ଶ୍ରୀନଗର:କାଶ୍ମୀରର ରଜୌରୀ ଜିଲ୍ଲାର ଆତଙ୍କବାଦୀ କାର୍ଯ୍ୟକଳାପରେ ବ୍ୟବହୃତ ବିପୁଳ ଅସ୍ତ୍ରଶସ୍ତ୍ର ଏବଂ ଗୁଳିଗୋଳା ସହିତ 6 ଟି ବୋମା ଉଦ୍ଧାର କରିଛି ସୁରକ୍ଷା ବଳ । ଗତକାଲି (ରବିବାର) ରିଆସି ଜିଲ୍ଲାର ଏକ ଗ୍ରାମରେ ସ୍ଥାନୀୟ ଲୋକ ଲସ୍କର-ଏ-ତୋଇବା (LET) କମାଣ୍ଡର ତାଲିବ ହୁସେନ୍ ଶାହା ଏବଂ ତା ସହଯୋଗୀ ଫୈସଲ ଅହମ୍ମଦ ଦାରକୁ କାବୁ କରି ପୋଲିସ ଜିମା ଦେଇଥିଲେ । ଆଜି ସେମାନଙ୍କ ଠାରୁ ଜେରା ବେଳେ ମିଳିଥିବା ସୂଚନା ଅନୁସାରେ ଏହି ସବୁ ଅସ୍ତ୍ରଶସ୍ତ୍ର ଜବତ କରିବାରେ ସଫଳ ହୋଇଛି ସେନା ।
ଆତଙ୍କବାଦୀଙ୍କୁ ଜେରା କରିଥିବା ଜଣେ ଅଧିକାରୀଙ୍କ କହିବାନୁସାରେ, ଦୁଇ ଆତଙ୍କୀଙ୍କୁ ପଚରାଉଚରା ସମୟରେ ମିଳିଥିବା ସୂଚନା ଅନୁଯାୟୀ ଉକ୍ତ ସ୍ଥାନରେ ଚଢାଉ କରାଯାଇଥିଲା । ଚଢାଉରେ ବିପୁଳ ପରିଣାର ଅତ୍ୟାଧୁନିକ ମାରଣାସ୍ତ୍ର ଜବତ ହୋଇଛି । ଜବତ ମାରଣାସ୍ତ୍ର ମଧ୍ୟରେ 6ଟି ବୋମା, ଗୋଟିଏ ପିସ୍ତଲ, ତିନୋଟି ପିସ୍ତଲ ମାଗାଜିନ, 19 ରାଉଣ୍ଡ ଗୁଳି, ଗୋଟିଏ ଅଣ୍ଡର ବ୍ୟାରେଲ ଗ୍ରେନେଡ ଲଞ୍ଚର (UBGL), ତିନୋଟି UBGL ଗ୍ରେନେଡ, 75 ରାଉଣ୍ଡ AK-74 ରାଇଫଲ ଗୁଳି ଏବଂ ଆଣ୍ଟିନା ସହିତ ଗୋଟିଏ IED ରିମୋଟ ଉଦ୍ଧାର କରାଯାଇଛି ।