ମୁମ୍ବାଇ:ବିମାନରେ ବସି ହାଇଜାକ ବିଷୟରେ କଥା ହେଉଥିଲେ ଯାତ୍ରୀ । ବିମାନ ହାଇଜାକ ପାଇଁ ସବୁ ପ୍ଲାନ ସରିଛି ବୋଲି ଫୋନରେ ଅନ୍ୟ ଜଣକୁ କହୁଥିଲେ । ବିମାନ କର୍ମଚାରୀ ଏହା ଶୁଣିବା ପରେ ସମ୍ପୃକ୍ତ ଯାତ୍ରୀଙ୍କୁ ଗିରଫ କରାଯାଇଛି । ଭିସ୍ତାରା ଏୟାରଲାଇନ୍ସର ମୁମ୍ବାଇ-ଦିଲ୍ଲୀ ବିମାନରୁ ଏଭଳି ଘଟଣା ସାମ୍ନାକୁ ଆସିଛି । ଅଭିଯୁକ୍ତ ଯାତ୍ରୀ ହରିୟାଣାର ୨୩ ବର୍ଷୀୟ ଯୁବକ ରିତେଶ ଜୁନେଜା । ଗତ ଗୁରୁବାର ଦିନ ମୁମ୍ବାଇରୁ ଦିଲ୍ଲୀ ଅଭିମୁଖେ ଯାଉଥିବା ଥିବା ବିମାନରେ ବସି ରିତେଶ ଉଡାଣର ଠିକ୍ ପୂର୍ବରୁ ଫୋନରେ କାହା ସହିତ ହାଇଜାକ ପ୍ଲାନ ନେଇ କଥା ହୋଇଥିଲେ ।
ସୂଚନା ମୁତାବକ, ଗୁରୁବାର ସନ୍ଧ୍ୟା ସାଢେ ୬ଟା ସମୟରେ ଏହି ଘଟଣା ଘଟିଥିଲା । ମୁମ୍ବାଇ ସ୍ଥିତ ଛତ୍ରପତି ଶିବାଜୀ ମହାରାଜ ଅନ୍ତର୍ଜାତୀୟ ବିମାନ ବନ୍ଦରରୁ ଭିସ୍ତାରା ବିମାନ ସନ୍ଧ୍ୟା ୭ଟାରେ ଦିଲ୍ଲୀ ଅଭିମୁଖ ଉଡାଣ ଭରିଥିବା ଥିଲା । ସମସ୍ତ ଯାତ୍ରୀ ନିଜ ନିଜ ସିଟ୍ରେ ବସିଥିଲେ । କ୍ୟାବିନ କ୍ରୁ ମେମ୍ବର ନିଜ କାମରେ ବ୍ୟସ୍ତ ଥିଲେ । ଏତିକି ବେଳେ ୨୩ ବର୍ଷୀୟ ରିତେଶ ଫୋନରେ ଜଣଙ୍କୁ କହିଥିଲେ,''ଅହମ୍ମଦାବାଦ ଫ୍ଲାଇଟ ଉଡାଣ ଭରିବାକୁ ଯାଉଛି । କିଛି ବି ଅସୁବିଧା ହେଲେ ମତେ କଲ୍ କରିବ । ହାଇଜାକର ସବୁ ପ୍ଲାନିଂ ସରିଛି । ଚିନ୍ତା କରନାହିଁ ।'' ଏକଥା ଶୁଣି ଯୁବକଙ୍କ ପାଖରେ ବସିଥିବା ଯାତ୍ରୀ ଖୁବ୍ ଭୟଭୀତ ହୋଇ ନିଜ ସିଟ୍ରୁ ଉଠି ପଡିଥିଲେ । ଜଣେ କ୍ରୁ ମେମ୍ବରଙ୍କ କାନରେ ମଧ୍ୟ ହାଇଜାକ କଥା ପଡିଥିଲା ।