ନୂଆଦିଲ୍ଲୀ: କେନ୍ଦ୍ର ସରକାର ତିନି ବିବାଦୀୟ କୃଷି ଆଇନକୁ ପ୍ରତ୍ୟାହାର( three Farm Laws repeal) କରି ନେଇଛନ୍ତି । ଏହାପରେ କୃଷକଙ୍କ ସବୁ ଦାବି ପୂରଣ କରିବା ପାଇଁ ପ୍ରତିଶ୍ରୁତି ଦେବା ପରେ ଦୀର୍ଘ ବର୍ଷେ ପରେ ଆନ୍ଦୋଳନରୁ ଓହରିଛନ୍ତି ଚାଷୀ । ଗତକାଲି ସିଙ୍ଘୁ ସୀମା ଖାଲି କରିଛନ୍ତି ଆନ୍ଦୋଳନରତ ଚାଷୀ । ଶନିବାର ସିଙ୍ଘୁ ସୀମାରୁ ୨୫ ପ୍ରତିଶତ ଚାଷୀ ଘରକୁ ଫେରିଛନ୍ତି । ଏହି ସମୟରେ କୃଷକ ନେତା ରାକେଶ ଟିକାୟତ କହିଛନ୍ତି ଆନ୍ଦୋଳନ ସରିଛି ହେଲେ ସମୟ ସମୟରେ କିଷାନ ମହାପଞ୍ଚାୟତ ବସିବ ଓ ଚାଷୀଙ୍କ ସମସ୍ୟାର ଆଲୋଚନା ହେବ ।
ପ୍ରତିବର୍ଷ ୧୦ ଦିନ କିଷାନ ଆନ୍ଦୋଳନ ମେଳା ହେବ । ଯଥା ସମୟରେ ମହାପଞ୍ଚାୟତ ବସିବ । ସେଥିରେ ଚାଷୀଙ୍କ ସମସ୍ତ ସସସ୍ୟାର ସମାଧାନ ହେବ ବୋଲି କହିଛନ୍ତି କୃଷକ ନେତା ରାକେଶ ଟିକାୟତ । ତାଙ୍କ ଲଢେଇରେ ସେ ଗଣମାଧ୍ୟମର କାର୍ଯ୍ୟକୁ ପ୍ରଶଂସା କରିଛନ୍ତି । ସମସ୍ତ ବୈଦ୍ୟୁତିକ ଗଣମାଧ୍ୟମ, ଛାପା ଗଣମାଧ୍ୟମ ବିଶେଷ କରି ସୋସିଆଲ ମିଡିଆକୁ ପ୍ରଶଂସା କରିଛନ୍ତି କୃଷକ ନେତା । ସରକାରଙ୍କ ଉପରେ ଚାପ ପକାଇଥିବା ନେଇ ମିଡିଆକୁ ପ୍ରଶଂସା କରିଛନ୍ତି ରାକେଶ ଟିକାୟତ । ଜାନୁଆରୀ ୧୫ରେ ଏକ ସମୀକ୍ଷା ବୈଠକ ହେବ । ଯଦି ସରକାର ତାଙ୍କ ପ୍ରତିଶ୍ରୁତି ନ ରଖନ୍ତି ତେବେ ପୁଣି ଆନ୍ଦୋଳନ ହେବ ବୋଲି କହିଛନ୍ତି ରାକେଶ ଟିକାୟତ ।