ନୂଆଦିଲ୍ଲୀ: ଜମ୍ମୁ ଓ କାଶ୍ମୀର ବ୍ୟାଙ୍କ ଠକେଇ ମାମଲାରେ ପ୍ରବର୍ତ୍ତନ ନିର୍ଦ୍ଦେଶାଳୟ(ଇଡି) କାଶ୍ମୀରର ଅନେକ ସ୍ଥାନରେ ଚଢାଉ କରିଛି । ଶନିବାର 7 ଟି ସ୍ଥାନରେ ଚଢାଉ କରିଛି ଇଡି । 2002 ମସିହା ପିଏମଏଲଏ ଧାରା ଅନୁସାରେ ଇଡି ଚଢାଉ କରିଛି ।
ସାତଟି ସ୍ଥାନ ମଧ୍ୟରେ ଶ୍ରୀନଗରର 6ଟି ଓ ଅନନ୍ତନାଗ ଜିଲ୍ଲାର ଗୋଟିଏ ସ୍ଥାନରେ ଇଡି ଚଢାଉ କରିଛି । ଆର୍ଥିକ ଅନିୟମିତତା ଅଭିଯୋଗରେ ଏସବୁ ସ୍ଥାନରେ ଇଡି ଚଢାଉ କରିଥିବା ଜଣାପଡିଛି । ଟଙ୍କା ନେଣଦେଣ ତଥ୍ୟରେ ତାଳମେଳ ରହୁନଥିବାରୁ ଇଡି ଚଢାଉ କରିଥିବା ସୂଚନା ମିଳିଛି ।
ସେପଟେ ଅନିୟମିତତା ହୋଇଥିବାର ସୁରାକ ପାଇଁ ଜମ୍ମୁ ଓ କାଶ୍ମୀରର ସିଆଇଡି ବ୍ୟାଙ୍କର କର୍ମଚାରୀଙ୍କ ବିରୋଧରେ ଏଫଆଇଆର ରୁଜୁ କରିଛି । ଏହାସହ କିଛି ସମାଜସେବୀଙ୍କ ନାମରେ ମଧ୍ୟ ମାମଲା ରୁଜୁ କରିଛି ସିଆଇଡି । ସେହିପରି ବ୍ୟାଙ୍କରେ ଥିବା କିଛି ସନ୍ଦିଗ୍ଧ ନେଣଦେଣ ଆକାଉଣ୍ଟ ହୋଲଡରଙ୍କ ନାମରେ ମଧ୍ୟ ଏଫଆଇଆର ରୁଜୁ କରାଯାଇଛି ।
ତେବେ ବ୍ୟାଙ୍କରେ ଥିବା ଅନେକ ଆକାଉଣ୍ଟ କେବଳ ଠକେଇ ପାଇଁ ବ୍ୟବହାର ହୋଇଥିବା ପ୍ରାଥମିକ ତଦନ୍ତରୁ ଜଣାପଡିଛି । ଯାହା ଜମ୍ମୁ ଓ କାଶ୍ମୀର ବ୍ୟାଙ୍କରେ ଠକେଇର ଗନ୍ଧ ବାରି ହେଉଛି ବୋଲି କୁହାଯାଉଛି । ସୂଚନାଥାଉକି, ଜମ୍ମୁ ଓ କାଶ୍ମୀରରୁ ଧାରା 370 ହଟିବା ପରେ କେନ୍ଦ୍ରୀୟ ତଦନ୍ତକାରୀ ସଂସ୍ଥା କଶ୍ମୀରରେ ପାଦ ରଖିବା ସହ ବିଭିନ୍ନ ମାମଲାରେ ତଦନ୍ତ ଚଳାଇଛନ୍ତି ।
@IANS