ହାଇଦ୍ରାବାଦ: ନେପାଳରେ ନାଇଟ କ୍ଲବରେ ସାମିଲ ହେବାକୁ ନେଇ ବିବାଦରେ ଥିବା କଂଗ୍ରେସ ନେତା ରାହୁଲ ଗାନ୍ଧୀ ବିବାଦ ଓ ଚର୍ଚ୍ଚାରୁ ବାହାରି ପାରୁନାହାନ୍ତି । ଆଜି ପୁଣି ଏକ ଭିନ୍ନ ଭିଡିଓ ନେଇ ରାହୁଲଙ୍କୁ ସମାଲୋଚନା କରିଛି BJP । ତେଲେଙ୍ଗାନା ଗସ୍ତରେ ଥିବା ରାହୁଲ ସେଠାରେ ଏକ କୃଷକ ରାଲିଙ୍କୁ(Telangana rally) ସମ୍ବୋଧିତ କରିବା ପୂର୍ବରୁ ପ୍ରସଙ୍ଗ କ’ଣ ସେ ସମ୍ବୋଧନରେ କଣ କହିବେ ବୋଲି ସ୍ଥାନୀୟ ନେତାଙ୍କୁ ପଚାରୁଥିବା ଏକ ଭିଡିଓ ଭାଇରାଲ ହେବା ପରେ ପୁଣି ସମାଲୋଚିତ ହେବାରେ ଲାଗିଛନ୍ତି ରାହୁଲ । ଏହି ଭିଡିଓଟି ସଭା ପୂର୍ବରୁ ରାହୁଲ ଓ ତେଲେଙ୍ଗାନା ପ୍ରଦେଶ କଂଗ୍ରେସ ନେତାଙ୍କ ମଧ୍ୟରେ ଆଲୋଚନା ବୋଲି ଚର୍ଚ୍ଚା ହେଉଛି ।
ବିଜେପି IT ସେଲ୍ ପ୍ରଭାରୀ(In-charge of BJP's National IT Dept) ଅମିତ ମାଲଭିୟା ଏହି ଭିଡିଓ ଟ୍ବିଟ କରିଛନ୍ତି । ଯେଉଁଥିରେ କିଛି ତେଲେଙ୍ଗାନା ପ୍ରଦେଶ କଂଗ୍ରେସ ନେତାଙ୍କ ଗହଣରେ ରାହୁଲ ବସିଥିବାର ନଜର ଆସିଛନ୍ତି । ରାହୁଲ ଉକ୍ତ ନେତାଙ୍କୁ, ଆଜିର ମୁଖ୍ୟ ପ୍ରସଙ୍ଗ କଣ ଓ କଣ ନିର୍ଦ୍ଦିଷ୍ଟ ଭାବେ କହିବାକୁ ହେବ ବୋଲି ପଚାରୁଥିବା ଏହି ଭିଡିଓରେ ଦେଖିବାକୁ ମିଳିଛି । ତେବେ ଏହି ଟ୍ବିଟ୍ରେ ଅମିତ ମାଲଭିୟା ରାହୁଲଙ୍କୁ ସମାଲୋଚନା କରି ଲେଖିଛନ୍ତି, ବ୍ୟକ୍ତିଗତ ବିଦେଶ ଗସ୍ତ ଓ ନାଇଟକ୍ଲବରେ ସାମିଲ ହବା ମଧ୍ୟରେ ରାଜନୀତି କଲେ ଏପରି ସ୍ଥିତି ସୃଷ୍ଟି ହୁଏ ।