୁନିଆକୁ ଅଲବିଦା କହିବାକୁ ଯାଉଥିବା ଶିଶୁକୁ ସେ ଦେଇଛନ୍ତି ଜୀବନଦାନ । ଅକ୍ସିଜେନ ମେସିନର ଅଭାବ ଯୋଗୁଁ ଶିଶୁଟି ଜୀବନ ହାରିବାକୁ ବସିଥିବାବେଳେ ସେ ଏହି ପ୍ରତିକୂଳ ପରିସ୍ଥିତିର ସାମନା କରି ହୋଇଛନ୍ତି ସଫଳ । ଏହି ସମୟର ଦୃଶ୍ୟ ସୋସିଆଲ ମିଡ଼ିଆରେ ଏବେ ଭାଇରାଲ ହେବା ସହିତ ଅନେକ ସାହାସୀ ମହିଳା ଡାକ୍ତରଙ୍କୁ ପ୍ରଶଂସା କରିଛନ୍ତି ।
ଘଟଣାଟି ଉତ୍ତରପ୍ରଦେଶ ଏତ୍ମାଦୁର ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଘଟିଛି । ଏଠାରେ ଖୁସବୁ ନାମରେ ଜଣେ ମହିଳା ଏକ ଶିଶୁକୁ ଜନ୍ମ ଦେଇଥିଲେ । କିନ୍ତୁ ନବଜାତକୁ ଶ୍ବାସକ୍ରିୟାରେ କଷ୍ଟ ହୋଇଥିଲା । ଅପରେସନ ଥିଏଟରରେ ପ୍ରସବ କରାଉଥିବା ଡକ୍ଟର ସୁରେଖା ଚୌଧୁରୀ ନବଜାତକୁ ଅକ୍ସିଜେନ ମେସିନ ଦ୍ବାରା ଅମ୍ଳଜାନ ଦେବା ପାଇଁ ଉଦ୍ୟମ କରିଥିଲେ । କିନ୍ତୁ ଠିକ ସମୟରେ ଏହି ମେସିନଟି କାମ କରିନଥିଲା । ଏହି ସମୟରେ ଡକ୍ଟର ସୁରେଖା ନବଜାତର ପାଟିରେ ଶ୍ବାସ ଭର୍ତ୍ତି(Mouth to Mouth Respiration) କରାଇଥିଲେ ।