ନୂଆଦିଲ୍ଲୀ: ସୁପ୍ରିମକୋର୍ଟଙ୍କ ହସ୍ତକ୍ଷେପ ପରେ ଦିଲ୍ଲୀର ମେୟର ଏବଂ ଡେପୁଟି ମେୟର ନିର୍ବାଚନ ଶାନ୍ତିପୂର୍ଣ୍ଣ ଭାବେ ଶେଷ ହୋଇଥିଲା । ବହୁମତ ହାସଲ କରିଥିବା ଆମ ଆଦମୀ ପାର୍ଟିର ନେତ୍ରୀ ଶେଲି ଓବରୟ ଦିଲ୍ଲୀର ନୂତନ ମେୟର ଭାବରେ ନିର୍ବାଚିତ ହୋଇଥିଲେ । ତେବେ ବୁଧବାର ସନ୍ଧ୍ୟାରେ ୬ ସଦସ୍ୟଙ୍କ ଷ୍ଟାଣ୍ଡିଂ କମିଟିର ସଦସ୍ୟ ନିର୍ବାଚନ ସମୟରେ ଗୃହରେ ଉତ୍ତେଜନା ପରିସ୍ଥିତି ସୃଷ୍ଟି ହୋଇଥିଲା । ପରିସ୍ଥିତି ଏଭଳି ହୋଇଥିବା ଯେ, ସନ୍ଧ୍ୟାରୁ ଆରମ୍ଭ ହୋଇଥିବା ଏହି ନିର୍ବାଚନ ପ୍ରକ୍ରିୟା ବିଳମ୍ବିତ ରାତି ଯାଏଁ ଚାଲିଥିଲା । ଏହା ନିଗମ ଇତିହାସରେ ପ୍ରଥମ ଘଟଣା ଅଟେ ।
ଆପ ଏବଂ ବିଜେପି ସଦସ୍ୟଙ୍କ ମଧ୍ୟରୋ ଗଣ୍ଡଗୋଳ ହୋଇଥିଲା । ପରସ୍ପର ସହ ଚିତ୍କାର କରି ଝଗଡା, ପାଣି ବୋତଲ ଫିଙ୍ଗିବା, ବାଲାଟ ବକ୍ସ ଫିଙ୍ଗାଫିଙ୍ଗି ହୋଇଥିଲା । ଏହା ନିଗମ ମୁଖ୍ୟାଳୟ ନିର୍ବାଚନରେ ପ୍ରଥମ ଥର ପାଇଁ ହୋଇଥିବା ଜଣାପଡିଛି ।
ସୂଚନାଅନୁସାରେ, ମେୟର ଏବଂ ଡେପୁଟି ମେୟର ନିର୍ବାଚନ ପରେ ଷ୍ଟାଣ୍ଡିଙ୍ଗ କମିଟି ସଦସ୍ୟ ନିର୍ବାଚନ ଆରମ୍ଭ ହୋଇଥିଲା । ତେବେ ଏହି ସମୟରେ ଦିଲ୍ଲୀର ନବନିର୍ବାଚିତ ମେୟର ଶେଲି ଓବରୟ କାଉନସିଲରମାନଙ୍କୁ ମୋବାଇଲ ନେଇ ଭିତରକୁ ଯିବାକୁ କହିଥିଲେ । କିନ୍ତୁ ଏହାକୁ ବିଜେପି କାଉନସିଲର ଶିଖା ରାୟ ମତଦାନ ବୁଥକୁ ମୋବାଇଲ ନେବାକୁ ବାରଣ କରିଥିଲେ । ଏହାପରେ ଉଭୟ ପାର୍ଟି ପକ୍ଷରୁ ପ୍ରତିବାଦ କରିବା ସହ ହୋହଲ୍ଲା ଆରମ୍ଭ ହୋଇଥିଲା । ଏହି କାରଣକୁ 1 ଘଣ୍ଟା ମଧ୍ୟରେ ଦୁଇଥର ମତଦାନ କାର୍ଯ୍ୟ ସ୍ଥଗିତ ରଖାଯାଇଥିଲା ।