ମୁମ୍ବାଇ: ମହାରାଷ୍ଟ୍ରରେ ଦିନକୁ ଦିନ କରୋନା ଗ୍ରାଫ ଉପରମୁହାଁ ହୋଇଛି । ଗତ ୨୪ ଘଣ୍ଟାରେ ୪୧ ହଜାର ୪୩୪ କରୋନା ଆକ୍ରାନ୍ତ ଚିହ୍ନଟ ହୋଇଛନ୍ତି । ଯାହା ୨୦୨୨ ବର୍ଷର ସର୍ବାଧିକ ଆକ୍ରାନ୍ତ ସଂଖ୍ୟା ପାର କରିଛି। ମହାରାଷ୍ଟ୍ରରେ ମୋଟ ଆକ୍ରାନ୍ତଙ୍କ ସଂଖ୍ୟା ୬୮,୭୫,୬୫୬କୁ ବୃଦ୍ଧି ପାଇଛି । ତେବେ ପୁଣି ୧୩ ଜଣଙ୍କ ଜୀବନ ନେଇଛି କୋରୋନା । ମହାରାଷ୍ଟ୍ରରେ 9,671ଜଣ ରୋଗୀ ସୁସ୍ଥ ହୋଇଥିବା ବେଳେ ବର୍ତ୍ତମାନ ସକ୍ରିୟ ମାମଲା ୧,୭୩,୨୩୮ରେ ପହଞ୍ଚିଛି।
ଦେଶରେ ହୁ ହୁ ହୋଇ କୋରୋନା ଓ ଓମିକ୍ରନ ସଂଖ୍ୟା ବୃଦ୍ଧି ପାଇବାରେ ଲାଗିଛି । ରାଜ୍ୟରେ ଆଜି ୧୩୩ ଓମିକ୍ରନ ଆକ୍ରାନ୍ତ ଚିହ୍ନଟ ହୋଇଛନ୍ତି । ଏହାକୁ ମିଶାଇ ମୋଟ ଓମିକ୍ରନ ସଂଖ୍ୟା ୧୦୦୦ରୁ ଅଧିକ ବୃଦ୍ଧି ପାଇଛି । ଏଥିମଧ୍ୟରୁ ମୁମ୍ବାଇରେ 566ଟି ଓମିକ୍ରନ ମାମଲା ଥିବାବେଳେ ପୁଣେରୁ ୨୦୧ ଆକ୍ରାନ୍ତ ଚିହ୍ନଟ ହୋଇଛନ୍ତି।
ରାଜ୍ୟରେ କରୋନା ସଂକ୍ରମଣ ବୃଦ୍ଧିକୁ ନେଇ କଟକଣା ଜାରି କରିଛନ୍ତି ମହାରାଷ୍ଟ୍ର ସରକାର । ସରକାରଙ୍କ ନିର୍ଦ୍ଦେଶ ଅନୁଯାୟୀ, ଜାନୁଆରୀ ୧୦ରୁ ମହାରାଷ୍ଟ୍ରରେ ରାତ୍ରିକାଳୀନ କର୍ଫ୍ୟୁ ଲାଗୁ କରାଯିବ । ରାତି ୧୧ରୁ ସକାଳ ୫ଟା ଯାଏ ନାଇଟ କର୍ଫ୍ୟୁକୁ କଡ଼ାକଡ଼ି ପାଳନ କରାଯିବ । ଏଥିସହ ଗୋଷ୍ଠୀ ସମୂହ ଉପରେ କଡ଼ା ନଜର ରଖିବାକୁ ସରକାର ନିର୍ଦ୍ଦେଶ ଦେଇଛନ୍ତି । ତେବେ ଆସନ୍ତା ଫେବୃଆରୀ ୧୫ ଯାଏ ରାଜ୍ୟର ସମସ୍ତ ସ୍କୁଲ, କଲେଜ ଓ କୋଚିଂ ସେଣ୍ଟରକୁ ବନ୍ଦ କରି ଦିଆଯାଇଛି । ନିୟମ ଉଲ୍ଲଂଘନ କଲେ ବ୍ୟକ୍ତିଙ୍କ ବିରୋଧରେ କଡ଼ା କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ସରକାର ନିର୍ଦ୍ଦେଶ ଦେଇଛନ୍ତି ।
ସରକାରଙ୍କ କଟକଣା ଅନୁଯାୟୀ ସୁଇମିଂ ପୁଲ୍, ଜିମ୍, ସ୍ପା, ବିୟୁଟି ପାର୍ଲର, ପ୍ରାଣୀ ଉଦ୍ୟାନ, ସଂଗ୍ରହାଳୟ ଏବଂ ମନୋରଞ୍ଜନ ପାର୍କ ଆଦି ବନ୍ଦ ରହିବ | ସେଲୁନ ଓ ମଲ ଆଦିକୁ ୫୦ ପ୍ରତିଶତ କ୍ଷମତାରେ ଚଳାଇବା ପାଇଁ ଅନୁମତି ଦିଆଯାଇଛି । ଏଥିସହ ହୋଟେଲ, ରେଷ୍ଟୁରାଣ୍ଟ, ସିନେମା ହଲ ଓ ଅଡିଟୋରିୟମ ଆଦିକୁ ୫୦ ପ୍ରତିଶତ କ୍ଷମତାରେ ରାତି ୧୦ ଯାଏ ଖୋଲିବାକୁ ଅନୁମତି ମିଳିଛି । ସ୍ବିଗି, ଜୋମାଟୋ ଭଳି ଖାଦ୍ୟ ଡେଲିଭରୀ ସଂସ୍ଥା ହୋମ ଡେଲିଭରୀ କରିପାରିବେ ।
ବ୍ୟୁରୋ ରିପୋର୍ଟ, ଇଟିଭି ଭାରତ
