ପାଟନା: ୨୦୨୪ରେ ଅନୁଷ୍ଠିତ ହେବ ଲୋକସଭା ନିର୍ବାଚନ । ନିର୍ବାଚନ ପାଇଁ ଏବେଠାରୁ ସମସ୍ତ ରାଜନୈତିକ ଦଳ ପ୍ରସ୍ତୁତି ଆରମ୍ଭ କରିଛନ୍ତି । ଏହି କ୍ରମରେ ବିଜେପି ମଧ୍ୟ ବର୍ତ୍ତମାନଠାରୁ ପ୍ରସ୍ତୁତି ଆରମ୍ଭ କରିଛି । ୨୦୨୪ରେ ମଧ୍ୟ ବିଜେପିର ପ୍ରଧାନମନ୍ତ୍ରୀ ପ୍ରାର୍ଥୀ ହେବେ ନରେନ୍ଦ୍ର ମୋଦି । ଏହା କହିଛନ୍ତି ଗୃହମନ୍ତ୍ରୀ ଅମିତ ଶାହ । ଏନେଇ ଏକ ସାମ୍ବାଦିକ ସମ୍ମିଳନୀରେ ସୂଚନା ଦେଇଛନ୍ତି ବିହାର ବିଜେପି ରାଜ୍ୟ ସାଧାରଣ ସମ୍ପାଦକ ଅରୁଣ ସିଂହ ।
ରବିବାର ବିହାର ଗସ୍ତ କରିଥିଲେ ଗୃହମନ୍ତ୍ରୀ ଅମିତ ଶାହ । ଜୁଲାଇ ୩୦ ଓ ୩୧ ତାରିଖରେ ବିହାରରେ ବିଜେପିର ୭ଟି ମୋର୍ଚ୍ଚାର କାର୍ଯ୍ୟ କମିଟି ବୈଠକ ହୋଇଥିଲା । ଏଥିରେ ଯୋଗ ଦେବାକୁ ପହଞ୍ଚିଥିଲେ ଗୃହମନ୍ତ୍ରୀ ଅମିତ ଶାହ । ଏହି ଅବସରରେ ସେ ବୁଥ୍ ସ୍ତରରୁ ସମସ୍ତ କର୍ମୀଙ୍କୁ କାର୍ଯ୍ୟ କରିବାକୁ ଆହ୍ବାନ ଦେଇଥିଲେ । ୨୦୨୪ରେ ମଧ୍ୟ ଯଶସ୍ବୀ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ନେତୃତ୍ବରେ ବିଜେପି ନିର୍ବାଚନ ଲଢ଼ିବ ବୋଲି ସ୍ପଷ୍ଟ କରିଛନ୍ତି ।
ଏହାକୁ ନେଇ ସାମ୍ବାଦିକ ସମ୍ମିଳନୀରେ ସୂଚନା ଦେଇଛନ୍ତି ବିହାର ବିଜେପି ରାଜ୍ୟ ସାଧାରଣ ସମ୍ପାଦକ ଅରୁଣ ସିଂହ । ମୋଦିଙ୍କ ନେତୃତ୍ବରେ ଲଗାତାର ଦୁଇଟି ସାଧାରଣ ନିର୍ବାଚନରେ ବିଜୟ ହାସଲ କରିଛି ବିଜେପି । ବିଜେପିର ୭ଟି ମୋର୍ଚ୍ଚାର କାର୍ଯ୍ୟ କମିଟି ବୈଠକ ଉଦଯାପନୀ ଦିବସରେ ଏକ ସଂକଳ୍ପ ପାରିତ ହୋଇଛି । ତା ସହିତ ସେହି ବୈଠକରେ JDU ସହ ମେଣ୍ଟ ମଧ୍ୟ ଏକ ସଂକଳ୍ପ ପାରିତ ହୋଇଛି । ଏହାପରେ ୨୦୨୪ରେ ବିହାରରେ ବିଜେପି ଓ ଜେଡିୟୁ ମିଳିତ ଭାବରେ ନିର୍ବାଚନ ଲଢ଼ିବେ ବୋଲି ସ୍ପଷ୍ଟ ହୋଇଛି ।