ନୂଆଦିଲ୍ଲୀ:ଗୁରୁବାର ନୂଆ ଟେକ୍ନୋଲୋଜିରେ ବିକଶିତ ବ୍ରହ୍ମୋସ ସୁପରସୋନିକ୍ କ୍ରୁଜ ମିସାଇଲର ସଫଳ ପରୀକ୍ଷଣ ହୋଇଛି । ବାଲେଶ୍ବରର ଚାନ୍ଦିପୁର ସମନ୍ବିତ ପରୀକ୍ଷଣ କେନ୍ଦ୍ରରୁ ଏହି ସୁପରସୋନିକ ମିସାଇଲର ସଫଳ ବ୍ୟବହାରିକ ପରୀକ୍ଷଣ କରାଯାଇଛି । ଭାରତର DRDO ଓ ଋଷିଆର NPOM ପକ୍ଷରୁ ମିଳିତ ଭାବରେ ଏହି ମିସାଇଲକୁ ବିକଶିତ କରାଯାଇଛି ।
ଏହି ଅତ୍ୟାଧୁନିକ ମିସାଇଲକୁ ସ୍ଥଳ, ଜଳ ଓ ଆକାଶ ମାର୍ଗରୁ ଲଞ୍ଚ୍ କରି ହେବ । ଦୁଇଟି ଭାରିଏଣ୍ଟ ଉପରେ ଲକ୍ଷ୍ୟ ରଖି ଏହାକୁ ବିକଶିତ କରାଯାଇଛି । ପ୍ରଥମଟି ହେଉଛି Anti-Ship ଓ ଦ୍ବିତୀୟଟି ହେଉଛି Land-Attack roles । ବହୁ ପୂର୍ବରୁ ଏହି ମିସାଇଲ ଭାରତୀୟ ନୌସେନା ଓ ସ୍ଥଳସେନାରେ ସାମିଲ ହୋଇ ସକ୍ରିୟ ଭାବରେ କାର୍ଯ୍ୟ କରି ଆସୁଛି । ଏହାକୁ ନେଇ DRDO ପକ୍ଷରୁ ସୂଚନା ଦିଆଯାଇଛି ।
ସେପଟେ ଏହି ମିସାଇଲ ପରୀକ୍ଷଣ ପରେ ପ୍ରତିରକ୍ଷା ମନ୍ତ୍ରଣାଳୟ ପକ୍ଷରୁ ଟ୍ବିଟ୍ କରି ଶୁଭେଚ୍ଛା ଜ୍ଞାପନ କରାଯାଇଛି । ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ମଧ୍ୟ ଟ୍ବିଟ୍ କରି DRDOକୁ ଶୁଭେଚ୍ଛା ଜ୍ଞାପନ କରିଛନ୍ତି । ମେକ୍ ଇନ୍ ଇଣ୍ଡିଆ ପରିକଳ୍ପନାରେ ତିଆରି ଅତ୍ଯାଧୁନିକ ମିସାଇଲ ବ୍ରିହ୍ମୋସ ସୁପରସୋନିକ୍ ।