ହାଇଦ୍ରାବାଦ:ରାଜଧାନୀ ଦିଲ୍ଲୀର ସୁଲତାନପୁରୀ କାର ଟ୍ରାଜେଡିକୁ ନେଇ ଦେଶରେ ଚର୍ଚ୍ଚା ଥମି ନଥିବା ବେଳେ ପୁଣି ଜଣେ ବ୍ୟକ୍ତିଙ୍କୁ ଏକ କାର ଘୋଷାଡି ନେଇଥିବା ଦେଖିବାକୁ ମିଳିଛି । ଅବଶ୍ୟ ବ୍ୟକ୍ତିଜଣଙ୍କ ଅଳ୍ପକେ ବର୍ତ୍ତି ଯାଇଛନ୍ତି । ପଶ୍ଚିମ ଦିଲ୍ଲୀର ରଜୌରୀ ଗାର୍ଡେନ ଏରିଆରେ ଏକ କାରର ବନେଟରେ ଜଣେ ବ୍ୟକ୍ତି ଓହଳି ହରିଥିବା ବେଳେ କାରଟି ତାଙ୍କୁ କିଛି ବାଟ ଘୋଷାଡି ନେଉଥିବାର ଭିଡିଓ ଏବେ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି । ଘଟଣାଟି ଗତ 12 ତାରିଖର ବୋଲି କୁହାଯାଉଛି । ତେବେ ସୋସିଆଲ ମିଡିଆରେ ଭିଡିଓଟି ଭାଇରାଲ ହେବା ପରେ ପୋଲିସ ମଧ୍ୟ କାର୍ଯ୍ୟାନୁଷ୍ଠାନ ମୋଡକୁ ଆସିଛି । କାର ଚଳାଉଥିବା ବ୍ୟକ୍ତିକୁ ଗିରଫ କରିଛି ।
ସ୍ଥାନୀୟ ପୋଲିସର ସୂଚନା ଅନୁସାରେ, ଜୟପ୍ରକାଶ ଓ ଇଶାନ୍ତ ନାମକ ଦୁଇ କାର ଚାଳକ ମଧ୍ୟରେ ଏକ ସାମାନ୍ୟ ଦୁର୍ଘଟଣା ଘଟିଥିଲା । ଉଭୟ ସାମାନ୍ୟ ଆହତ ମଧ୍ୟ ହୋଇଥିଲେ । ପରେ ଉଭୟଙ୍କ ମଧ୍ୟରେ ବଚସା ହେବା ସହ ଦୁହେଁ ମୁହାଁମୁହିଁ ହୋଇଥିଲେ । ଏଥିରେ ଉତ୍ତେଜିତ ହୋଇ ଇଶାନ୍ତ ଜୟପ୍ରକାଶଙ୍କୁ ଗାଡି ମଡାଇ ହତ୍ୟା କରିବାକୁ ଉଦ୍ୟମ କରିଥିଲା । ନିଶାନ୍ତ ଏକ ସୁଜୁକି ଡିଜାଏର କାର ଚଳାଉଥିବା ବେଳେ ଜୟପ୍ରକାଶଙ୍କୁ ଗାଡି ମଡାଇ ଦେଇଥିଲା । ଜୟପ୍ରକାଶ କାର ବନେଟରେ ଓହଳି ରହିଥିଲେ । କାରଟି ତାଙ୍କୁ ପ୍ରାୟ 200 ମିଟର ପର୍ଯ୍ୟନ୍ତ ଘୋଷାଡି ନେଇଥିଲା । ପରେ ଜୟପ୍ରକାଶ ଗାଡିରୁ ଖସି ପଡିଥିଲେ । ନିଶାନ୍ତ କାର ନେଇ ଘଟଣାସ୍ଥଳରୁ ଫେରାର ହୋଇଯାଇଥିଲା ।