ହାଇଦ୍ରାବାଦ:ତେଲେଙ୍ଗାନାରେ ଶାସନରେ ଥିବା KCRଙ୍କ ନେତୃତ୍ବାଧୀନ ଭାରତ ରାଷ୍ଟ୍ର ସମିତି (BRS) ବିଜେପି ବିରୋଧୀ ମହାମେଣ୍ଟ ‘ଇଣ୍ଡିଆ’ ରେ ସାମିଲ ନହେବା ନିଷ୍ପତ୍ତି ପ୍ରସଙ୍ଗରେ KCRଙ୍କ ଉପରେ ବର୍ଷଛନ୍ତି କଂଗ୍ରେସ ମୁଖ୍ୟ ମଲ୍ଲିକାର୍ଜୁନ ଖଡଗେ । ହାଇଦ୍ରାବାଦରେ ଦଳ ପାଇଁ ପ୍ରଚାର କରି ଖଡଗେ ମୁଖ୍ୟମନ୍ତ୍ରୀ କେସିଆରଙ୍କୁ କଡା ସମାଲଚନା କରିଛନ୍ତି । କହିଛନ୍ତି ବିଜେପି ବିରୋଧୀ ମହାମେଣ୍ଟରେ KCR ସାମିଲ ହେଲେ ନାହିଁ । ପାଟନାରେ ପ୍ରଥମ ବୈଠକ ଓ ବେଙ୍ଗାଲୁରୁରେ ଦ୍ବିତୀୟ ବୈଠକକୁ ବର୍ଜନ କଲେ । ଏପରି କରି ସେ ଭାରତୀୟ ଜନତା ପାର୍ଟି ସହ ହାତ ମିଳାଇଛନ୍ତି ।
ଚଳିତ ବର୍ଷ ଶେଷ ସୁଦ୍ଧା ବିଧାନସଭା ନିର୍ବାଚନ ହେବାକୁ ଯାଉଥିବା ତେଲେଙ୍ଗାନାରେ ରାଜଧାନୀ ହାଇଦ୍ରାବାଦରେ ଏକ ବିଶାଳ ସମାବେଶକୁ ସମ୍ବୋଧିତ କରିଛନ୍ତି ଖଡଗେ । କହିଛନ୍ତି ଆସନ୍ତା ଲୋକସଭା ନିର୍ବାଚନ (2024)ରେ କେନ୍ଦ୍ରରେ ବିଜେପିକୁ ପରାସ୍ତ କରିବା ପାଇଁ ଦେଶର 26ଟି ଆଞ୍ଚଳିକ ଦଳଙ୍କ ମିଳିତ ପ୍ରୟାସରେ ଏକ ମିଳିତ ବିରୋଧୀ ମଞ୍ଚ ଗଠନ କରାଯାଇଛି । ତେବେ ତେଲେଙ୍ଗାନାର ମୁଖ୍ୟମନ୍ତ୍ରୀ ଗୋଟିଏ ବି ବୈଠକରେ ଯୋଗ ଦେଇନଥିଲେ । ସେ ଗୁପ୍ତ ଭାବରେ ବିଜେପି ସହ ଆଲୋଚନା କରୁଛନ୍ତି ଏବଂ ତାଙ୍କ ଦଳକୁ ଧର୍ମ ନିରପେକ୍ଷ ବୋଲି ଦର୍ଶାଇ ଚାଲିଛନ୍ତି । KCR ଏବଂ ବିଜେପି ବନ୍ଧୁ ହୋଇ ସାରିଛନ୍ତି ଏବଂ ଉଭୟ ଦଳ ମଧ୍ୟରେ ଗୁପ୍ତ ଚୁକ୍ତି ରହିଛି । ସେଥିପାଇଁ ସେ ବିରୋଧୀ ମେଣ୍ଟରେ ସାମିଲ ହେଲେ ନାହିଁ ବୋଲି ଖଡଗେ କହିଛନ୍ତି ।
ଶାସକ BRSକୁ ଟାର୍ଗେଟ କରିବା ସହ ସେ କଂଗ୍ରେସ ପାଇଁ ଭୋଟ ମାଗିଥିଲେ . ଦଳ କ୍ଷମତାକୁ ଆସିଲେ ଗ୍ୟାରେଣ୍ଟି ପୂରଣ କରିବ ବୋଲି କହିଥିଲେ । ଆର୍ଥିକ ପଛୁଆ ଶ୍ରେଣୀକୁ ମାଗଣା ଘର, ମାଗଣା ଶିକ୍ଷା ଓ ଏସସି ଏବଂ ଏସଟି ପାଇଁ କଂଗ୍ରେସ 12ଟି ଯୋଜନା ପ୍ରତିଶୃତି ଦେଇଛି । ବିଆରଏସ ସରକାର ଶାସନରେ ଏସସି ଏବଂ ଏସଟି ବର୍ଗଙ୍କଠାରୁ ଛଡାଇ ନିଆଯାଇଥିବା ଜମି ଫେରସ୍ତ କରିବାକୁ ମଧ୍ୟ ଖଡଗେ ପ୍ରତିଶୃତି ଦେଇଛନ୍ତି ।