ମୁମ୍ବାଇ:ବରିଷ୍ଠ ଏନସିପି ନେତା ଶରଦ ପାୱାରଙ୍କ ଇସ୍ତଫା ନାମଞ୍ଜୁର ହୋଇଛି । ଏନସିପି କୋର କମିଟି ବୈଠକରେ ତାଙ୍କର ଇସ୍ତଫା ନାମଞ୍ଜୁର କରାଯାଇଛି । ଗତ ୨ ତାରିଖରେ ଶରଦ ପାୱାର ଏନସିପି ଅଧ୍ୟକ୍ଷ ପଦରୁ ଇସ୍ତଫା ଦେଇଥିଲେ । ଏହାକୁ ଦଳୀୟ ନେତା ବିରୋଧ କରିଥିଲେ । ପାୱାର ନିଜର ଇସ୍ତଫା ଫେରାଇ ନିଅନ୍ତୁ ବୋଲି ଦାବି କରିଥିଲେ । ଏହି ପରିପ୍ରେକ୍ଷୀରେ ଆଜି ଏକ ପ୍ରସ୍ତାବ ଆଣି ଏନସିପି କୋର କମିଟି ତାଙ୍କର ଇସ୍ତଫା ଅଗ୍ରାହ୍ୟ କରିଦେଇଛି । ଏହାସହିତ ଅଧ୍ୟକ୍ଷ ପଦ ବଜାୟ ରଖିବାକୁ ପାୱାରଙ୍କୁ ନିବେଦନ କରିଛି କମିଟି ।
ଏନସିପି ଉପାଧ୍ୟକ୍ଷ ପ୍ରଫୁଲ୍ଲ ପଟେଲ କହିଛନ୍ତି, ନୂଆ ଅଧ୍ୟକ୍ଷ ଚୟନ କରିବାକୁ ଶରଦ ପାୱାର ଗୋଟିଏ କମିଟି ଗଠନ କରିଥିଲେ । ଆଜିର ବୈଠକରେ ସର୍ବସମ୍ମତି କ୍ରମେ ଏକ ପ୍ରସ୍ତାବ ଅଣାଯାଇ ପାୱାରଙ୍କ ଇସ୍ତଫା ଆଗ୍ରାହ୍ୟ କରାଯାଇଛି । ଶରଦ ପାୱାର ଦଳୀୟ ସଦସ୍ୟଙ୍କୁ ନଜଣାଇ ଅଧ୍ୟକ୍ଷ ପଦ ଛାଡିବାକୁ ଘୋଷଣା କରିଥିଲେ । ତାଙ୍କର ନିଷ୍ପତ୍ତିକୁ ଏନସିପି ନେତାଙ୍କ ସମେତ ବିଭିନ୍ନ ରାଜନୈତିକ ଦଳ ନାପସନ୍ଦ କରି ତାଙ୍କୁ ଅଧ୍ୟକ୍ଷ ଭାବେ କାର୍ଯ୍ୟ କରିବାକୁ ଅନୁରୋଧ କରିଥିଲେ ।
ସୂଚନାଯୋଗ୍ୟ, ଶରଦ ପାୱାରଙ୍କ ଉତ୍ତରାଧିକାରୀ ବାଛିବା ପାଇଁ ଆଜି ମୁମ୍ବାଇ ସ୍ଥିତ ଦଳୀୟ କାର୍ଯ୍ୟାଳୟରେ କୋରି କମିଟି ବୈଠକ ବସିଥିଲା । ପାୱାରଙ୍କୁ ଅଧ୍ୟକ୍ଷ ପଦ ଜାରି ରଖିବାକୁ ପ୍ରଫୁଲ ପଟେଲ ବୈଠକରେ ପ୍ରସ୍ତାବ ରଖିଥିଲେ । ଶେଷରେ କମିଟି ଏହି ପ୍ରସ୍ତାବକୁ ଗ୍ରହଣ କରି ତାଙ୍କର ଇସ୍ତଫା ନାମଞ୍ଜୁର କରିଛି । ଏନସିପି କୋର କମିଟିରେ ଅଜିତ ପାୱାର, ସୁପ୍ରିୟା ସୁଲେ, ପ୍ରଫୁଲ୍ଲ ପଟେ ଏବଂ ଭୁଜବଳ ପ୍ରମୁଖ ସଦସ୍ୟ ରହିଛନ୍ତି ।