ହାଇଦ୍ରାବାଦ:ଜମ୍ମୁ କାଶ୍ମୀରର ରଜୌରୀରେ ଆତଙ୍କବାଦୀଙ୍କ ଦ୍ବାରା ଆଇଡି ବିସ୍ଫୋରଣ ୪ଜଣ ପ୍ରାଣ ହରାଇବା ଘଟଣାରେ କାଶ୍ମୀରରେ ଉତ୍ତେଜନା ଦେଖାଦେଇଛି (4 civilians killed in Rajouri)। ଆଜି ଘଟଣାସ୍ଥଳ ପରିଦର୍ଶନ କରିଛନ୍ତି ଜମ୍ମୁ କାଶ୍ମୀର ଉପରାଜ୍ୟପାଳ ମନୋଜ ସିହ୍ନା । ସେଠାରେ ସେ ବରିଷ୍ଠ ପୋଲିସ ଅଧିକାରୀଙ୍କ ସହ ସୁରକ୍ଷା ସମ୍ପର୍କିତ ଏକ ବୈଠକ ମଧ୍ୟ କରିଛନ୍ତି ।
ସ୍ଥିତି ସମୀକ୍ଷା ପରେ ସିହ୍ନା କହିଛନ୍ତି, ମୃତକଙ୍କ ପରିବାରକୁ ଅନୁକମ୍ପା ରାଶି ସହ ସରକାର ଚାକିରି ଯୋଗାଇଦେବେ । ଏପରି କରିଥିବା ଆତଙ୍କୀଙ୍କ ବିରୋଧରେ କଡା କାର୍ଯ୍ୟାନୁଷ୍ଠାନ ଗ୍ରହଣ କରାଯିବ । ସେହିପରି ସୁରକ୍ଷା ବ୍ୟବସ୍ଥା ନିଶ୍ଚିତ କରିବା ପାଇଁ ସୁରକ୍ଷା ବଳ ପଦକ୍ଷେପ ଗ୍ରହଣ କରିଛି ବୋଲି ସେ ସ୍ଥାନୀୟ ଲୋକଙ୍କୁ ଆଶ୍ବାସନା ଦେଇଥିଲେ । ଘଟଣାରେ 4 ଜଣ ସାଧାରଣ ନାଗରିକଙ୍କ ମୃତ୍ୟୁ ହୋଇଥିଲା । ଯାହାକୁ ନେଇ ଆଜି ଘାଟିରେ ଉତ୍ତେଜନା ଦେଖିବାକୁ ମିଳିଛି ।