ନୂଆଦିଲ୍ଲୀ: ପୁଣି ମହଙ୍ଗା ହେଲା ମଦର ଡାଏରୀ କ୍ଷୀର(Mother Diary Milk Price Hike)। ଦେଶର ପ୍ରମୁଖ କ୍ଷୀର ଉତ୍ପାଦନକାରୀ କମ୍ପାନୀ ମଦର ଡାଏରୀ କ୍ଷୀର ମୂଲ୍ୟରେ 2 ଟଙ୍କା ବୃଦ୍ଧି ଘୋଷଣା କରିଛି । ଆଜିଠୁ(ମଙ୍ଗଳବାର) ଦିଲ୍ଲୀ-ଏନସିଆରରେ ଏହି ବର୍ଦ୍ଧିତ ଦର ଲାଗୁ କରାଯାଇଛି । ଏନେଇ ଗତକାଲି ମଦର ଡାଏରୀ ପକ୍ଷରୁ ଘୋଷଣା କରାଯାଇଥିଲା । ଚଳିତ ବର୍ଷ ପଞ୍ଚମ ଥର ପାଇଁ ଦିଲ୍ଲୀ-ଏନସିଆରରେ ମଦର ଡାଏରୀ ଦୁଗ୍ଧର ମୂଲ୍ୟ ବୃଦ୍ଧି ହୋଇଛି । ମଦର ଡାଏରୀ ଦିଲ୍ଲୀ ଏବଂ ଏହାର ଆଖପାଖ ଅଞ୍ଚଳରେ ପ୍ରତିଦିନ 30 ଲକ୍ଷ ଲିଟରରୁ ଅଧିକ କ୍ଷୀର ବିକ୍ରି କରେ ।
ଏନେଇ ମଦର ଡାଏରୀ କମ୍ପାନୀ କହିଛି, "ଫୁଲ କ୍ରିମ କ୍ଷୀରର ମୂଲ୍ୟ ବର୍ତ୍ତମାନ ଲିଟର ପିଛା 66 ଟଙ୍କାକୁ ବୃଦ୍ଧି ପାଇଥିବାବେଳେ ଟୋନଡ କ୍ଷୀରର ଲିଟର ପିଛା ମୂଲ୍ୟ 53 ଟଙ୍କା ହୋଇଛି । ଏଥି ସହିତ, ଟୋକେନ୍ କ୍ଷୀରର ମୂଲ୍ୟ ଏବଂ ଗାଇ କ୍ଷୀରର ମୂଲ୍ୟରେ କୌଣସି ପରିବର୍ତ୍ତନ କରାଯାଇନାହିଁ । ସେହିପରି ଡବଲ ଟୋନଡ କ୍ଷୀର ଲିଟର ପିଛା 47 ଟଙ୍କାକୁ ବୃଦ୍ଧି ପାଇଛି । କମ୍ପାନୀ ପକ୍ଷରୁ ଆହୁରି କୁହାଯାଇଛି, "ଗତ ବର୍ଷ ତୁଳନାରେ ଦୁଗ୍ଧର କ୍ରୟ ମୂଲ୍ୟ ଚଳିତ ବର୍ଷ ପ୍ରାୟ 24 ପ୍ରତିଶତ ବୃଦ୍ଧି ପାଇଛି। ଦୁଗ୍ଧ ଶିଳ୍ପ ପାଇଁ ଏହା ଏକ ଭଲ ବର୍ଷ ସାବ୍ୟସ୍ତ ହୋଇଛି ।"