ଶିମଲା: କିଛି ଦିନ ପୂର୍ବରୁ ପ୍ରାକ ମୌସୁମୀ ବର୍ଷାରେ ଜଳ ପ୍ରଳୟ ଦେଖିଥିବା ହିମାଚଳ ପ୍ରଦେଶ ଏବେ ପୁଣି ଥରେ ପ୍ରବଳ ବର୍ଷାରେ ବେହାଲ ହୋଇଛି । ଗତ 24 ଘଣ୍ଟା ମଧ୍ୟରେ ରାଜ୍ୟର ବିଭିନ୍ନ ସ୍ଥାନରେ ପ୍ରବଳ ବର୍ଷା ଓ ଭୂସ୍ଖଳନରେ 55 ଜଣଙ୍କ ମୃତ୍ୟୁ ଘଟିଛି । ଅନେକ ଘର, ରାସ୍ତାଘାଟ ଭାଙ୍ଗିଯାଇଛି । ଯୋଗାଯୋଗ ବାଧାପ୍ରାପ୍ତ ହୋଇଛି । ଏବେ ମଧ୍ୟ ସ୍ଥିତି ଗମ୍ଭୀର ରହିଛି । କିଛି ସ୍ଥାନରେ ଲୋକଙ୍କୁ ସୁରକ୍ଷିତ ସ୍ଥାନକୁ ସ୍ଥାନାନ୍ତରଣ କରିବାକୁ ପଡିଛି ।
ରାଜଧାନୀ ଶିମଲାଠାରୁ ଆରମ୍ଭ କରି ସୋଲାନ୍, ମାଣ୍ଡି, ହମିରପୁର ସମେତ ଏକାଧିକ ଜିଲ୍ଲାରେ ପ୍ରବଳ ବର୍ଷା ଓ ଭୂସ୍ଖଳନ ହୋଇଛି । ମାଣ୍ଡିରେ ସର୍ବାଧିକ 19 ଜଣଙ୍କର ମୃତ୍ୟୁ ହୋଇଥିବା ସୂଚନା ମିଳିଛି । ସୋଲାନରେ ପ୍ରବଳ ବର୍ଷା ହେତୁ ଏକ ଘର ଭୁଶୁଡି ପଡିବାରୁ ଗୋଟିଏ ପରିବାରର 7 ଜଣଙ୍କ ମୃତ ହୋଇଛି । ଅନ୍ଯ 3 ଜଣଙ୍କୁ ସୁରକ୍ଷିତ ଉଦ୍ଧାର କରାଯାଇ ହସ୍ପିଟାଲରେ ଭର୍ତ୍ତ କରାଯାଇଛି । ମାଣ୍ଡି ଜିଲ୍ଲାର ପାଣ୍ଡୋରେ ମଧ୍ୟ ବର୍ଷା ଜଳସ୍ରୋତରେ ଭାସିଯାଇ 6 ଜଣଙ୍କର ମୃତ୍ୟୁ ଘଟିଛି । ଗତ 24 ଘଣ୍ଟା ମଧ୍ୟରେ ଜିଲ୍ଲାର ବିଭିନ୍ନ ସ୍ଥାନରେ ମୋଟ 19 ଜଣଙ୍କର ମୃତ୍ୟୁ ହୋଇଥିବା ବେଳେ ଏବେ ମଧ୍ୟ 8 ଜଣ ନିଖୋଜ ରହିଥିବା ସରକାରୀ ଭାବେ ପ୍ରକାଶ କରାଯାଇଛି । ଭୂସ୍ଖଳନରେ ଯୋଗାଯୋଗ ବିଛିନ୍ନ ହେବା ମଧ୍ୟ ଉଦ୍ଧାର କାର୍ଯ୍ୟରେ ବାଧା ସୃଷ୍ଟି କରିଛି । ଉଦ୍ଧାରକାରୀ ଟିମ ଘଟଣାସ୍ଥଳରେ ପହଞ୍ଚିବାରେ ବିଳମ୍ବ ହେଉଛି ।
ଏହା ମଧ୍ୟ ପଢନ୍ତୁ:-Shimla Landslide: ଭୂସ୍ଖଳନରେ ଭୁଶୁଡିଲା ଶିବ ମନ୍ଦିର, 9 ମୃତ ଫସିଛନ୍ତି 30 ଶ୍ରଦ୍ଧାଳୁ
ରାଜଧାନୀ ଶିମଲାର ଫାଗଲି ଅଞ୍ଚଳରେ ମଧ୍ୟ ଭୂସ୍ଖଳନ ଘଟିଛି । ଏଥିରେ 5 ଜଣଙ୍କର ମୃତ୍ୟୁ ହୋଇଥିବା ବେଳେ ଅନ୍ୟ 5 ଜଣ ଆହତ ହୋଇଛନ୍ତି । ସମସ୍ତଙ୍କୁ ଉଦ୍ଧାର କରି ଶିମଲାର ଆଇଜିଏମସି ହସ୍ପିଟାଲରେ ଭର୍ତ୍ତି କରାଯାଇଛି । ସେହିପରି ସୋଲାନରେ ଗୋଟିଏ ପରିବାରର 7 ଜଣଙ୍କର ମୃତ୍ୟୁ ହୋଇଛି । କାନ୍ଦାଘାଟରେ ବାଦଲ ଫଟା ବର୍ଷା ଫଳରେ ଜାଦନ ଗ୍ରାମରେ ଏହି ଭୂସ୍ଖଳନ ହୋଇଥିଲା । ଗୋଟିଏ ପରିବାରର ଦୁଇଟି ଘର ଏବଂ ଗୋଟିଏ ଗୋଶାଳା ଭୂସ୍ଖଳନରେ ପୋତି ହୋଇପଡିଥିଲା । ଘରେ ମୋଟ 9 ସଦସ୍ୟ ଥିବା ବେଳେ ଘଟଣାସ୍ଥଳରେ 7 ଜଣଙ୍କ ମୃତ୍ୟୁ ହୋଇଥିଲା । ପାହାଡ ଆବର୍ଜନା ତଳୁ ଏହି ମୃତଦେହଗୁଡିକ ଉଦ୍ଧାର କରାଯିବା ସହ ଅନ୍ୟ ଦୁଇ ଗୁରୁତରଙ୍କୁ ମଧ୍ୟ ଉଦ୍ଧାର କରାଯାଇ ସ୍ଥାନୀୟ ହସ୍ପିଟାଲରେ ଭର୍ତ୍ତି କରାଯାଇଛି ।
ଅଗଷ୍ଟ 13 (ରବିବାର) ରେ ପ୍ରକାଶିତ ସରକାରୀ ତଥ୍ୟ ଅନୁଯାୟୀ ଚଳିତ ବର୍ଷ ପ୍ରାକ ମୌସୁମୀ ଓ ପରବର୍ତ୍ତୀ ବର୍ଷାରେ ଏପର୍ଯ୍ୟନ୍ତ 257 ଜଣଙ୍କର ମୃତ୍ୟୁ ହୋଇଛି । ସହିପରି ଭୂସ୍ଖଳନ କିମ୍ବା ବର୍ଷାଜନିତ ବନ୍ୟାରେ ମୋଟ 290 ଜଣ ଆହତ ହୋଇଛନ୍ତି । ଏହା ବ୍ୟତୀତ 32 ଜଣ ମଧ୍ୟ ନିଖୋଜ ରହିଥିଲେ । ସାରା ରାଜ୍ୟରେ ପ୍ରାୟ 1400 ଘର ସମ୍ପୂର୍ଣ୍ଣ ନଷ୍ଟ ହୋଇଛି । ପ୍ରାୟ 8,000 ଘର ଆଶିଂକ କ୍ଷତିଗ୍ରସ୍ତ ହୋଇଛି । ମୌସୁମୀ ବର୍ଷାରେ ହିମାଚଳ ପ୍ରଦେଶ ପୂର୍ତ୍ତ ବିଭାଗ ପ୍ରାୟ 2248 କୋଟି, ଜଳ ଶକ୍ତି ବିଭାଗ 1,668 କୋଟି ଏବଂ ବିଦ୍ୟୁତ୍ ବୋର୍ଡ 1,505 କୋଟି ଟଙ୍କାର କ୍ଷତି ସହିଛି । ଏହା ବ୍ୟତୀତ ଭିତ୍ତିଭୂମି ସହ ଜଡିତ ଅନ୍ୟ ବିଭାଗଗୁଡିକ ମଧ୍ୟ ପ୍ରାୟ 1,100 କୋଟି କ୍ଷତି ସହିଛନ୍ତି ।
ବ୍ୟୁରୋ ରିପୋର୍ଟ, ଇଟିଭି ଭାରତ
