ବେଙ୍ଗାଲୁରୁ:ବର୍ଷାରେ ଉବୁଟୁବୁ ହେଉଛି ସ୍ମାର୍ଟସିଟି ବେଙ୍ଗାଲୁରୁ । ଲଗାଣ ବର୍ଷା ଯୋଗୁଁ ଭାରତର ସିଲିକନ ଭ୍ୟାଲି କୁହାଯାଉଥିବା ବେଙ୍ଗାଲୁରୁ ଅବସ୍ଥା ବେହାଲ୍ ହୋଇଯାଇଛି । ରାସ୍ତାଘାଟ, ଗଳିକନ୍ଦି ସବୁଠି ଆଣ୍ଠୁଏ ଉଚ୍ଚର ପାଣି । ରାଜରାସ୍ତା ଜଳାର୍ଣ୍ଣବ ରହିଥିବାରୁ ଯାନବାହନ ଯାତାୟତ ଏବଂ ସାଧାରଣ ଜୀବନ ଯାତ୍ରା ପ୍ରଭାବିତ ହେଉଛି । ଅଫିସ୍ ଯାଉଥିବା କର୍ମଚାରୀ ଘଣ୍ଟା ଘଣ୍ଟା କାଳ ଟ୍ରାଫିକ୍ ଜାମ୍ ସମସ୍ୟା ଭୋଗୁଛନ୍ତି । ଏପରି ସ୍ଥିତିରେ ଅଫିସ୍ରେ ପହଞ୍ଚିବାକୁ ବାଧ୍ୟ ହୋଇ କର୍ମଚାରୀମାନେ ଟ୍ରାକ୍ଟର ଯୋଗେ ଯାତ୍ରା କରୁଛନ୍ତି । ବେଙ୍ଗାଲୁରୁ ସହରରେ କିଛି ଆଇଟି କର୍ମଚାରୀ ଟ୍ରାକ୍ଟରରେ ଅଫିସ ଯାଉଥିବାର ଦୃଶ୍ୟ ସାମ୍ନାକୁ ଆସିଛି(IT professionals reach office by tractor)।
ବିମାନ ବନ୍ଦର ନିକଟସ୍ଥ ୟେମାଲୁରୁ ଅଞ୍ଚଳରେ ଥିବା ଆଇଟି କମ୍ପାନୀଗୁଡିକରେ କାର୍ଯ୍ୟରତ କର୍ମଚାରୀଙ୍କ ପାଇଁ ଟ୍ରାକ୍ଟର ଯାତାୟତର ଏକମାତ୍ର ଭରସା ପାଲଟିଛି । ଏନେଇ ଆଇଟି ଫାର୍ମରେ କାର୍ଯ୍ୟରତ ଜଣେ ମହିଳା କହିଛନ୍ତି, ''ଆମେ ଅଫିସରୁ ଏକାଧିକ ଛୁଟି ନେଇପାରିବୁ ନାହିଁ । ଆମ କାର୍ଯ୍ୟ ପ୍ରଭାବିତ ହେଉଛି । ତେଣୁ ଯାତାୟତ ପାଇଁ ଟ୍ରାକ୍ଟରକୁ ବିକଳ୍ପ ଭାବେ ବାଛିଛୁ । ୫୦ ଟଙ୍କା ଦେଇ ଆମେ ଟ୍ରାକ୍ଟର ଯୋଗେ ଅଫିସରେ ପହଞ୍ଚୁଛୁ ।'' ଅନ୍ୟପଟେ ବର୍ଷା ଏବଂ ଜଳବନ୍ଦୀ ସମସ୍ୟା ଯୋଗୁଁ ଆଇଟି କମ୍ପାନୀଗୁଡିକ ପ୍ରାୟ ୨୨୫ କୋଟିର କ୍ଷତି ସହିଲେଣି । ଏହି କ୍ଷୟକ୍ଷତି ସମ୍ପର୍କରେ ଅନୁଧ୍ୟାନ କରାଯିବ ବୋଲି କର୍ଣ୍ଣାଟକ ମୁଖ୍ୟମନ୍ତ୍ରୀ ବାସବରାଜ ବୋମାଇ କମ୍ପାନୀଗୁଡିକୁ ଆଶ୍ବାସନା ଦେଇଛନ୍ତି ।