କୋଲକାତା: ଅନ୍ଧବିଶ୍ବାସରୁ ବର୍ବର କାଣ୍ଡ । ସନ୍ତାନ ପ୍ରାପ୍ତି ପାଇଁ ବଳିପଡିଲା ପଡିଶା ଘରର ନାବାଳିକା । ନର ବଳି ପରେ ବ୍ୟାଗରୁ ଉଦ୍ଧାର ହେଲା ନାବାଳିକାର ମୃତଦେହ । ଏଭଳି ଲୋମଟାଙ୍ଗୁରା ଘଟଣା ଘଟିଛି କୋଲକାତାର ତିଲଜଲାରେ । ତାନ୍ତ୍ରୀକର ଇସାରାରେ ବଶବର୍ତ୍ତୀ ହୋଇ ନାବାଳିକାକୁ ହତ୍ୟା ପରେ ଅଭିଯୁକ୍ତକୁ ଗିରଫ କରିଛି ପୋଲିସ । ଗିରଫ ବ୍ୟକ୍ତି ଜଣଙ୍କ ହେଉଛି ବିହାର ରାଜ୍ୟର ଆଲୋକ କୁମାର। ଗତ ରବିବାର ଏହି ଘଟଣା ଘଟିଥିବା ଜଣାପଡିଛି । ଅଭିଯୁକ୍ତକୁ ଗିରଫ ପରେ ସେ ନାବାଳିକାଙ୍କୁ ହତ୍ୟା କରିଥିବା ସ୍ବୀକାର କରିଛି । ସନ୍ତାନ ପ୍ରାପ୍ତି ଆଶାରେ ଜଣେ ତାନ୍ତ୍ରୀକ ତାଙ୍କୁ ନରବଳି ଦେବାକୁ କହିବାରୁ ସେ ନାବାଳିକା ଜଣଙ୍କୁ ହତ୍ୟା କରିଥିବା ପୋଲିସ ସମ୍ମୁଖରେ କହିଛି।
ପୋଲିସର ତଦନ୍ତ ପରେ ଜଣାପଡିଛି ଯେ, ଆଲୋକର ସ୍ତ୍ରୀ ତିନି ତିନି ଥର ଗର୍ଭଧାରଣ ପରେ ମଧ୍ୟ ସନ୍ତାନ ପ୍ରାପ୍ତି ହୋଇପାରୁନଥିଲେ । ଗର୍ଭ ନଷ୍ଟ ହେବାରୁ ସେ ଚିନ୍ତାରେ ଥିଲେ । ତେବେ କିପରି ସନ୍ତାନ ପ୍ରାପ୍ତି ହେବ ସେନେଇ ସେ ଜଣେ ତାନ୍ତ୍ରୀକଙ୍କ ସହ ଆଲୋଚନା କରିଥିଲେ । ଏହାପରେ ତାନ୍ତ୍ରୀକ ଜଣଙ୍କ ଏକ ସାତ ବର୍ଷର ଝିଅକୁ ହତ୍ୟା କଲେ ସନ୍ତାନ ପ୍ରାପ୍ତି ହେବ ବୋଲି କହିଥିଲେ । ଏପରି ଅନ୍ଧବିଶ୍ବାସରେ ବଶବର୍ତ୍ତୀ ହୋଇ ପଡିଶା ଘରର 7 ବର୍ଷର ନାବାଳିକାକୁ ଆଲୋକ ହତ୍ୟା କରିଥିବା ପୋଲିସ କହିଛି ।