ନୂଆଦିଲ୍ଲୀ:ଆସନ୍ତାକାଲି(ସୋମବାର) ଉଦଘାଟିତ ହେବ ଉତ୍ତର ପ୍ରଦେଶର ପ୍ରସିଦ୍ଧ କାଶୀ ବିଶ୍ବନାଥ ଧାମ ପ୍ରକଳ୍ପର ପ୍ରଥମ ପର୍ଯ୍ୟାୟ । ଏହି ପ୍ରକଳ୍ପକୁ ଉଦଘାଟନ କରିବେ ପ୍ରଧାନମନ୍ତ୍ରୀ ମୋଦି । ତେବେ ପ୍ରଧାନମନ୍ତ୍ରୀ ଏହାର ଉଦଘାଟନ ପୂର୍ବରୁ ବେଶ ଉତ୍ସାହିତ ଥିବା ତାଙ୍କର ଏକ ଟ୍ବିଟରେ ଦେଖିବାକୁ ମିଳିଛି । ପ୍ରଧାନମନ୍ତ୍ରୀ କହିଛନ୍ତି ଯେ ସୋମବାର ଉଦ୍ଘାଟିତ ହେବାକୁ ଥିବା ପ୍ରକଳ୍ପ କାଶୀପୀଠର ଆଧ୍ୟାତ୍ମିକତାକୁ ଆହୁରି ବୃଦ୍ଧି କରିବ ।
ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଆସନ୍ତାକାଲି (ସୋମବାର) ଠାରୁ ନିଜ ସଂସଦୀୟ ନିର୍ବାଚନମଣ୍ଡଳୀ ବାରାଣାସୀକୁ ଦୁଇ ଦିନିଆ ଗସ୍ତରେ ଆସୁଛନ୍ତି । ଏହି ଗସ୍ତରେ ସେ କାଶୀ ବିଶ୍ବନାଥ ଧାମ ପ୍ରକଳ୍ପର ପ୍ରଥମ ପର୍ଯ୍ୟାୟକୁ ଉଦଘାଟନ କରିବେ । ଏହି ପ୍ରଥମ ପର୍ଯ୍ୟାୟ ଭିତ୍ତିଭୂମି ବିକାଶରେ ପ୍ରାୟ 339 କୋଟି ଟଙ୍କା ବ୍ୟୟ ହୋଇଛି ।
ଆସନ୍ତାକାଲି ଗସ୍ତ ପୂର୍ବରୁ ପ୍ରଧାମନ୍ତ୍ରୀ ଟ୍ବିଟ କରି କହିଛନ୍ତି ଆସନ୍ତାକାଲି (13 ଡିସେମ୍ବର) ଏକ ଗୁରୁତ୍ବପୂର୍ଣ୍ଣ ଦିନ । କାଶୀରେ ଏକ ସ୍ବତନ୍ତ୍ର କାର୍ଯ୍ୟକ୍ରମରେ ଶ୍ରୀ କାଶୀ ବିଶ୍ବନାଥ ଧାମ ପ୍ରକଳ୍ପ ଉଦ୍ଘାଟିତ ହେବାକୁ ଯାଉଛି । ଏହା କାଶୀ ପୀଠର ଆଧ୍ୟାତ୍ମିକ ଉତ୍ସାହକୁ ଆହୁରି ବୃଦ୍ଧି କରିବ । ମୁଁ ସମସ୍ତଙ୍କୁ ଆସନ୍ତାକାଲିର କାର୍ଯ୍ୟକ୍ରମରେ ଯୋଗଦେବାକୁ ଅନୁରୋଧ କରିବି ବୋଲି ପ୍ରଧାନମନ୍ତ୍ରୀ ଟ୍ବିଟ କରିଥିବା ଦେଖିବାକୁ ମିଳିଛି ।