ହାଇଦ୍ରାବାଦ: ଆଜି ହେଉଛି ଜାତୀୟ ଗଣିତ ଦିବସ । ଆଜି ଭାରତର ପ୍ରମୁଖ ଗଣିତଜ୍ଞ ଶ୍ରୀନିବାସ ରାମାନୁଜନଙ୍କ ଜନ୍ମ ଦିବସ । ଗଣିତ ପ୍ରତି ତାଙ୍କର ଅତୁଳନୀୟ ଅବଦାନ ପାଇଁ ତାଙ୍କ ଜନ୍ମଦିନକୁ ଜାତୀୟ ଗଣିତ ଦିବସ ରୂପେ ପାଳନ କରାଯାଉଛି । ଗଣିତର ଯାଦୁଗର ଭାବେ ପରିଚିତ ଶ୍ରୀନିବାସ ରାମାନୁଜନଙ୍କ ଜନ୍ମ ୨୨ ଡିସେମ୍ବର ୧୮୮୭ରେ ଦକ୍ଷିଣ ଭାରତର କୋଏମ୍ବାଟୋର ଇରୋଡ ଗ୍ରାମରେ ହୋଇଥିଲା । ବିଚକ୍ଷଣ ମେଧା କାରଣରୁ ମାଦ୍ରାଡ ୟୁନିଭର୍ସିଟି ତରଫରୁ ତାଙ୍କୁ ସ୍କଲାରସିପ ପ୍ରଦାନ କରାଯାଇଥିଲା । କିନ୍ତୁ ପଢିବା ସମୟରେ ଗଣିତ ଉପରେ ଅଧିକ ଫୋକସ କରିବା କାରଣରୁ ସେ ଇଂରାଜୀରେ ଫେଲ ହୋଇଯାଇଥିଲେ । ଏଥିପାଇଁ ୧୯୦୪ ମସିହାରେ ତାଙ୍କ ସ୍କଲାରସିପକୁ ବନ୍ଦ କରାଯାଇଥିଲା ।
୧୯୧୧ ମସିହାରେ ଜର୍ଣ୍ଣାଲ ଅଫ ଦ ମ୍ୟାଥେମେଟିକଲ ସୋସାଇଟି ନାମକ ପତ୍ରିକାରେ ପ୍ରଥମ ଥର ଲାଗି ତାଙ୍କର ଲେଖା ପ୍ରକାଶ ପାଇଥିଲା । ୧୯୦୯ ମସିହାରେ ରାମାନୁଜନଙ୍କ ବିବାହ ଅମ୍ମାଲଙ୍କ ସହିତ ହୋଇଥିଲା । ରାମାନୁଜନ ଗଣିତ ଦୁନିଆକୁ ପାଇର ଅସୀମିତ ସିରିଜ, ଗେମ ଥିଓରୀ, ରାମାନୁଜନ ନମ୍ବର, ରିମ୍ୟାନ ସିରିଜ, ଥେଟା ଫଙ୍କସନ ଭଳି ପ୍ରାୟ ୧୨୦ ଟି ଥିଓରୀ ପ୍ରଦାନ କରିଛନ୍ତି । ଗଣିତ କ୍ଷେତ୍ରରେ ତାଙ୍କ ଅମୂଲ୍ୟ ଯୋଗଦାନ ପାଇଁ ତାଙ୍କୁ କେମ୍ବ୍ରିଜ ବିଶ୍ବବିଦ୍ୟାଳୟ ତରଫରୁ ନିମନ୍ତ୍ରିତ କରାଯାଇଥିଲା । କେମ୍ବ୍ରିଜ ବିଶ୍ବବିଦ୍ୟାଳୟର ଟ୍ରିନିଟି କଲେଜର ରିସର୍ଚ୍ଚ ଫେଲୋ ହେବାରେ ସେ ଥିଲେ ପ୍ରଥମ ଭାରତୀୟ । ସେ ବ୍ରିଟେନର ରୟାଲ ସୋସାଇଟିର ସବୁଠାରୁ କମ ବୟସରେ ସଦସ୍ୟ ହେବାରେ ଥିଲେ ପ୍ରଥମ ବ୍ୟକ୍ତି । ଏଥି ସହିତ ୧୯୧୮ ମସିହାରେ ସେ ରୟାଲ ସୋସାଇଟି ଅଫ ଲଣ୍ଡନର ସଦସ୍ୟ ଭାବେ ମନୋନୀତ ହୋଇଥିଲେ ।
ଏହା ମଧ୍ୟ ପଢନ୍ତୁ ...ଅନ୍ତର୍ଜାତୀୟ ମାନବ ଏକତା ଦିବସ, ଏକତା ହିଁ ସମୃଦ୍ଧ ପୃଥିବୀର ଚାବିକାଠି
ମାତ୍ର ୩୨ ବର୍ଷ ବୟସରେ ୨୬ ଏପ୍ରିଲ ୧୯୨୦ ରେ ତାମିଲନାଡୁର ତଞ୍ଜାଭୁର ଜିଲ୍ଲାର କୁମ୍ଭକୋଣମ (କୁନ୍ଦଥାଇ) ନାମକ ସ୍ଥାନରେ ତାଙ୍କର ଦେହାନ୍ତ ହୋଇଥିଲା । ଗଣିତ କ୍ଷେତ୍ର ରେ ତାଙ୍କର ଅତୁଳନୀୟ ଗବେଷଣା ପାଇଁ ସେ ସମଗ୍ର ବିଶ୍ବର ଗଣିତଜ୍ଞମାନଙ୍କ ପାଇଁ ପ୍ରେରଣାର ସ୍ରୋତ ପାଲଟିଛନ୍ତି । ଶ୍ରୀନିବାସ ରାମାନୁଜନଙ୍କ ୧୨୫ତମ ଜୟନ୍ତୀ ସମାରୋହ ଅବସରରେ ୨୦୧୧ ମସିହାରେ ତତ୍କାଳୀନ ପ୍ରଧାନମନ୍ତ୍ରୀ ଡକ୍ଟର ମନମୋହନ ସିଂହ ୨୨ ଡିସେମ୍ବରକୁ ଜାତୀୟ ଗଣିତ ଦିବସ ରୂପେ ପାଳନ କରିବାକୁ ଘୋଷଣା କରିଥିଲେ । ସେହିପରି ୨୦୧୨ ମସିହାକୁ ଜାତୀୟ ଗଣିତ ବର୍ଷ ଭାବେ ଘୋଷଣା କରାଯିବା ସହ ସେହିବର୍ଷ ଠାରୁ ୨୨ ଡିସେମ୍ବରକୁ ଜାତୀୟ ଗଣିତ ଦିବସ ରୂପେ ପାଳନ କରାଯାଇଛି ।
ଅନ୍ତରାଷ୍ଟ୍ରୀୟ ସ୍ତରରେ ଗଣିତ କ୍ଷେତ୍ରରେ ପ୍ରତିଭାବାନ ଯୁବ ଗଣିତଜ୍ଞଙ୍କୁ ପ୍ରତିବର୍ଷ ରାମାନୁଜନ ପୁରସ୍କାର ପ୍ରଦାନ କରାଯାଏ । ୨୦୦୫ ରୁ ଦିଆଯାଉଥିବା ଏହି ପୁରସ୍କାରକୁ ଭାରତ ସରକାରଙ୍କ ବିଜ୍ଞାନ ଏବଂ ଟେକ୍ନୋଲୋଜି ବିଭାଗ ତରଫରୁ ମିଳିତ ଭାବେ ପ୍ରଦାନ କରାଯାଉଛି । ଏହି ପୁରସ୍କାର ବିକାଶଶୀଳ ଦେଶ ମାନଙ୍କର ୪୫ ବର୍ଷରୁ କମ ଯୁବ ଗଣିତ ଗବେଷକଙ୍କୁ ପ୍ରଦାନ କରାଯାଉଛି । ପୁରସ୍କାର ଅର୍ଥ ରାଶି ସ୍ବରୂପ ୧୦,୦୦୦ ଆମେରିକୀୟ ଡଲାର ଦିଆଯାଉଥିବା ବେଳେ ବିଜେତାଙ୍କୁ ଇଣ୍ଟରନ୍ୟାସନାଲ ସେଣ୍ଟର ଫର ଥିଓରେଟିକାଲ ଫିଜିକେସରେ ଲେକ୍ଚର ଦେବାର ସୁଯୋଗ ମିଳିଥାଏ । ୨୦୨୨ ମସିହାରେ ସେନେଗାଲର ଗଣିତଜ୍ଞ ମୋହମ୍ମଦ ମୁସ୍ତଫା ଫଲଙ୍କୁ ଏହି ପୁରସ୍କାର ମିଳିଥିଲା । ସେହିପରି ତାମିଲନାଡୁ ସ୍ଥିତ SASTRA ବିଶ୍ବବିଦ୍ୟାଳୟ ତରଫରୁ ପ୍ରତିବର୍ଷ SASTRA ରାମାନୁଜନ ପୁରସ୍କାର ପ୍ରଦାନ କରାଯାଏ ।
