National Emblem Row: ଅଶୋକ ସ୍ତମ୍ଭର ସିଂହକୁ ନେଇ ରାଜନୀତି, କେନ୍ଦ୍ରକୁ ଘେରିଲେ ବିରୋଧୀ

ପ୍ରଧାନମନ୍ତ୍ରୀ ମୋଦିଙ୍କ ଦ୍ବାରା ନବନିର୍ମିତ ସଂସଦ ଭବନ ଉପରେ ଉନ୍ମୋଚିତ ଅଶୋକସ୍ତମ୍ଭକୁ ନେଇ ବିବାଦ । ନୂଆ ଅଶୋକସ୍ତମ୍ଭର ସିଂହଗୁଡିକ ହିଂସ୍ର ଦେଖାଯାଉଥିବା ଅଭିଯୋଗ କଲେ ବିରୋଧୀ । ଅଧିକ ପଢନ୍ତୁ

ନୂଆଦିଲ୍ଲୀ:ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଦ୍ବାରା ନବନିର୍ମିତ ସଂସଦ ଭବନ ଉପରେ ଉନ୍ମୋଚିତ ଅଶୋକସ୍ତମ୍ଭକୁ ନେଇ ରାଜନୀତି ଜୋର ଧରିଛି । ପୂର୍ବରୁ ଜାତୀୟ ପ୍ରତୀକ ଅଶୋକସ୍ତମ୍ଭରେ ଥିବା ସିଂହଗୁଡିକ ଅତି ଶାନ୍ତ ସ୍ବଭାବର ଦେଖାଯାଉଥିଲେ । କିନ୍ତୁ ନୂଆ ଅଶୋକସ୍ତମ୍ଭର ସିଂହଗୁଡିକ ହିଂସ୍ର ଏବଂ ଆକ୍ରମଣାତ୍ମକ ଦେଖାଯାଉଛନ୍ତି । ଦୁଇ ଅଶୋକସ୍ତମ୍ଭର ସିଂହଗୁଡିକ ମଧ୍ୟରେ ଖୁବ୍ ପାର୍ଥକ୍ୟ ରହିଛି ବୋଲି ବିରୋଧୀ ଅଭିଯୋଗ କରିଛନ୍ତି । ତେଣୁ ଏହାକୁ ତୁରନ୍ତ ବଦଳାଇବାକୁ ସେମାନେ ଦାବି କରିଛନ୍ତି ।

ତୃଣମୂଳ କଂଗ୍ରେସ ସାଂସଦ ମହୁଆ ମଇତ୍ର ଅଭିଯୋଗ କରିଛନ୍ତି, ''ବର୍ତ୍ତମାନ ନିର୍ମିତ ସିଂହଗୁଡିକର ମୁଦ୍ରା ସମ୍ରାଟ ଅଶୋକଙ୍କ ଦ୍ବାରା ପ୍ରତିଷ୍ଠା ହୋଇଥିବା ସିଂହଙ୍କ ମୁଦ୍ରା ଠାରୁ ଭିନ୍ନ ଅଟେ । ବର୍ତ୍ତମାନର ସିଂହ ଆକ୍ରମଣାତ୍ମକ ମୁଦ୍ରାରେ ତିଆରି କରାଯାଇଛି ।'' ଏହାକୁ ନେଇ ମହୁଆ ଟ୍ବିଟ୍ କରିଛନ୍ତି, ସତ କହିବାକୁ ଗଲେ ଆମେ ସତ୍ୟମେବ ଜୟତେରୁ ସିଂହମେବ ଜୟତେ ଯାଏଁ ପହଞ୍ଚି ଯାଇଛୁ ।

କଂଗ୍ରେସ କହିଛି, ନୂଆ ସଂସଦ ଭବନରେ ନିର୍ମିତ ରାଷ୍ଟ୍ରୀୟ ପ୍ରତୀକ ଅନାବରଣ ସମୟରେ ବିରୋଧି ଦଳକୁ ଡକା ନଯିବା ଅଗଣତାନ୍ତ୍ରିକ ଅଟେ । ଏଥିରେ ସତ୍ୟମେବ ଜୟତେ ନ ଲେଖାଯିବା ମଧ୍ୟ ଏକ ମସ୍ତବଡ ଭୁଲ୍ । ଏହାକୁ ଏବେ ବି ଠିକ୍ କରାଯାଇପାରିବ । ଟିଏମସିର ରାଜସଭା ସଦସ୍ୟ ଜବହର ସରକାର ଜାତୀୟ ପ୍ରତୀକର ଦୁଇ ଅଲଗା ଅଲଗା ଚିତ୍ରକୁ ନିଜ ଟ୍ବିଟର ହ୍ୟାଣ୍ଡେଲରେ ସେୟାର କରି ଏହାକୁ ନିନ୍ଦା କରିଛନ୍ତି । ଏହା ଆମ ଜାତୀୟ ପ୍ରତୀକର ଅପମାନ ଅଟେ । ତେଣୁ ତୁରନ୍ତ ଏହାକୁ ପରିବର୍ତ୍ତନ କରାଯାଉ ବୋଲି ସେ କହିଛନ୍ତି ।

ଅନ୍ୟପଟେ ଅଶୋକସ୍ତମ୍ଭ ସିଂହକୁ ନେଇ ବିରୋଧିଙ୍କ ସମାଲୋଚନାର କଡା ଜବାବ ଦେଇଛନ୍ତି କେନ୍ଦ୍ରମନ୍ତ୍ରୀ ସ୍ମୃତି ଇରାନୀ । ସେ କହିଛନ୍ତି, ସମ୍ବିଧାନ ଭଙ୍ଗ କରୁଥିବା ବ୍ୟକ୍ତି ଅଶୋକ ସ୍ତମ୍ଭ ଉପରେ କ'ଣ ଅବା କହିବେ । ଯେଉଁ ଲୋକ ଦେବୀ କାଳୀଙ୍କ ସମ୍ମାନ କରୁନାହନ୍ତି, ସେମାନେ ଅଶୋକ ସ୍ତମ୍ଭକୁ କଣ ସମ୍ମାନ ଦେବେ ?