ମୁମ୍ବାଇ: ଆଜି(ଗୁରୁବାର) ଠାରୁ ଆରମ୍ଭ ହେବାକୁ ଯାଉଥିବାବିରୋଧୀ ‘ଇଣ୍ଡିଆ’ ମେଣ୍ଟର ଦୁଇଦିନିଆ ସମ୍ମିଳନୀରେ ଯୋଗ ଦେବା ପାଇଁ ମୁମ୍ବାଇରେ ପହଞ୍ଚିଥିବା ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ ସୁପରଷ୍ଟାର ଅମିତାଭ ବଚ୍ଚନଙ୍କୁ ସାକ୍ଷାତ କରିଛନ୍ତି । ଆଜି ଅପରାହ୍ନରେ ମମତା ଅମିତାଭଙ୍କ ବାସଭବନ ଜଲସାରେ ପହଞ୍ଚି ତାଙ୍କୁ ଓ ତାଙ୍କ ପୁରା ପରିବାରକୁ ଭେଟିଛନ୍ତି । ମମତା ଅମିତାଭଙ୍କୁ ରାକ୍ଷୀ ବାନ୍ଧିବା ପାଇଁ ତାଙ୍କ ବାସଭବନରେ ପହଞ୍ଚିଥିବା ଚର୍ଚ୍ଚା ହେଉଥିବା ବେଳେ ଟିଏମ୍ସି ପକ୍ଷରୁ ସେପରି କିଛି ସ୍ପଷ୍ଟ କରାଯାଇନି ।
ଅମିତାଭଙ୍କ ପରିବାର ସଦସ୍ୟଙ୍କ ସହ ସେ ମଧ୍ୟ ସାକ୍ଷାତ କରିଛନ୍ତି । ଏହି ଅବସରରେ ସେ ଅମିତାଭ ତାଙ୍କ ପାଇଁ ଭାରତରତ୍ନ ବୋଲି ମମତା କହିଥିଲେ । ଅମିତାଭଙ୍କ ପୁରା ପରିବାର ମମତାଙ୍କ ସହ ନଜର ଆସିଥିଲେ । ପତ୍ନୀ ଜୟା ବଚ୍ଚନ, ପୁଅ ଅଭିଷେକ, ବୋହୂ ଐଶ୍ବର୍ଯ୍ୟା ଓ ନାତୁଣୀ ଆରାଧ୍ୟା ମଧ୍ୟ ମମତାଙ୍କୁ ସ୍ବାଗତ କରିଥିଲେ । ଜୟାଙ୍କୁ ମମତା ଆଲିଙ୍ଗନ କରିଥିଲେ ।
ପରେ ସେ ଉଦ୍ଧବ ଠାକରେଙ୍କ ବାସଭବନ ମାତୋଶ୍ରୀରେ ମଧ୍ୟ ପହଞ୍ଚିଥିଲେ । ସେଠାରେ ସେ ଉଦ୍ଧବ ଠାକରେ ଓ ତାଙ୍କ ପତ୍ନୀଙ୍କୁ ସାକ୍ଷାତ କରିବା ସହ ଉଦ୍ଧବଙ୍କୁ ରାକ୍ଷୀ ବାନ୍ଧିଛନ୍ତି । ମମତା ପହଞ୍ଚିବା ପରେ ଉଦ୍ଧବ ତାଙ୍କୁ ଫୁଲତୋଡ଼ା ଦେଇ ସ୍ବାଗତ କରିଥିଲେ । ରାକ୍ଷୀ ବାନ୍ଧିବା ସହ ଉଭୟଙ୍କ ମଧ୍ୟରେ ସ୍ବଳ୍ପକାଳୀନ ଆଲୋଚନା ମଧ୍ୟ ହେଇଥିଲା ।