ଚେନ୍ନାଇ:ତାମିଲନାଡୁରେ ଗମ୍ଭୀର ହେବାରେ ଲାଗିଛି ସ୍ଥିତି । ରାଜ୍ୟରେ ମଦ ପିଇ ବର୍ତ୍ତମାନ ସୁଦ୍ଧା ୧୬ଜଣ ପ୍ରାଣ ହରାଇଥିବା ବେଳେ ୩୦ରୁ ଅଧିକ ଗୁରୁତର ହୋଇ ଚିକିତ୍ସିତ ହେଉଥିବା ଜଣାପଡ଼ିଛି । ଏଭଳି ସ୍ଥିତିରେ ସମୀକ୍ଷା ବୈଠକ କରିଛନ୍ତି ମୁଖ୍ୟମନ୍ତ୍ରୀ ଏମ୍.କେ ଷ୍ଟାଲିନ୍ । ତାମିଲନାଡ଼ୁର ଭିଲ୍ଲୁପୁରମ ଏବଂ ଛେଙ୍ଗାଲପାଟୁ ଜିଲ୍ଲାରେ ମଦ ଜନିତ ମୃତ୍ୟୁକୁ ନେଇ ଚେନ୍ନାଇରେ ସମୀକ୍ଷା ବୈଠକ କରିଛନ୍ତି ମୁଖ୍ୟମନ୍ତ୍ରୀ ।
ଖବରଅନୁସାରେ, ଗତକାଲି(ବୁଧବାର) ହୋଇଥିବା ବୈଠକରେ ପୋଲିସ ବିଭାଗର ବରିଷ୍ଠ ଅଧିକାରୀ ଏବଂ ଏନଫୋର୍ସମେଣ୍ଟ୍ ବିଭାଗର ଅଧିକାରୀମାନେ ଯୋଗ ଦେଇଥିଲେ । ଏହି ବୈଠକରେ ମଦ ଚୋରାଚାଲାଣ ଉପରେ ରୋକ୍ ଲଗାଇବା ପାଇଁ ବିଶେଷ ଆଲୋଚନା ହୋଇଥିବା ନେଇ ସୁତ୍ରରୁ ଜଣାପଡିଛି । ବୁଧବାର ବସିଥିବା ବୈଠକରେ ମୁଖ୍ୟମନ୍ତ୍ରୀ ମଦ ଚୋରା ଚାଲାଣକୁ ରୋକିବା ପାଇଁ ବରିଷ୍ଠ ପୋଲିସ ଅଧିକାରୀଙ୍କୁ ନିର୍ଦ୍ଦେଶ ଦେଇଛନ୍ତି । ଏନେଇ ଏକ ଟୋଲ୍ ଫ୍ରି' ନମ୍ବର ମଧ୍ୟ ଜାରି କରାଯାଇଛି । ୧୦୫୮୧ ଏହି ଟୋଲ୍ ଫ୍ରି' ନମ୍ବର ମାଧ୍ୟମରେ ମଦ ଚୋରାଚାଲାଣ ନେଇ ଖବର ଦେଇ ପାରିବେ । ପ୍ରତି ସୋମବାର ଦିନ ଗୃହ ସଚିବଙ୍କ ମାଧ୍ୟମରେ ମୁଖ୍ୟମନ୍ତ୍ରୀଙ୍କ ନିକଟକୁ ଏକ ରିପୋର୍ଟ ଦିଆଯିବା ଉଚିତ ବୋଲି ସେ କହିଛନ୍ତି ।
ଅନ୍ୟପଟେ ମୁଖ୍ୟମନ୍ତ୍ରୀ ନିର୍ଦ୍ଦେଶ ଦେଇ କହିଛନ୍ତି, "ରାଜ୍ୟରେ ମଦ ମୃତ୍ୟୁ ରୋକିବା ସହ ବିଷାକ୍ତ ମଦ ଚାଲାଣ ରୋକିବା ପାଇଁ ପୋଲିସ ବିଭାଗର ତତ୍ପରତା ଆବଶ୍ୟକ । ପ୍ରତି ସୋମବାରରେ ଜିଲ୍ଲାସ୍ତରୀୟ ବୈଠକ କରାଯିବ । ଜିଲ୍ଲାପାଳଙ୍କ ସହ ପୋଲିସ ବିଭାଗ, ରାଜସ୍ବ ବିଭାଗ ଅଧିକାରୀ ଏବଂ ତାମିଲନାଡୁ ରାଜ୍ୟ ଅର୍ଥ ନିଗମ ଅଧିକାରୀଙ୍କୁ ନେଇ ଏହି ବୈଠକ କରାଯିବ ।"