ନୂଆଦିଲ୍ଲୀ:ଆମେରିକା ପକ୍ଷରୁ ଦିନକ ତଳେ ବିଭିନ୍ନ ଦେଶର ଧାର୍ମିକ ସ୍ବାଧୀନତା ଉପରେ ପ୍ରସ୍ତୁତ ଏକ ରିପୋର୍ଟ ପ୍ରକାଶ ପାଇଥିଲା । ଏଥିରେ ଅଭିଯୋଗ କରାଯାଇଥିଲା ଯେ, ଭାରତରେ ଧାର୍ମିକ ଅଧିକାରର ଉଲ୍ଲଂଘନ ହେଉଛି । ମୁସଲିମ ଓ ଖ୍ରୀଷ୍ଟିଆନ ଭଳି ସଂଖ୍ୟାଲଘୁ ସମ୍ପ୍ରଦାୟ ଉପରେ ଆକ୍ରମଣ କରାଯାଉଛି । ମଙ୍ଗଳବାର ଆମେରିକାର ଏହି ସଦ୍ୟତମ ରିପୋର୍ଟକୁ ଭାରତ ମିଥ୍ୟା ଓ ପକ୍ଷପାତପୂର୍ଣ୍ଣ କହି ଦୃଢ ଭାବରେ ଖଣ୍ଡନ କରିଛି । ବୈଦେଶିକ ବ୍ୟାପାର ମନ୍ତ୍ରଣାଳୟର ମୁଖପାତ୍ର ଅରିନ୍ଦମ ବାଗଚୀ କହିଛନ୍ତି, ମନଗଢା ତଥ୍ୟ ଏବଂ ଭୁଲ୍ ବୁଝାମଣା ଆଧାରରେ ରିପୋର୍ଟ ପ୍ରସ୍ତୁତ କରିଯାଇଛି । ରିପୋର୍ଟରେ କିଛି ଆମେରିକୀୟ ଅଧିକାରୀଙ୍କ ଭାରତ ବିରୋଧରେ ଉଦ୍ଦେଶ୍ୟମୂଳକ ଓ ପକ୍ଷପାତପୂର୍ଣ୍ଣ ଟିପ୍ପଣୀ ଏହାର ବିଶ୍ବସନୀୟତା କମାଇଛି ।
ବାଗଚୀ ଆହୁରିମଧ୍ୟ କହିଛନ୍ତି, "ଆମେରିକା ସହ ରହିଥିବା ସହାଭାଗିତାକୁ ଭାରତ ସଦାସର୍ବଦା ଗୁରୁତ୍ବ ଦେଇଆସିଛି ଏବଂ ଆଗକୁ ମଧ୍ୟ ବିଭିନ୍ନ ପ୍ରସଙ୍ଗରେ ଖୋଲାଖୋଲି ଆଲୋଚନା ଜାରି ରଖିବ ।" କହିରଖୁଛୁ କି, ଗତ ସୋମବାର ଦିନ ଆମେରିକାର ବୈଦେଶିକ ବିଭାଗ ପକ୍ଷରୁ ଅନ୍ତର୍ଜାତୀୟ ଧାର୍ମିକ ଅଧିକାର ଉପରେ ପ୍ରସ୍ତୁତ ଉକ୍ତ ରିପୋର୍ଟ ପ୍ରକାଶିତ ହୋଇଥିଲା । ବୈଦେଶିକ ସଚିବ ଆନ୍ଥୋନି ବ୍ଲିଙ୍କେନ ଏହାକୁ ପ୍ରକାଶ କରି ଗଣମାଧ୍ୟମକୁ କହିଥିଲେ ଯେ, ଏହି ରିପୋର୍ଟରେ ବିଶ୍ବର ୨୦୦ଟି ରାଷ୍ଟ୍ରରେ ଧାର୍ମିକ ସ୍ବାଧୀନତାର ସ୍ଥିତି ସମ୍ପର୍କରେ ଏକ ତଥ୍ୟ ସମ୍ବଳିତ ବିସ୍ତୃତ ଚିତ୍ର ପ୍ରଦାନ କରାଯାଇଛି । କିନ୍ତୁ ନିଜ ମନ୍ତବ୍ୟରେ ସେ ଭାରତ ସମ୍ପର୍କରେ କୌଣସି ବର୍ଣ୍ଣନା କରିନଥିଲେ ।