ଦ୍ବିତୀୟ ଦିନରେ ନ୍ୟାୟ ଯାତ୍ରା: ପଦଯାତ୍ରା କଲେ ରାହୁଲ, ନାଗାଲାଣ୍ଡରେ ରାତ୍ରୀ ଯାପନ

Rahul Gandhis Bharat Jodo Nyay Yatra: ଦ୍ବିତୀୟ ଦିନରେ କଂଗ୍ରେସର ଭାରତ ଯୋଡ଼ୋ ନ୍ୟାୟ ଯାତ୍ରା । ମଣିପୁରରେ ଦ୍ବିତୀୟ ଦିନ ଯାତ୍ରା ପରେ ନାଗାଲାଣ୍ଡରେ ରାତ୍ରୀ ଯାପନ କରିବେ ରାହୁଲ ଗାନ୍ଧୀ । ଅଧିକ ପଢ଼ନ୍ତୁ,

ମଣିପୁର: କଂଗ୍ରେସ ନେତା ରାହୁଲ ଗାନ୍ଧୀଙ୍କ ନେତୃତ୍ବରେ କଂଗ୍ରେସର ଭାରତ ଯୋଡ଼ୋ ନ୍ୟାୟ ଯାତ୍ରାର ଆଜି ଦ୍ବିତୀୟ ଦିନ । ଆଜି (ସୋମବାର) ସକାଳେ ପଶ୍ଚିମ ଇମ୍ଫାଲରୁ ଯାତ୍ରା ଆରମ୍ଭ ହୋଇଥିଲା। ଆଜି ରାହୁଲ ଗାନ୍ଧୀ ପଦଯାତ୍ରା କରିଛନ୍ତି। ରାହୁଲଙ୍କ ଯାତ୍ରାରେ ସାମିଲ ହୋଇଛନ୍ତି ଶହ ଶହ ଲୋକ । ଲୋକେ ରାସ୍ତାର ଦୁଇ କଡ଼ରେ ଛିଡ଼ା ହୋଇ ରାହୁଲଙ୍କୁ ସ୍ବାଗତ କରିଛନ୍ତି । ଆଜି ନ୍ୟାୟ ଯାତ୍ରା ମଣିପୁର ଅତିକ୍ରମ କରି ନାଗାଲାଣ୍ଡରେ ପହଞ୍ଚିବା ପରେ ସେଠାରେ ରାତ୍ରୀ ଯାପନ କରିବେ ରାହୁଲ ଗାନ୍ଧୀ ।

ଆଜି ସକାଳ ୭ଟା ୩୦ ମିନିଟରେ ଆରମ୍ଭ ହୋଇଥିଲା ଭାରତ ଯୋଡ଼ୋ ନ୍ୟାୟ ଯାତ୍ରାର ଦ୍ବିତୀୟ ଦିନ । ସେବାଦଳର ଉପସ୍ଥିତିରେ ମଣିପୁର ପିସିସି ସଭାପତି କେଇଶମ ମେଘାଚନ୍ଦ୍ର ପତାକା ଉତ୍ତୋଳନ କରିଥିଲେ। ପରେ ଯାତ୍ରା ସେକମାଇ, କାଙ୍ଗପୋକପି ଏବଂ ସେନାପତି ଦେଇ ନାଗାଲାଣ୍ଡରେ ପହଞ୍ଚିବ । କଂଗ୍ରେସର ଭାରତ ଯୋଡ଼ୋ ନ୍ୟାୟ ଯାତ୍ରାର ଦ୍ବିତୀୟ ଦିନରେ ଦଳର ସାଧାରଣ ସମ୍ପାଦକ ଜୟରାମ ରମେଶ କହିଛନ୍ତି, "ଲୋକମାନେ ଆମକୁ ପଚାରୁଛନ୍ତି କାହିଁକି ପ୍ରଧାନମନ୍ତ୍ରୀ ମଣିପୁର ଗସ୍ତ କରିନାହାନ୍ତି ? ସମସ୍ତେ ଚାହାନ୍ତି ଯେ ରାହୁଲ ଗାନ୍ଧୀ ସଂସଦରେ ଏହି ପ୍ରସଙ୍ଗ ଉଠାନ୍ତୁ ଏବଂ ପ୍ରଧାନମନ୍ତ୍ରୀଙ୍କୁ ପଚାରନ୍ତୁ ? ପ୍ରଧାନମନ୍ତ୍ରୀ ମୋଦି ମଣିପୁରକୁ ଆସି ଆମକୁ ଭେଟନ୍ତୁ । "

ରାହୁଲଙ୍କ ନ୍ୟାୟ ଯାତ୍ରା: ମଣିପୁରର ଥଉବାଲରୁ ଗତକାଲି(ଜାନୁଆରୀ ୧୪) ଆରମ୍ଭ ହୋଇଥିଲା କଂଗ୍ରେସର ଭାରତ ଯୋଡ଼ୋ ଯାତ୍ରା । କଂଗ୍ରେସ ନେତା ରାହୁଲ ଗାନ୍ଧୀଙ୍କ ନେତୃତ୍ବରେ ଆରମ୍ଭ ହୋଇଥିବା ଏହି ଯାତ୍ରା ମୋଟ୍ ୬୭୦୦ କିଲୋମିଟର ଅତିକ୍ରମ କରିବ । ୬୭ ଦିନରେ ୧୫ଟି ରାଜ୍ୟର ୧୧୦ ଜିଲ୍ଲା ପରିଭ୍ରମଣ କରିବ । ଏଥିରେ ରହିଛି ଓଡ଼ିଶାର ୪ଟି ଜିଲ୍ଲା । ଓଡ଼ିଶାରେ ୪ ଦିନରେ ପାଖାପାଖି ୪ ଶହ କିଲୋମିଟର ଯାତ୍ରା କରିବେ ରାହୁଲ ଗାନ୍ଧି । ନ୍ୟାୟ ଯାତ୍ରା ମଣିପୁରର ଇମ୍ଫାଲରୁ ଆରମ୍ଭ ହୋଇଥିବା ବେଳେ, ଏହା ନାଗାଲାଣ୍ଡ, ଆସାମ, ମେଘାଳୟ, ଅରୁଣାଚଳ ପ୍ରଦେଶ , ପଶ୍ଚିମବଙ୍ଗ, ବିହାର, ଝାଡ଼ଖଣ୍ଡ, ଓଡିଶା, ଉତ୍ତର ପ୍ରଦେଶ, ଛତିଶଗଡ଼, ରାଜସ୍ଥାନ, ଗୁଜୁରାଟ ଦେଇ ମହାରାଷ୍ଟ୍ରର ମୁମ୍ବାଇରେ ଏହି ଯାତ୍ରା ସମାପ୍ତ ହେବ ।

ବ୍ୟୁରୋ ରିପୋର୍ଟ, ଇଟିଭି ଭାରତ