ବେଙ୍ଗାଲୁରୁ: କର୍ଣ୍ଣାଟକରେ ମଠ ଭିତରୁ ଲିଙ୍ଗାୟତ ମହନ୍ତଙ୍କ ଝୁଲନ୍ତା ମୃତଦେହ ଉଦ୍ଧାର ହୋଇଛି । ରାମନଗର ଜିଲ୍ଲା ଅନ୍ତର୍ଗତ କଞ୍ଚୁଗଲ ବନ୍ଦେ ମଠରୁ ବାସବଲିଙ୍ଗ ସ୍ବାମୀ(Basavalinga Swami) ନାମକ ମହନ୍ତଙ୍କ ମୃତଦେହ ମିଳିଛି । ମହନ୍ତ ଆତ୍ମହତ୍ୟା କରିଥିବା ପୋଲିସ ସନ୍ଦେହ କରୁଥିବାବେଳେ, ମୃତଦେହ ନିକଟରୁ ଦୁଇ ପୃଷ୍ଠାର ସୁଇସାଇଡ ନୋଟ୍ ଜବତ ହୋଇଛି । ଏଥିରେ କିଛି ଲୋକ ତାଙ୍କୁ ନିଜର ପଦରୁ ହଟାଇବାକୁ ଉତ୍ପୀଡନ ଦେଉଥିବା ବାସବଲିଙ୍ଗ ସ୍ବାମୀ ଅଭିଯୋଗ କରିଛନ୍ତି । ଏନେଇ ସ୍ଥାନୀୟ କୁଦୁର ଥାନାର ଏକ ମାମଲା ରୁଜୁ କରାଯାଇ ତଦନ୍ତ ଆରମ୍ଭ ହୋଇଛି ।
ଦୀର୍ଘ ୨୫ ବର୍ଷ ଧରି ବସବାଲିଙ୍ଗ ସ୍ବାମୀ କଞ୍ଚୁଗଲ ବନ୍ଦେ ମଠ( Kanchugal Bande Mutt)ର ମହନ୍ତ ରହିଥିଲେ । ସୋମବାର ସକାଳେ ମଠ ଭିତରୁ ତାଙ୍କର ଝୁଲନ୍ତା ମୃତଦେହ ଉଦ୍ଧାର କରାଯାଇଥିଲା । କିଛି ବ୍ୟକ୍ତି ତାଙ୍କୁ କୌଣସି କାରଣକୁ ନେଇ ବ୍ଲାକମେଲ କରୁଥିବାରୁ ସେ ଆତ୍ମହତ୍ୟା ନିଷ୍ପତ୍ତି ନେଇଥିବା ପୋଲିସ ସୂତ୍ରରୁ ଜଣାପଡିଛି ।