ପାଟନା: ଓଲଟିଲା କେନ୍ଦ୍ରମନ୍ତ୍ରୀ ଅଶ୍ବିନୀ ଚୌବେଙ୍କ ସୁରକ୍ଷାରେ ନିୟୋଜିତ ଥିବା ପୋଲିସ ଗାଡି । ପୋଲିସ ଗାଡି ଓଲଟି ଅନୁନ୍ୟ ୫ଜଣ ପୋଲିସ ଯବାନ ଆହତ ହୋଇଥିବା ସୂଚନା ରହିଛି । ରବିବାର ଦିନ ବିହାରର ପାଟନାରେ ଘଟିଛି ଏଭଳି ଅଘଟଣ । ତେବେ କେନ୍ଦ୍ରମନ୍ତ୍ରୀ ସୁରକ୍ଷିତ ରହିଥିବା ସୂଚନା ରହିଛି ।
ଗତକାଲି(ରବିବାର) ରାତିରେ ବକ୍ସରରୁ ପାଟନା ଫେରୁଥିବା ବେଳେ ଏହି ଦୁର୍ଘଟଣା ହୋଇଥିଲା । ପୋଲିସ ଭ୍ୟାନ ଭାରସାମ୍ୟ ହରାଇ ମାଥିଲିଆ କଲଭର୍ଟରେ ଖସିପଡିଥିଲା । ଫଳରେ ୫ ଜଣ ପୋଲିସ ଅଧିକାରୀ ଆହତ ହୋଇଥିଲେ । ଏନେଇ ଖୋଦ ମନ୍ତ୍ରୀ ନିଜେ ଏକ ଭିଡିଓ ଟ୍ବିଟ କରି ସୂଚନା ଦେଇଛନ୍ତି । ସେ କହିଛନ୍ତି, " ବକ୍ସରରୁ ପାଟନା ଯାଉଥିବା ବେଳେ ମାଠିଲା ନାରାୟଣପୁର ରାସ୍ତାରେ କୋରନସରାୟ ଥାନାର ଏକ ପୋଲିସ ଗାଡି ଦୁର୍ଘଟଣାଗ୍ରସ୍ତ ହୋଇଛି । ପ୍ରଭୁ ଶ୍ରୀରାମଙ୍କ କୃପାରୁ ସମସ୍ତେ ଠିକ ଅଛନ୍ତି । ଆହତ ପୋଲିସ ଅଧିକାରୀ ଏବଂ ଗାଡି ଚାଳକକୁ ନେଇ ମୁଁ ଡୁମରାବ ହସ୍ପିଟାଲ ଯାଉଛି ।"
ଏହାପରେ ହସ୍ପିଟାଲରେ ପହଞ୍ଚିବା ପରେ ମନ୍ତ୍ରୀ ଏକ ଭିଡିଓ ସେୟାର କରି କହିଥିଲେ, " ସମସ୍ତ ଆହତ ପୋଲିସ କର୍ମୀମାନଙ୍କୁ ନେଇ ହସ୍ପିଟାଲରେ ପହଞ୍ଚି ସାରିଲି । ସେମାନଙ୍କୁ ପ୍ରାଥମିକ ଚିକିତ୍ସା ଯୋଗାଇ ଦିଆଯାଇଛି । ଆହତ ପୋଲିସମାନଙ୍କ ମଧ୍ୟରୁ ୨ଜଣ ଅଧିକ ଗୁରୁତର ହୋଇଛନ୍ତି । ପ୍ରାଥମିକ ଚିକିତ୍ସା ଯୋଗାଇ ଦେବା ପରେ ମୁଁ ଏବେ ସେମାନଙ୍କୁ ନେଇ ପାଟନା ଏମ୍ସ ଅଭିମୁଖେ ଯାଉଛି । ଭଗବାନ ଶ୍ରୀରାମ ସମସ୍ତଙ୍କୁ ସୁସ୍ଥ କରିଦିଅନ୍ତୁ । ସମସ୍ତେ ଯେଉଁ ସାହାସିକତା ଦେଖାଇଥିଲେ ସେଥିପାଇଁ ମୁଁ ସମସ୍ତଙ୍କୁ ଧନ୍ୟବାଦ ଦେଉଛି । ଭଗବାନ ଶ୍ରୀ ରାମଙ୍କ କୃପାରୁ ଏକ ବଡ଼ ଦୁର୍ଘଟଣାରୁ ବର୍ତ୍ତି ଯାଇଛି ।"