ଲକ୍ଷ୍ନୌ: ମଧ୍ୟପ୍ରଦେଶ ପରିସ୍ରାକାଣ୍ଡକୁ ନେଇ ସାରା ଦେଶରେ ହଇଚଇ ସୃଷ୍ଟି ହୋଇଥିଲା । ଏହି ଘଟଣାକୁ ଦିନ କେଇଟା ନପୁରୁଣୁ ଉତ୍ତର ପ୍ରଦେଶରୁ ଅନୁରୂପ ଘଟଣା ସାମ୍ନାକୁ ଆସିଛି । କିଛି ଦିନ ତଳେ ସୋନଭଦ୍ରରେ ଜଣେ ଦଳିତ ଯୁବକଙ୍କୁ ମାଡ ମାରି ଛେପ ଚଟାଇବାର ଭିଡିଓ ଭାଇରାଲ ହୋଇଥିଲା । ଏବେ ଆଉ ଜଣେ ଆଦିବାସୀ ଯୁବକଙ୍କ କାନରେ ପରିସ୍ରା କରାଯିବାର ଭିଡିଓ ଚର୍ଚ୍ଚାକୁ ଆସିଛି । ଭିଡିଓରେ ଜଣେ ଯୁବକ ଆଉ ଜଣେ ଯୁବକଙ୍କ କାନରେ ପରିସ୍ରା କରୁଥିବା ଦେଖାଯାଉଛି । ଘଟଣାଟି ୟୁପି ସୋନଭଦ୍ର ଜିଲ୍ଲା ଘଟିହଟା ଗ୍ରାମର ।
ଗତ ମଙ୍ଗଳବାର ଦିନ ଏହି ଅମାନବୀୟ ଘଟଣା ଘଟିଥିଲା । ମାମଲାରୁ ଯାହା ଜଣାପଡିଛି, ଦୁଇ ଯୁବକଙ୍କ ମଧ୍ୟରେ କୌଣସି ବିବାଦକୁ ନେଇ ଗଣ୍ଡଗୋଳ ପରେ ଜଣେ ଯୁବକ ଅନ୍ୟ ଜଣେ ଆଦିବାସୀ ଯୁବକଙ୍କ କାନରେ ପରିସ୍ରା କରିଥିଲା । ଏହିସହିତ ତାଙ୍କୁ ଅଶାଳୀନ ଭାଷାରେ ଗାଳିଗୁଲଜ କରୁଥିବା ମଧ୍ୟ ଶୁଣାଯାଇଛି । ଏହି ଭିଡିଓ ଭାଇରାଲ ହେବା ପରେ ସୋନଭଦ୍ର ଏସପି ଯଶବୀର ସିଂହ, ଅତିରିକ୍ତ ଏସପି କାଲୁ ସିଂହଙ୍କ ସମେତ ଅନ୍ୟ ପୋଲିସ ଅଧିକାରୀ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛନ୍ତି ।
ଏସପି ଯଶବୀର ସିଂ କହିଛନ୍ତି ଯେ, ପୀଡିତ ଯୁବକ ଥାନାରେ ଅଭିଯୋଗ କରିଛନ୍ତି ଏବଂ ଏନେଇ ଏକ ମାମଲା ରୁଜୁ କରାଯାଇଛି । ପୋଲିସ ଦୁଇ ଜଣଙ୍କୁ ହେପାଜତକୁ ନେଇଛି । ଗତ ୧୧ ତାରିଖରେ ଏହି ଘଟଣା ଘଟିଥିଲା । ପରିସ୍ରା କରିଥିବା ଯୁବକର ନାମ ଜବାହିର ପଟେଲ । ପୀଡିତ ଯୁବକ ଗୁଲାବ କୋଲଙ୍କ ସହ ପୂର୍ବରୁ ତାଙ୍କର ପରିଚୟ ଥିଲା । ଗତ ମଙ୍ଗଳବାର ଦିନ ଦୁହେଁ ଏକାଠି ମଦ ପିଇଥିଲେ ଏବଂ କୌଣସି କଥାକୁ ନେଇ ଉଭୟଙ୍କ ମଧ୍ୟରେ ପାଟିତୁଣ୍ଡ ହୋଇଥିଲା । ଏହାପରେ ଜବାହିର ତାଙ୍କ କାନରେ ପରିସ୍ରା କରିଥିଲେ । ଅତ୍ୟଧିକ ମଦ୍ୟପାନ କରିବା ଯୋଗୁଁ ସେହି ସମୟରେ ପୀଡିତ ଯୁବକ କିଛି ଜାଣିପାରି ନଥିଲେ ।