ନୂଆଦିଲ୍ଲୀ/ଲକ୍ଷ୍ନୌ: ଜ୍ଞାନବ୍ୟାପୀ ମସଜିଦ୍ କମ୍ପ୍ଲେକ୍ସରେ ଭାରତୀୟ ପ୍ରତ୍ନତାତ୍ବିକ ବିଭାଗ (ASI) ଦ୍ବାରା ସର୍ଭେକୁ ଆହ୍ଲାବାଦ ହାଇକୋର୍ଟ ଆଜି ଅନୁମତି ଦେଇଛନ୍ତି । ଏହାର ମାତ୍ର କେଇ ଘଣ୍ଟା ମଧ୍ୟରେ ପ୍ରତିପକ୍ଷ ଇନ୍ତିଜାମିଆ କମିଟି ଏହି ରାୟକୁ ସୁପ୍ରିମକୋର୍ଟରେ ଚ୍ୟାଲେଞ୍ଜ କରିଛି । ଆହ୍ଲାବାଦ ହାଇକୋର୍ଟଙ୍କ ଏହି ରାୟ ଉପରେ ତୁରନ୍ତ ସ୍ଥଗିତାଦେଶ ଜାରି କରିବା ପାଇଁ ପିଟିସନରେ ଦର୍ଶାଇଛି ମୁସଲିମ ପକ୍ଷ । ଆଜି ମଧ୍ୟାହ୍ନରେ ଆହ୍ଲାବାଦ କୋର୍ଟ ଏହି ସର୍ଭେକୁ ଅନୁମତି ଦେଇ ରାୟ ପ୍ରକାଶ କରିଥିଲେ । କିଛି ଦିନ ପୂର୍ବରୁ ବାରାଣାସୀ ଜିଲ୍ଲା କୋର୍ଟ ଦେଇଥିବା ସର୍ଭେ ଅନୁମତିକୁ ବୈଧ ଦର୍ଶାଇବା ସହ ଏହାକୁ କାଏମ ରଖିଥିଲେ ହାଇକୋର୍ଟ ।
ଆଜି ଶୁଣାଣିରେ କୋର୍ଟ କହିଥିଲେ, ମସଜିଦ କମ୍ପଲେକ୍ସରେ ଏଏସଆଇ ସର୍ଭେ କରାଯିବା ଜରୁରୀ । କିଛି ସର୍ତ୍ତ ଆଧାରରେ ଏହି ସର୍ଭେକୁ କାର୍ଯ୍ୟକାରୀ କରାଯିବାର ଆବଶ୍ୟକତା ରହିଛି । ଏହାପୂର୍ବରୁ ଜୁଲାଇ ୨୧ ତାରିଖରେ ବାରାଣାସୀ ଜିଲ୍ଲା କୋର୍ଟ ବିଜ୍ଞାନଭିତ୍ତିକ ସର୍ବେକ୍ଷଣ ପାଇଁ ପ୍ରଥମେ ଅନୁମତି ଦେଇଥିଲେ । ହେଲେ ଏହାକୁ ଚ୍ୟାଲେଞ୍ଜ କରି ସର୍ବୋଚ୍ଚ କୋର୍ଟରେ ପହଞ୍ଚିଥିଲା ମୁସଲିମ ପକ୍ଷ । ସାଇନଟିଫିକ ସର୍ଭେ ହେବା ଫଳରେ ମସଜିଦ ଢାଞ୍ଚା କ୍ଷତିଗ୍ରସ୍ତ ହେବା ନେଇ ପିଟିସନରେ ଦର୍ଶାଇଥିଲା ଇନ୍ତିଜାମିଆ କମିଟି ।