ହାଇଦ୍ରାବାଦ:ତେଲେଙ୍ଗାନାରେ ଜାରି ରହିଛି କଂଗ୍ରେସର ‘ଭାରତ ଯୋଡ ଯାତ୍ରା’ । ତେବେ ଗତକାଲି (ମଙ୍ଗଳବାର) ଏହି ଯାତ୍ରାରେ ମହାରାଷ୍ଟ୍ରର ବରିଷ୍ଠ କଂଗ୍ରେସ ନେତା ତଥା ପୂର୍ବତନ ମନ୍ତ୍ରୀ ନୀତିନ ରାଉତ ଆହତ ହୋଇଛନ୍ତି (Maharashtra Ex minister Nitin Raut hospitalised)। ତାଙ୍କ ମୁଣ୍ଡ ଓ ଆଖିରେ ଆଘାତ ଲାଗିଛି । ସେ ବର୍ତ୍ତମାନ ହାଇଦ୍ରାବାଦର ଏକ ଘରୋଇ ହସ୍ପିଟାଲରେ ଚିକିତ୍ସିତ ହେଉଛନ୍ତି । ଗତକାଲି (ମଙ୍ଗଳବାର) ରାତିରେ କାର୍ଯ୍ୟକ୍ରମ ସମୟରେ ଏହି ଘଟଣା ଘଟିଥିବା ତାଙ୍କ ଝିଅ ଦୀକ୍ଷା ନୀତିନ ରାଉତ ସୂଚନା ଦେଇଛନ୍ତି ।
70 ବର୍ଷୀୟ ନୀତିନ ମହାରାଷ୍ଟ୍ର ନାଗପୁର ଉତ୍ତର ବିଧାନସଭା ଆସନରୁ 4 ଥର ବିଧାୟକ ରହିଛନ୍ତି । ତେବେ ମହାରାଷ୍ଟ୍ର କଂଗ୍ରେସର ଜଣେ ପ୍ରମୁଖ ଦଳିତ ଚେହେରା ଭାବେ ସେ ଜଣାଶୁଣା । ସେ ଉଦ୍ଧବ ଠାକରେଙ୍କ ନେତୃତ୍ବାଧୀନ ମହାବିକାଶ ଅଗାଡି ସରକାରରେ ମଧ୍ୟ ମନ୍ତ୍ରୀ ଭାବେ ଦାୟିତ୍ବ ସମ୍ଭାଳି ଥିଲେ । କଂଗ୍ରେସରୁ ମାତ୍ର 2ଜଣ ଉଦ୍ଧବ କ୍ୟାବିନେଟରେ ମନ୍ତ୍ରୀ ପଦ ପାଇଥିବା ବେଳେ ସେଥିରେ ସ୍ଥାନ ପାଇଥିଲେ ନୀତିନ ରାଉତ । ତେବେ ଗତକାଲି ହାଇଦ୍ରାବାଦରେ ଭାରତ ଯୋଡ ଯାତ୍ରା ଜାରି ରହିଥିବା ବେଳେ ସେ ଅଂଶଗ୍ରହଣ କରିବା ନିମନ୍ତେ ହାଇଦ୍ରାବାଦ ଆସିଥିଲେ । ପ୍ରବଳ ଭିଡ ମଧ୍ୟରେ ପୋଲିସ ତାଙ୍କୁ ଧକ୍କା ମାରିଥିବା ବେଳେ ତାଙ୍କ ମୁଣ୍ଡ ଓ ଆଖିରେ ଆଘାତ ଲାଗିଥିବା ସୂଚନା ମିଳିଛି ।