ନୂଆଦିଲ୍ଲୀ:ବିଶ୍ବର ବିଭିନ୍ନ ଦେଶର ଜେଲରେ 9,521 ଭାରତୀୟ ଗିରଫ ହୋଇ ବନ୍ଦୀ ଜୀବନ କାଟୁଛନ୍ତି । ଯେଉଁମାନଙ୍କ ମଧ୍ୟରୁ ସର୍ବାଧିକ 60% ରୁ ଅଧିକ କେବଳ ଗଲ୍ଫ (ଆରବ ଦେଶ)ରେ ଥିବା ନେଇ ସରକାର ଆଜି (ଗୁରୁବାର) ରାଜ୍ୟସଭାରେ କହିଛନ୍ତି । ବୈଦେଶିକ ବ୍ୟାପାର ମନ୍ତ୍ରଣାଳୟର ରାଷ୍ଟ୍ରମନ୍ତ୍ରୀ ଭି.ମୁରଲୀଧରନ୍ ରାଜ୍ୟସଭାରେ ବିଦେଶରେ ଭାରତୀୟ ବନ୍ଦୀଙ୍କ ସଂଖ୍ୟା ସମ୍ପର୍କରେ ସୂଚନା ଦେବା ସହ ସେମାନଙ୍କ ସୁରକ୍ଷା, ନିରାପତ୍ତା ଓ ଆଇନଗତ ଦିଗକୁ ସରକାର ପ୍ରାଧାନ୍ୟ ଦେଉଥିବା କହିଛନ୍ତି ।
କଂଗ୍ରେସ ମୁଖ୍ୟ ମଲ୍ଲିକାର୍ଜୁନ ଖଡଗେ, ବିଦେଶରେ କେତେ ସଂଖ୍ୟକ ବିଚାରାଧୀନ ଭାରତୀୟ କଏଦୀ ରହିଛନ୍ତି ଓ ସେମାନଙ୍କ ଦେଶଓ୍ବାରୀ ତଥ୍ୟ ସମ୍ପର୍କରେ ପ୍ରଶ୍ନ କରିଥିଲେ । ଉତ୍ତର ରଖି ବିଭାଗୀୟ ମନ୍ତ୍ରୀ ମୁରଲୀଧରନ କହିଥିଲେ, ବିଶ୍ବର ବିଭିନ୍ନ ଦେଶରେ ମୋଟ 9,521 ଭାରତୀୟ ଏକଦୀ ରହିଛନ୍ତି । ସେଥିମଧ୍ୟରୁ ବିଭିନ୍ନ ଆରବ ଦେଶରେ ପ୍ରାୟ 60 ପ୍ରତିଶତ ବା 5,750 ଭାରତୀୟ ବନ୍ଦୀ ଅଛନ୍ତି । ଏମାନଙ୍କ ମଧ୍ୟରେ ସମ୍ପୃକ୍ତ ଦେଶରେ ରହୁଥିବା ବେଳେ ଅପରାଧିକ କାର୍ଯ୍ୟକଳାପ ଓ ସୀମାରେ ଅନୁପ୍ରବେଶ ମାମଲା ରହିଛି ।
ସେମାନଙ୍କ ମଧ୍ୟରୁ ସାଉଦି ଆରବିଆରେ 2,200 ଜଣ, ସଂଯୁକ୍ତ ଆରବ ଏମିରେଟ୍ସ (ୟୁଏଇ)ରେ 2,143, କତାରରେ 752, ବାହାରିନରେ 110, କୁଏତରେ 410, ଓମାନରେ 135 ଜଣ ଭାରତୀୟ ଗିରଫ ହୋଇ ଅଛନ୍ତି । ସେହିପରି ଆରବ ଦେଶକୁ ବାଦ ଦେଲେ ଇରୋପୀୟ ଓ ଆମେରିକୀୟ ଦେଶରେ ମଧ୍ୟ ଭାରତୀୟ କଏଦୀ ରହିଛନ୍ତି । ସେମାନଙ୍କ ମଧ୍ୟରେ ବ୍ରିଟେନରେ 278 ଜଣ ଭାରତୀୟ ବନ୍ଦୀ ଥିବା ବେଳେ ଆମେରିକାରେ 170, ପାକିସ୍ତାନରେ 308, ନେପାଳରେ 1,227, ମାଲେସିଆରେ 309, ଚୀନରେ 180 ଓ ଇଟାଲୀରେ 165 ଜଣ ଭାରତୀୟ ଏକଦୀ ଥିବା ସରକାରଙ୍କ ନିକଟରେ ତଥ୍ୟ ରହିଛି । ଏଥିମଧ୍ୟରୁ ଏକାଧିକ ମାମଲା ବିଚାରାଧୀନ ରହିଛି । ପାକିସ୍ତାନ, ନେପାଳ ଓ ଚୀନ ପରି ଦେଶରେ ଅପରାଧିକ ମାମଲା ବ୍ୟତୀତ ଅଧିକାଂଶ ସୀମା ଅତିକ୍ରମଣ ମାମଲା ରହିଛି । ସେମାନଙ୍କୁ ସହଯୋଗ କରିବା ପାଇଁ ବିଦେଶ ମନ୍ତ୍ରଣାଳୟ ମଧ୍ୟ ନିରନ୍ତର ପ୍ରୟାସ ଜାରି ରଖିଥିବା ମନ୍ତ୍ରୀ ମୁରଲୀଧରନ ଗୃହକୁ ଅବଗତ କରିଛନ୍ତି ।