ନୂଆଦିଲ୍ଲୀ: ରାଜଧାନୀ ଦିଲ୍ଲୀର ଚାନ୍ଦିନୀ ଚୌକ ସ୍ଥିତ ଭାଗୀରଥ ପ୍ୟାଲେସ ମାର୍କେଟରେ ଭୟାବହ ଅଗ୍ନିକାଣ୍ଡ ଘଟିଛି(Massive fire breaks out in Chandni Chowk market) । ଗତକାଲି ରାତିରେ ଏଠାରେ ଅଗ୍ନିକାଣ୍ଡ ଘଟିଥିବା ବେଳେ ଆଜି ସକାଳେ ଯାଏଁ ନିଆଁ ଜଳୁଥିବାର ଦେଖାଯାଇଛି । ଏହି ମାର୍କେଟରେ ଇଲେକ୍ଟ୍ରୋନିକ୍ସ ଦୋକାନ ଗୁଡିକ ରହିଥିଲା । ନିଆଁରେ ଅନେକ ଦୋକାନ ଜଳିପୋଡି ପାଉଁଶ ହୋଇଯାଇଥିବା ବେଳେ କୋଟି କୋଟି ଟଙ୍କାର କ୍ଷୟକ୍ଷତି ହୋଇଛି । ମାତ୍ର ଅଗ୍ନିକାଣ୍ଡରେ କାହାର ଜୀବନହାନି ହୋଇନାହିଁ । ନିଆଁ ଲିଭା କାର୍ଯ୍ୟରେ ୪୦ ଦମକଳ ଗାଡି ନିୟୋଜିତ ହୋଇଛନ୍ତି । ଯଦ୍ବାରା ବର୍ତ୍ତମାନ ନିଆଁକୁ ଆୟତ୍ତ କରାଯାଇଥିବା ସୂଚନା ମିଳିଛି ।
ଏହି ଅଗ୍ନିକାଣ୍ଡ ସମ୍ପର୍କରେ ଖବର ପାଇ ପୂର୍ବତନ ସ୍ବାସ୍ଥ୍ୟମନ୍ତ୍ରୀ ହର୍ଷବର୍ଦ୍ଧନ(Former Health Minister Dr Harsh Vardhan) ଆଜି ସକାଳେ ଘଟଣାସ୍ଥଳରେ ପହଞ୍ଚି ସ୍ଥିତି ଅନୁଧ୍ୟାନ କରିଛନ୍ତି । ସେ କହିଛନ୍ତି, ନିଆଁ ଲାଗିଥିବା ମୁଖ୍ୟ ବିଲ୍ଡିଂର ଦୁଇଟି ମହଲା ସମ୍ପୂର୍ଣ୍ଣ ନଷ୍ଟ ହୋଇଯାଇଛି । ହେଲେ ଏଥିରେ କେହି ମୃତାହତ ହୋଇନାହାନ୍ତି ।