ଭୋପାଲ: ମଧ୍ୟ ପ୍ରଦେଶରେ ନିଯୁକ୍ତ ହୋଇଥିବା 2500 ଜୁନିୟର ଡାକ୍ତରଙ୍କ ଇସ୍ତଫା । ଏମାନଙ୍କ ମଧ୍ୟରୁ ଶ୍ୟାମଶାହ ମେଡିକାଲ କଲେଜରୁ 178 ଜୁନିୟର ଡାକ୍ତର ଥିବା ଜଣାପଡିଛି । ଫଳରେ ରେଓ୍ବାରେ ସ୍ବାସ୍ଥ୍ୟସେବା ସମ୍ପୂର୍ଣ୍ଣ ଭୁଶୁଡି ପଡିଛି । ଅନ୍ୟପଟେ କିଛିଦିନ ତଳେ ପ୍ରଶାସନ ପକ୍ଷରୁ 400 ଡାକ୍ତରଙ୍କୁ ବହିଷ୍କାର କରାଯାଇଛି ।
ସୂଚନା ଅନୁଯାୟୀ ମଧ୍ୟ ପ୍ରଦେଶ ସରକାର ଡାକ୍ତରଙ୍କ ଦାବିନ ନମାନିବାରୁ ରାଜ୍ୟର ବିଭିନ୍ନ ମେଡିକାଲ କଲେଜରୁ ମୋଟ 2500 ଜୁନିଅର ଡାକ୍ତର ଇସ୍ତଫା ଦେଇଛନ୍ତି । ଗତ 3 ଦିନ ହେବ ଷ୍ଟାଇପେଣ୍ଡ ସମେତ 6 ଟି ଦାବି ନେଇ ଜୁନିୟର ଡାକ୍ତରମାନେ ଧାରଣା ଦେଇଥିଲେ । ସରକାର ଏମାନଙ୍କ ଦାବିକୁ ମାନିବାକୁ ନାରାଜ ଥିବା ଅଭିଯୋଗ କରିଛନ୍ତି ଡାକ୍ତର । ତେବେ ଡାକ୍ତରମାନେ କହିଛନ୍ତି ଯେ, ସେମାନେ ସରକାରଙ୍କ ସହ କାର୍ଯ୍ୟ କରିବାକୁ ଚାହୁଁଛନ୍ତି, କିନ୍ତୁ ସରକାର ଦାବି ମାନିବାକୁ ନାରାଜ । ଏଥିପାଇଁ ମୁଖ୍ୟମନ୍ତ୍ରୀ ଶିବରାଜ ସିଂ ଚୌହାନଙ୍କୁ ନିବେଦନ କରିଥିଲେ ମଧ୍ୟ କୌଣସି ସୁଫଳ ମିଳୁନାହିଁ । ଜୁନିଅର ଡାକ୍ତର ସଂଘ(JUDA)ର ସଦସ୍ୟମାନେ କହିଛନ୍ତି ମୁଖ୍ୟମନ୍ତ୍ରୀ ସାରା ରାଜ୍ୟରେ ଜୁନିୟର ଡାକ୍ତରମାନେ ସମ୍ମୁଖୀନ ହେଉଥିବା ସମସ୍ୟା ଶୁଣିବା ଉଚିତ ଏବଂ ଉପଯୁକ୍ତ ନିଷ୍ପତ୍ତି ନେଇ ସେମାନଙ୍କୁ କାର୍ଯ୍ୟକୁ ଫେରିବାରେ ସାହାଯ୍ୟ କରିବା ଉଚିତ୍ ।