ଜୟପୁର:ରାଜସ୍ଥାନରେ ଥମିବାର ନାଁ ନେଉନି ସାମ୍ପ୍ରଦାୟିକ ହିଂସା । କରୌଲୀ ଓ ଯୋଧପୁର ପରେ ଗତକାଲି ଭିଲଓ୍ବାଡାରେ ମଧ୍ୟ ଦେଖିବାକୁ ମିଳିଛି ହିଂସାକାଣ୍ଡ । ଦୁଇଜଣ ସ୍ଥାନୀୟ ଯୁବକଙ୍କୁ ଦୁର୍ବୃତ୍ତ ଆକ୍ରମଣ କରିବା ସହ ବାଇକ ଜାଳିଦେବା ପରେ ସ୍ଥାନୀୟ ଅଞ୍ଚଳରେ ଦେଖିବାକୁ ମିଳିିଛି ବ୍ୟାପକ ଉତ୍ତେଜନା । ଘଟଣାକୁ ଗମ୍ଭୀରତାର ନେଇଛି ରାଜସ୍ଥାନ ପୋଲିସ । ଘଟଣାର ସମ୍ବେଦନଶୀଳତାକୁ ଦୃଷ୍ଟିରେ ରଖି ଆସନ୍ତାକାଲି (ଶୁକ୍ରବାର) ସକାଳ ପର୍ଯ୍ୟନ୍ତ ଇଣ୍ଟରନେଟ୍ ସେବା ସ୍ଥଗିତ ରଖାଯାଇଛି ।
ଘଟଣା ସମ୍ପର୍କରେ ସୂଚନା ପାଇବା ପରେ ସ୍ଥାନୀୟ ଜିଲ୍ଲାପାଳ ଆଶିଷ ମୋଦି, ଜିଲ୍ଲା ପୋଲିସ ଅଧୀକ୍ଷକ ଆଦର୍ଶ ସିଦ୍ଧୁ ଗତକାଲି ମଧ୍ୟରାତ୍ରିରେ ଘଟଣାସ୍ଥଳରେ ପହଞ୍ଚି ଲୋକଙ୍କୁ ବୁଝାସୁଝା କରିବା ପରେ ସ୍ଥିତି ସାମାନ୍ୟ ଶାନ୍ତ ପଡିଛି । ଏସପି ଆଦର୍ଶ ସିଦ୍ଧୁ କହିଛନ୍ତି ପୋଲିସ ଟିମ ଘଟଣାର ତଦନ୍ତ ଆରମ୍ଭ କରିବା ସହ କିଛି ଲୋକଙ୍କୁ ଅଟକ ମଧ୍ୟ ରଖିଛି । ଘଟଣାରେ ଯେ କେହି ବି ସମ୍ପୃକ୍ତ ତୁରନ୍ତ ତାଙ୍କୁ ଗିରଫ କରାଯିବ ।