10ରେ ରାହୁଲଙ୍କ ବିରୋଧରେ ସ୍ବାଧୀକାର ଭଙ୍ଗ ଶୁଣାଣି, ଅଭିଯୋଗ କରିଥିଲା ବିଜେପି

10 ରେ ରାହୁଲ ଗାନ୍ଧୀଙ୍କ ବିରୋଧରେ ବିଜେପି କରିଥିବା ସ୍ବାଧୀକାର ଭଙ୍ଗ ଅଭିଯୋଗ ଶୁଣାଣି କରିବ ଲୋକସଭା ସ୍ବାଧୀକାର କିମିଟି । ଅଧିକ ପଢନ୍ତୁ

ନୂଆଦିଲ୍ଲୀ:କଂଗ୍ରେସ ନେତା ରାହୁଲ ଗାନ୍ଧୀଙ୍କ ବିରୋଧରେ ଶାସକ ଭାରତୀୟ ଜନତା ପାର୍ଟି ଆଣିଥିବା ସ୍ବାଧୀକାର ଭଙ୍ଗ ଅଭିଯୋଗର ଶୁଣାଣି କରିବ ଲୋକସଭାର ସ୍ବାଧୀକାର କମିଟି । ଚଳିତ ମାସ 10 ତାରିଖରେ ସ୍ବାଧୀକାର କମିଟିର ଏକ ପ୍ୟାନେଲ ଏହି ଶୁଣାଣି କରିବା ନେଇ ସୂଚନା ମିଳିଛି । ବଜେଟ ଅଧିବେଶନରେ ରାଷ୍ଟ୍ରପତିଙ୍କ ସମ୍ବୋଧନର ଧନ୍ୟବାଦ ପ୍ରସ୍ତାବ ଉପରେ ଆଲୋଚନା ବେଳେ ରାହୁଲ ଗୃହରେ ବିଭ୍ରାନ୍ତିକର, ଅଣସଂସଦୀୟ ଓ ଅଭିଯୋଗମୂଳକ ମନ୍ତବ୍ୟ ଦେଇ ଗୃହର ସ୍ବାଧୀକାର ଭଙ୍ଗ କରିଥିବା ବିଜେପି ଅଭିଯୋଗ କରିଥିଲା । ଲୋକସଭା ସ୍ବାଧୀକାର କମିଟି ଏହି ଅଭିଯୋଗର ଶୁଣାଣି କରି ରାହୁଲଙ୍କ ବିରୋଧରେ ଉଚିତ କାର୍ଯ୍ୟାନୁଷ୍ଠାନ ଗ୍ରହଣ କରୁ ବୋଲି ଦାବି କରିଥିଲା ବିଜେପି ।

ଜାତୀୟ ଖବର ସରବରାହ ସଂସ୍ଥା ଏଏନଆଇ ପକ୍ଷରୁ ମିଳିଥିବା ସୂଚନା ଅନୁସାରେ, ଗତମାସ (ଫେବୃଆରୀ) 7 ରେ ରାଷ୍ଟ୍ରପତିଙ୍କ ସମ୍ବୋଧନର ଧନ୍ୟବାଦ ପ୍ରସ୍ତାବ ଚର୍ଚ୍ଚାରେ ଗୃହରେ ଏପରି ବିଭ୍ରାନ୍ତିକର ମନ୍ତବ୍ୟ ଦେଇ କଂଗ୍ରେସ ନେତା ରାହୁଲ ଗାନ୍ଧୀ ଗୃହର ସ୍ବାଧୀକାର ଭଙ୍ଗ କରିଥିବା ବିଜେପି ସାଂସଦ ନିଶିକାନ୍ତ ଦୁବେ ବାଚସ୍ପତି ଓମ ବିର୍ଲାଙ୍କୁ ଚିଠି ଲେଖିଥିଲେ । ପରେ ସମାନ ଅଭିଯୋଗ ସଂସଦୀୟ ବ୍ୟାପର ମନ୍ତ୍ରୀ ପ୍ରହ୍ଲାଦ ଯୋଶୀ ମଧ୍ୟ କରିଥିଲେ ।ଲୋକସଭା ସାଂସଦ ତଥା ସ୍ବାଧୀକାର କମିଟି ପ୍ୟାନେଲର ଅଧ୍ୟକ୍ଷ ସୁନିଲ ସିଂଙ୍କ ଅଧ୍ୟକ୍ଷତାରେ ଏହି ଅଭିଯୋଗର ଶୁଣାଣି ହେବାକୁ ଯାଉଛି ।

ସଂସଦରେ ରାଷ୍ଟ୍ରପତିଙ୍କ ସମ୍ବୋଧନର ଧନ୍ୟବାଦ ପ୍ରସ୍ତାବ ଆଲୋଚନାରେ ବକ୍ତବ୍ୟ ରଖିଥିବା ପ୍ରଥମ ବିରୋଧୀ ଦଳ ନେତା ହେଉଛନ୍ତି ରାହୁଲ ଗାନ୍ଧୀ । ରାହୁଲ ଗାନ୍ଧୀ ହିଣ୍ଡନବର୍ଗ ଓ ଆଦାନୀ ରିପୋର୍ଟ ପ୍ରସଙ୍ଗ ଉଠାଇ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ଟାର୍ଗେଟ କରିଥିଲେ । ମୋଦି- ଆଦାନୀଙ୍କ ମଧ୍ୟରେ ଦୀର୍ଘ ବର୍ଷର ସମ୍ପର୍କ ରହିଛି ବୋଲି ରାହୁଲ କହିଥିଲେ । ନରେନ୍ଦ୍ର ମୋଦି ଗୁଜୁରାଟ ମୁଖ୍ୟମନ୍ତ୍ରୀ ଥିବା ସମୟରପ ହିଁ ଉଭୟଙ୍କ ମଧ୍ୟରେ ଭଲ ସମ୍ପର୍କ ଥିବା ରାହୁଲ କହିଥିଲେ ।

ଯାହାକୁ ନେଇ ଭାରତୀୟ ଜନତା ପାର୍ଟି ଆପତ୍ତି ଉଠାଇବା ସହ ଗୃହରେ ଏପରି ବିଭ୍ରାନ୍ତିକର, ଅମୂଳକ ଓ ଅଭିଯୋଗମୂଳକ ମନ୍ତବ୍ୟ ଦେବା ଫଳରେ ରାହୁଲଙ୍କ ଦ୍ବାରା ଗୃହର ସ୍ବାଧୀକାର ଭଙ୍ଗ ହୋଇଥିବା ଅଭିଯୋଗ କରିଥିଲା । ଏହି ଅଭିଯୋଗର ଶୁଣାଣି ମାର୍ଚ୍ଚ 10 ରେ ସ୍ବାଧୀକାର କମିଟି ଦ୍ବାରା ହେବାକୁ ଯାଉଛି । ଆଦାନୀ ଷ୍ଟକ-କ୍ରାସ ପ୍ରସଙ୍ଗରେ କଂଗ୍ରେସ ସମେତ ଏକାଧିକ ବିରୋଧୀ ଦଳ ନେତା ଯୁଗ୍ମ ସଂସଦୀୟ କମିଟି ଗଠନ କରିବାକୁ ଦାବି କରିଆସୁଥିଲେ ସୁଦ୍ଧା ସରକାର ଏହାକୁ ଏଡାଇ ଯାଉଥିବା ଅଭିଯୋଗ କରିଆସୁଛନ୍ତି ।

ବ୍ୟୁରୋ ରିପୋର୍ଟ, ଇଟିଭି ଭାରତ