ରାୟପୁର: ଛତିଶଗଡରେ ଆଜି ପ୍ରଥମ ପର୍ଯ୍ୟାୟରେ ମତଦାନ ଜାରି ରହିଥିବା ବେଳେ ରାଜ୍ୟର ଏକାଧିକ ସ୍ଥାନରେ ନକ୍ସଲ ହିଂସା ଘଟିଛି । କେଙ୍କେର, ନାରାୟଣପୁର ଓ ଦାନ୍ତେୱାଡାରେ ନକ୍ସଲ ହିଂସା ସାମ୍ନାକୁ ଆସିଛି । ଏକାଧିକ ସ୍ଥାନରେ ସୁରକ୍ଷାକର୍ମୀ ଓ ନକ୍ସଲଙ୍କ ମଧ୍ୟରେ ଏନକାଉଣ୍ଟର ହୋଇଛି । ଏକାଧିକ ନକ୍ସଲ ନିହତ ହୋଇଥିବା ନେଇ ସୁରକ୍ଷା ବଳ ପକ୍ଷରୁ ଦାବି କରାଯାଇଛି । ମୃତ ନକ୍ସଲଙ୍କ ସଂଖ୍ୟା ସମ୍ପର୍କରେ ସ୍ପଷ୍ଟ ହୋଇପାରିନି ।
ଆଜି କାଙ୍କେର ଉଲିଆ ଜଙ୍ଗଲରେ ନକ୍ସଲ ତଥା ସୁରକ୍ଷା ବାହିନୀ ମଧ୍ୟରେ ହୋଇଥିବା ଏନକାଉଣ୍ଟରରେ ଜଣେ କୃଷକଙ୍କ ଦେହରେ ମଧ୍ୟ ଗୁଳି ବାଜିଛି । କୃଷକ ଜଣକ ଜଙ୍ଗଲ ନିକଟବର୍ତ୍ତୀ ସ୍ଥାନରେ ଗୋରୁ ଚରାଇବାକୁ ଯାଇଥିବା ବେଳେ ଏନକାଉଣ୍ଟରରେ ଆହତ ହୋଇଛନ୍ତି । ଘଟଣାସ୍ଥଳରୁ 47 ଟି ମାରଣାସ୍ତ୍ର ଉଦ୍ଧାର କରାଯାଇଛି । ଏକାଧିକ ନକ୍ସଲ ନିହତ ହୋଇଥିବା ନେଇ ସନ୍ଦେହ କରାଯାଉଥିବା ବେଳେ ପରବର୍ତ୍ତୀ ସମୟରେ ଏହି ସଂଖ୍ୟା ସ୍ପଷ୍ଟ ହେବା ନେଇ ଅନୁମାନ କରାଯାଉଛି ।
ନାରାୟଣପୁରରେ ମଧ୍ୟ ଏନକାଉଣ୍ଟର ହୋଇଛି । ଏସଟିଏଫ ଓ ନକ୍ସଲଙ୍କ ମଧ୍ୟରେ ଏନକାଉଣ୍ଟର ହୋଇଥିଲା । ସେହିପରି ସର୍ବାଧିକ ନକ୍ସଲ ପ୍ରବଣ ଦାନ୍ତେୱାଡା ବିଧାନସଭା ନିର୍ବାଚନ ଏରିଆର ଆରନପୁର ପୋଲିସ ଷ୍ଟେସନ ଏରିଆରେ ମଧ୍ୟ ଲାଲବାହିନୀର ହିଂସାକାଣ୍ଡ ଦେଖିବାକୁ ମିଳିଛି । ଏହି ଅଞ୍ଚଳରେ ସର୍ଚ୍ଚ ଓ କମ୍ବିଂ ଅପରେସନ ବେଳେ CRPF ଯବାନମାନେ ଦୁଇଟି IED ଉଦ୍ଧାର କରିଛନ୍ତି । ଏହିପରି ନକ୍ସଲମାନେ ବିସ୍ଫୋରଣ କରିବା ଯୋଜନାରେ ଥିବା ବେଳେ ତାହା ଭଣ୍ଡୁର ହୋଇଛି ।