ଜୟପୁର(ରାଜସ୍ଥାନ): ରାଜସ୍ଥାନ ଭରତପୁର ଜିଲ୍ଲାରେ ଭୟଙ୍କର ସଡକ ଦୁର୍ଘଟଣା । ରାସ୍ତାକଡରେ ଛିଡା ହୋଇଥିବା ଯାତ୍ରୀବାହୀ ବସ୍କୁ ଧକ୍କା ଦେଲା ଟ୍ରକ । ଦୁର୍ଘଟଣାରେ ଚାଲିଗଲା ୧୧ ଜୀବନ । ଆଜି(ବୁଧବାର) ସକାଳେ ଜୟପୁର-ଆଗ୍ରା ଜାତୀୟ ରାଜପଥର ହନ୍ତରା ଗ୍ରାମ ନିକଟରେ ଏହି ମର୍ମନ୍ତୁଦ ଦୁର୍ଘଟଣା ଘଟିଛି । ଏଥିରେ ୧୨ ଜଣ ଯାତ୍ରୀ ଗୁରୁତର ଆହତ ହୋଇଛନ୍ତି । ଖବର ପାଇ ପୋଲିସ ଘଟଣାସ୍ଥଳରେ ପହଞ୍ଚି ଆହତମାନଙ୍କୁ ଉଦ୍ଧାର କରି ଆରବିଏମ ଜିଲ୍ଲା ହସ୍ପିଟାଲରେ ଭର୍ତ୍ତି କରିଛି ।
ସୂଚନା ଅନୁଯାୟୀ, ଯାତ୍ରୀବାହୀ ବସ୍ଟି ଗୁଜୁରାଟରୁ ଉତ୍ତର ପ୍ରଦେଶର ମଥୁରା ଅଭିମୁଖେ ଯାଉଥିଲା । ଏଥିରେ ୨୦ରୁ ଅଧିକ ଯାତ୍ରୀ ଥିଲେ । ସକାଳ ପ୍ରାୟ ୪ଟା ବେଳେ ବସର ଟାୟାର ଫାଟି ଯିବାରୁ ଏହା ଜୟପୁର-ଆଗ୍ରା ଜାତୀୟ ରାଜପଥ କଡରେ ଛିଡା ହୋଇଥିଲା । ଏତିକି ବେଳେ ଜୟପୁର ଆଡୁ ଦ୍ରୁତଗତିରେ ଆସୁଥିବା ଏକ ଟ୍ରକ ବସ୍କୁ ପଛ ପଟୁ ଜୋରରେ ଧକ୍କା ଦେଇଥିଲା । ଦୁର୍ଘଟଣା ଏତେ ଭୟଙ୍କର ଥିଲା ଯେ, ବସ୍ ୩୦ ମିଟର ଯାଏଁ ଘୋଷାଡି ହୋଇଯାଇଥିଲା । ଏହି ମର୍ମନ୍ତୁଦ ଦୁର୍ଘଟଣାରେ ୧୧ ଜଣ ଯାତ୍ରୀଙ୍କ ଘଟଣାସ୍ଥଳରେ ମୃତ୍ୟୁ ହୋଇଥିବା ବେଳେ ୧୨ ଜଣ ଗୁରୁତର ଆହତ ହୋଇଛନ୍ତି । ମୃତକଙ୍କ ମଧ୍ୟରେ ୬ ଜଣ ମହିଳା ଓ ୫ ଜଣ ପୁରୁଷ ଥିବା ଜଣାପଡିଛି । ସେମାନେ ଅନ୍ନୁ, ନନ୍ଦରାମ, ଲଲ୍ଲୁ, ଭରତ, ଲାଲ ଭାଇ, ଅମ୍ବାବେନ, କମ୍ମୁବେନ, ରାମୁବେନ, ମଧୁବେନ, ଅଞ୍ଜୁବେନ ଓ ମଧୁବେନ ବୋଲି ପରିଚୟ ମିଳିଛି ।
ଏହାମଧ୍ୟ ପଢନ୍ତୁ: Rajasthan: ଖାଟୁ ଶ୍ୟାମ ମନ୍ଦିରରୁ ଫେରୁଥିଲେ, ଦୁର୍ଘଟଣାରେ ଚାଲିଗଲା 6 ଜୀବନ