କୋଲକାତା: ଦେଶରେ କୋରୋନା ସଂକ୍ରମଣ କ୍ରମଶଃ ବୃଦ୍ଧି ପାଇବାରେ ଲାଗିଛି । ତେଣୁ ସମସ୍ତ ରାଜ୍ୟରେ କୋଭିଡ ଟେଷ୍ଟ ଓ ଟୀକାକରଣକୁ ଗୁରୁତ୍ବ ଦିଆଯାଉଛି । ପଶ୍ଚିମବଙ୍ଗରେ ଗଙ୍ଗାସାଗର ମେଳା ନେଇ କୋଭିଡ ଟେଷ୍ଟକୁ ବ୍ୟାପକ କରାଯାଇଛି । ଗଙ୍ଗାସାଗର ମେଳାକୁ ବାହାରୁ ଆସୁଥିବା ସାଧୁ ଓ ତୀର୍ଥଯାତ୍ରୀଙ୍କ ପାଇଁ କୋଭିଡ ଟେଷ୍ଟର ବ୍ୟବସ୍ଥା କରାଯାଇଛି ।
ଆସନ୍ତା ଜାନୁଆରୀ ୧୬ରେ ଗଙ୍ଗାସାଗର ମେଳା ଆରମ୍ଭ ହେବ । ଏଠାରେ ବହିଥିବା ଗଙ୍ଗା ନଦୀରେ ବୁଡ଼ ପକାଇବାକୁ ହଜାର ହଜାର ଭକ୍ତଙ୍କ ସମାଗମ ହୋଇଥାଏ । ତେଣୁ ସଂକ୍ରମଣକୁ ଦୃଷ୍ଟିରେ ରଖି ପଶ୍ଚିମବଙ୍ଗ ସରକାର ବ୍ୟାପକ ପଦକ୍ଷେପ ନେଇଛନ୍ତି । ସେନେଇ କୋଲକାତା ପୌରପାଳିକା ଅଞ୍ଚଳ ମାନଙ୍କରେ ସାନିଟାଇଜେସନ୍ ଏବଂ ଟୀକାକରଣ ଡ୍ରାଇଭ୍ ମଧ୍ୟ ଜୋରଦାର କରାଯାଇଛି । ଏହାସହ ପ୍ରଶାସନ ପକ୍ଷରୁ ସାଧୁ ଓ ତୀର୍ଥଯାତ୍ରୀଙ୍କୁ ଆଣ୍ଟିଜେନ ଟେଷ୍ଟ କରାଯାଉଛି । ରିପୋର୍ଟ ପଜିଟିଭ ଆସିଲେ, ସେମାନଙ୍କ ପାଇଁ ସଂଗରୋଧ କେନ୍ଦ୍ରର ବ୍ୟବସ୍ଥା ମଧ୍ୟ କରାଯାଇଛି ।