ନୂଆଦିଲ୍ଲୀ:ଦିଲ୍ଲୀ ଅବକାରୀ ନୀତି ଦୁର୍ନୀତି ମାମଲାରେ ଜେଲରେ ଥିବା ପୂର୍ବତନ ଉପମୁଖ୍ୟମନ୍ତ୍ରୀ ମନୀଷ ସିସୋଦିଆ ପ୍ରଧାନମନ୍ତ୍ରୀ ମୋଦିଙ୍କ ଶିକ୍ଷାଗତ ଯୋଗ୍ୟତା ଉପରେ ପ୍ରଶ୍ନ ଉଠାଇଛନ୍ତି । ତିହାର ଜେଲରେ ଥାଇ ଆପ୍ ନେତା ମୋଦିଙ୍କ ଉଦ୍ଦେଶ୍ୟରେ ଏକ ଚିଠି ଲେଖିଛନ୍ତି । ଯେଉଁଥିରେ ସେ ଦେଶବାସୀଙ୍କୁ ସମ୍ବୋଧିତ କରି ଲେଖିଛନ୍ତି, ପ୍ରଧାନମନ୍ତ୍ରୀ ମୋଦିଙ୍କ ଶିକ୍ଷାଗତ ଯୋଗ୍ୟତା ଦେଶ ପାଇଁ ବିପଦ । ମୋଦି ଶିକ୍ଷାର ମହତ୍ତ୍ବ ଜାଣନ୍ତି ନାହିଁ । ସେ ବିଜ୍ଞାନ ବୁଝନ୍ତି ନାହିଁ । ଦେଶର ପ୍ରଗତି ପାଇଁ ଶିକ୍ଷିତ ପ୍ରଧାନମନ୍ତ୍ରୀ ଦରକାର ବୋଲି ସିସୋଦିଆ କହିଛନ୍ତି ।
ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲ ଏହି ଚିଠିକୁ ଟ୍ବିଟ୍ କରିଛନ୍ତି । ଏଥିରେ କୁହାଯାଇଛି, ପ୍ରଧାନମନ୍ତ୍ରୀ କମ୍ ଶିକ୍ଷିତ ହେବା ଦେଶ ପାଇଁ ଅତ୍ୟନ୍ତ ବିପଦଜ୍ଜନକ । ମୋଦି ଶିକ୍ଷାର ମହତ୍ତ୍ବ ବୁଝନ୍ତି ନାହିଁ । ଗତ କିଛି ବର୍ଷ ଭିତରେ ଦେଶରେ ୬୦ ହଜାର ସ୍କୁଲ ବନ୍ଦ କରାଯାଇଛି । ଭାରତର ପ୍ରଗତି ପାଇଁ ପାଠପଢା ପ୍ରଧାନମନ୍ତ୍ରୀ ଜରୁରୀ । ଏକବିଂଶ ଶତାବ୍ଦୀରେ ଯେଉଁଠି ବିଶ୍ବ ବିଜ୍ଞାନ, ପ୍ରଯୁକ୍ତିବିଦ୍ୟା, ଆର୍ଟିଫିସିଆଲ ଇଣ୍ଟେଲିଜିଏନ୍ସ(କୃତ୍ରିମ ବୁଦ୍ଧିମତା) କ୍ଷେତ୍ରରେ ଦ୍ରୁତ ପ୍ରଗତି କରୁଛି ସେଠାରେ ଆମ ଦେଶର ପ୍ରଧାନମନ୍ତ୍ରୀ ଡ୍ରେନରୁ ବାହାରୁଥିବା ଗ୍ୟାସରେ ଚା' ଏବଂ ସ୍ନାକ୍ସ ତିଆରି କରିବା କଥା କହୁଛନ୍ତି ।