ମଦୁରାଇ ଟ୍ରେନ ଅଘଟଣ ପରେ ଚେତିଲା ରେଳବାଇ, ଏଣିକି ଟ୍ରେନରେ ନେଇପାରିବେନି ଏହିସବୁ ଜିନିଷ

ଟ୍ରେନ ଯାତ୍ରୀ ପାଇଁ ନୂଆ ଗାଇଡଲାଇନ ଜାରି କଲା ଭାରତୀୟ ରେଳବାଇ । ଟ୍ରେନରେ ବିଭିନ୍ନ ସାମଗ୍ରୀ ନେବା ଉପରେ ଲାଗିଲା କଟକଣା । ଅଧିକ ପଢନ୍ତୁ

ହାଇଦ୍ରାବାଦ:ତାମିଲନାଡୁର ମଦୁରାଇ ରେଳ ଜଙ୍କସନରେ ଏଲପିଜି ସିଲିଣ୍ଡର ଫାଟି ୯ ଜଣଙ୍କ ମୃତ୍ୟୁ ପରେ ଟ୍ରେନ ଯାତ୍ରା ବେଳେ କ'ଣ ସବୁ ଗାଇଡଲାଇନ ପାଳନ କରାଯିବ ତାହାର ଏକ ଲିଷ୍ଟ ଶନିବାର ଭାରତୀୟ ରେଳବାଇ ପକ୍ଷରୁ ଜାରି କରାଯାଇଛି । ଗାଇଡଲାଇନରେ ଟ୍ରେନରେ ଘିଅ ନେବା ଉପରେ କଟକଣା ଲାଗିଛି । ଏଣିକି ଟ୍ରେନ ଯାତ୍ରୀ ୨୦ କେଜିରୁ ଅଧିକ ଘିଅ ନେଇପାରିବେ ନାହିଁ । ଏହାସହିତ ଟ୍ରେନରେ ଦହନଶୀଳ ସାମଗ୍ରୀ ନେବା ଉପରେ ମଧ୍ୟ ପ୍ରତିବନ୍ଧକ ଲଗାଯାଇଛି । ଯଦି କୌଣସି ଯାତ୍ରୀ ବାଣ, ଷ୍ଟୋଭ, ଗ୍ୟାସ ଓ ପେଟ୍ରୋଲ ଭଳି ଦହନଶୀଳ ପଦାର୍ଥ ନେଉଥିବାର ଧରାପଡିବେ, ତାଙ୍କ ଉପରେ ଏକ ହଜାର ଟଙ୍କା ଜରିମାନା ଲାଗିବ । ଏପରିକି ସମ୍ପୃକ୍ତ ଯାତ୍ରୀ ଜେଲ୍ ମଧ୍ୟ ହୋଇପାରେ ।

ଟ୍ରେନରେ ଯାତ୍ରା ସମୟରେ କ'ଣ ନେବେ ନାହିଁ:

• ବିସ୍ଫୋରକ, ଦହନଶୀଳ ପଦାର୍ଥ ଓ ଖାଲି ଗ୍ୟାସ୍ ସିଲିଣ୍ଡର
• କିରୋସିନ, ପେଟ୍ରୋଳ ଭଳି ସାମଗ୍ରୀ
• ୨୦ କେଜିରୁ ଅଧିକ ଘିଅ ନେବା ଉପରେ କଟକଣା
• ଶୁଖିଲା ଘାସ, ପତ୍ର ଓ ବର୍ଜ୍ୟ କାଗଜ
• ମୃତ କୁକୁଡା
• ଏସିଡ୍ ଓ ଅନ୍ୟାନ୍ୟ କ୍ଷତିକାରକ ପଦାର୍ଥ

ଯାତ୍ରୀମାନେ ଟ୍ରେନ କମ୍ପାଟମେଣ୍ଟରେ ଧୂମ୍ରପାନ କରିବା ନିଷେଧ ଅଟେ । ଟ୍ରେନ ଯାତ୍ରୀ ବାଣ, ଷ୍ଟୋଭ, ଗ୍ୟାସ ଓ ପେଟ୍ରୋଲ ଭଳି ସାମଗ୍ରୀ ସହ ଯାତ୍ରା କରିପାରିବେ ନାହିଁ । ମଦୁରାଇ ଟ୍ରେନ ଦୁର୍ଘଟଣା ପରେ ଶନିବାର ରେଳବାଇ ପକ୍ଷରୁ ଏହି ଗାଇଡଲାଇନ ଜାରି ହୋଇଛି । ଗତକାଲି ମଦୁରାଇ ଷ୍ଟେସନ ନିକଟରେ ଉତ୍ତର ପ୍ରଦେଶ ଲକ୍ଷ୍ନୌରୁ ୬୫ ଯାତ୍ରୀଙ୍କୁ ନେଇ ରାମେଶ୍ବରମ ଯାଉଥିବା ଟୁରିଷ୍ଟ ଟ୍ରେନରେ ନିଆଁ ଲାଗି ଯାଇଥିଲା । ଟ୍ରେନ ଷ୍ଟେସନ ପାଖରେ ଅଟକି ଥିବାବେଳେ ଏହି ଅଘଟଣ ଘଟିଥିଲା । ଏଥିରେ ୯ ଜଣ ଜୀବନ୍ତ ଦଗ୍ଧ ହୋଇଯାଇ ଥିଲେ ଓ ୨୦ ଯାତ୍ରୀ ଆହତ ହୋଇଥିଲେ । ଆହତମାନେ ଏବେ ମଦୁରାଇ ସ୍ଥିତ ସରକାରୀ ହସ୍ପିଟାଲରେ ଚିକିତ୍ସାଧୀନ ଅଛନ୍ତି । ଯାତ୍ରୀମାନେ ବେଆଇନ ଭାବେ ଟ୍ରେନରେ ଏଲପିଜି ସିଲିଣ୍ଡର ନେଇ ଯାଉଥିଲେ । ସିଲିଣ୍ଡରରୁ ଗ୍ୟାସ୍ ଲିକ ହୋଇ ବିସ୍ଫୋରଣ ହେବା ଯୋଗୁଁ ଏହି ଅଗ୍ନିକାଣ୍ଡ ଘଟିଥିବା ପ୍ରାଥମିକ ତଦନ୍ତରୁ ଜଣାପଡିଛି ।