କାର୍ଯ୍ୟକାଳ ସରିବା କ୍ଷଣି ପୂର୍ବତନ ରାଷ୍ଟ୍ରପତିଙ୍କୁ ଟାର୍ଗେଟ: ମୁଫତି କହିଲେ ବିଜେପି ଏଜେଣ୍ଡାରେ କରିଛନ୍ତି କାମ

କାର୍ଯ୍ୟକାଳ ସରୁ ସରୁ ସମାଲୋଚନାର ଶିକାର ହେଲେ ପୂର୍ବତନ ରାଷ୍ଟ୍ରପତି ରାମନାଥ କୋବିନ୍ଦ । ସମ୍ବିଧାନକୁ ପଛରେ ପକାଇ ବିଜେପି ଏଜେଣ୍ଡା ପୂରଣ କରିଥିବା ଅଭିଯୋଗ କରି ସମାଲୋଚନା କଲେ ମେହେବୁବା ମୁଫତି । ଅଧିକ ପଢନ୍ତୁ

ନୂଆଦିଲ୍ଲୀ: ନୂତନ ରାଷ୍ଟ୍ରପତି ଦାୟିତ୍ବ ଗ୍ରହଣ କରିବା ସହ ଆଜି ଔପଚାରିକ ଭାବେ ଶେଷ ହୋଇଛି ପୂର୍ବତନ ରାଷ୍ଟ୍ରପତି ରାମନାଥ କୋବିନ୍ଦଙ୍କ କାର୍ଯ୍ୟକାଳ । ତେବେ କାର୍ଯ୍ୟକାଳ ଶେଷ ହେବା କ୍ଷଣିକ ପରେ ପୂର୍ବତନ ରାଷ୍ଟ୍ରପତି କୋବିନ୍ଦଙ୍କୁ ରାଜନୈତିକ ସମାଲୋଚନାର ଶିକାର ହେବାକୁ ପଡିଛି । ଜମ୍ମୁ କାଶ୍ମୀରର ପୂର୍ବତନ ମୁଖ୍ୟମନ୍ତ୍ରୀ ତଥା ପିଡିପି ମୁଖ୍ୟ ମେହେବୁବା ମୁଫତି କୋବିନ୍ଦଙ୍କୁ କାର୍ଯ୍ୟକାଳ ମଧ୍ୟରେ ସାମ୍ବିଧାନିକ ମୂଲ୍ୟବୋଧ ଭୁଲି ବିଜେପିର ଏଜେଣ୍ଡା ପୂରଣ କରିଥିବା ଭଳି ସଙ୍ଗୀନ ଅଭିଯୋଗ ସହ ସମାଲୋଚନା କରି ଟ୍ବିଟ କରିଛନ୍ତି ।

ମୁଫତି କହିଛନ୍ତି, ‘‘ବିଦାୟୀ ରାଷ୍ଟ୍ରପତି ଏମିତି ଏକ ପଦାଙ୍କ ଛାଡି ଯାଇଛନ୍ତି, ଯେଉଁଥିରେ ଭାରତର ସମ୍ବିଧାନକୁ ଚୂର୍ଣ୍ଣ କରାଯାଇଛି । ରାଷ୍ଟ୍ରପତି ରାଜନୈତିକ ଉଦ୍ଦେଶ୍ୟରେ ଶାସକ ବିଜେପି ଦ୍ବାରା ବ୍ୟବହୃତ ହୋଇଛନ୍ତି । ଅନୁଚ୍ଛେଦ-୩୭୦ ଉଚ୍ଛେଦ ହେଉ, ନାଗରିକତ୍ବ ସଂଶୋଧନ ଆଇନ (CAA) ଲାଗୁ, କିମ୍ବା ସଂଖ୍ୟାଲଘୁ ଓ ଦଳିତଙ୍କୁ ଟାର୍ଗେଟ କରାଯିବା ପରି ପ୍ରସଙ୍ଗରେ ସେ ଭାରତୀୟ ସମ୍ବିଧାନର ମସସ୍ତ ମୂଲ୍ୟବୋଧକୁ ଭୁଲି ଯାଇ ବିଜେପିର ଏଜେଣ୍ଡାକୁ ପୂରଣ କରିଛନ୍ତି ।’’

ବ୍ୟୁରୋ ରିପୋର୍ଟ, ଇଟିଭି ଭାରତ