ମୁମ୍ବାଇ: ମହାରାଷ୍ଟ୍ର ଓ ଜାତୀୟ ରାଜନୀତିରେ ଲମ୍ବା ଇନ୍ସିଂ ଖେଳିଥିବା ବରିଷ୍ଠ ରାଜନେତା ତଥା ଏନସିପି ପ୍ରତିଷ୍ଠାତା ସଭାପତି ଶରଦ ପାଓ୍ବରଙ୍କ ଅଚାନକ ଇସ୍ତଫାକୁ କେହି ସହଜରେ ଗ୍ରହଣ କରି ପାରୁନାହାନ୍ତି । କିଛି ଦିନ ହେବ ପୁତୁରା ଅଜିତ ପାଓ୍ବାରଙ୍କ ନିଜ ସମର୍ଥିତ ବିଧାୟକଙ୍କ ସହ ବିଜେପିରେ ସାମିଲ ହେବା କଳ୍ପନା ଜଳ୍ପନା ମଧ୍ୟରେ ଆଜି ପୂର୍ବାହ୍ନରେ ହଠାତ ଇସ୍ତଫା ଘୋଷଣା କରିଥିଲେ ଶରଦ ପାଓ୍ବର ।
ତେବେ ରାଜନୀତିରେ ବେଶ ଅପ୍ରତ୍ୟାଶିତ ଗୋଟି ଚଳାଇଥିବା ଶରଦଙ୍କର ଏହା ବର୍ତ୍ତମାନ ସ୍ଥିତିରେ ଏକ ରାଜନୈତିକ ଗୋଟି ନୁହେଁ ତ ! ଏପ୍ରକାର ଚର୍ଚ୍ଚା ମଧ୍ୟ ରାଜନୈତିକ ସମୀକ୍ଷକମାନେ ଆରମ୍ଭ କରି ସାରିଲେଣି । ଏହାରି ମଧ୍ୟରେ ଆଉ ଏକ ରୋଚକ ତଥ୍ୟ ସାମ୍ନାକୁ ଆସିଛି । ଦଳର ନିବେଦନ କ୍ରମେ ସେ ନିଜ ଇସ୍ତଫା ସମ୍ପର୍କରେ ଆଉ ଥରେ ଚିନ୍ତା କରିବେ । 2 ରୁ 3ଦିନ ସମୟ ନେଇ ଶରଦ ପାଓ୍ବର ନିଜ ଇସ୍ତଫା ସମ୍ପର୍କରେ ପୁନଃସମୀକ୍ଷା କରିବାକୁ ସହମତି ପ୍ରକାଶ କରିଥିବା ପୁତୁରା ଅଜିତ ପାଓ୍ବାର ସୂଚନା ଦେଇଛନ୍ତି ।
ଆଜି ପୂର୍ବାହ୍ନରେ ଶରଦଙ୍କ ଅପ୍ରାତ୍ୟାଶିତ ଇସ୍ତଫା ପରେ ଦଳର ଅନେକ ବିଧାୟକ ଓ କାର୍ଯ୍ୟକର୍ତ୍ତା ଏହାକୁ ଗ୍ରହଣ କରିନଥିଲେ । ଏପରିକି କିଛି କାର୍ଯ୍ୟକର୍ତ୍ତା ରାସ୍ତା ଉପରେ ଧାରଣା ଦେବା ସହ ଶରଦଙ୍କୁ ନିଜ ଇସ୍ତଫା ଫେରସ୍ତ ନେବାକୁ ନିବେଦନ କରିଥିଲେ । ଦଳର ଅନ୍ୟ ବର୍ଷିଷ୍ଠ କାର୍ଯ୍ୟକର୍ତ୍ତା ମଧ୍ୟ ଶରଦ ପାଓ୍ବରଙ୍କ ସହ ଆଲୋଚନା କରି ତାଙ୍କୁ ମନେଇବା ପ୍ରୟାସ ମଧ୍ୟ ଆରମ୍ଭ କରିଥିଲେ । ହେଲେ ପ୍ରଥମେ ଏହାକୁ ଗ୍ରହଣ କରୁନଥିବା ଶରଦ ପରେ ଏନେଇ ପୁଣି ଥରେ 2 ରୁ 3 ଦିନ ମଧ୍ୟରେ ସମୀକ୍ଷା କରିବେ ବୋଲି ସହମତି ପ୍ରକାଶ କରିଥିବା ଦଳ ସୂତ୍ରରୁ ସୂଚନା ମିଳିବା ପରେ ଭିନ୍ନ ଚର୍ଚ୍ଚା ହେଉଛି । ବର୍ତ୍ତମାନ ସ୍ଥିତିରେ ପୂର୍ବରୁ ଦଳରୁ ବିଦ୍ରୋହ କରିସାରିଥିବା ଅଜିତ ପାଓ୍ବାର ନିଜ ଅନୁଗତ ବିଧାୟକ ଗୋଷ୍ଠୀ ସହ ବିଜେପିରେ ମିଶିବା ଚର୍ଚ୍ଚା ମଧ୍ୟରେ ଏହା ପାଓ୍ବରଙ୍କ ପାଓ୍ବାର ସୋ’ ବୋଲି ମଧ୍ୟ ଅନୁମାନ କରାଯାଉଛି ।